இந்த ஆர்ப்பாட்டத்தில் சிபிஐ முத்தரசன், சிபிஐ(எம்) பாலகிருஷ்ணன், வைகோ, திருமாவளவன், காதர்மொய்தீன், சமூக ஆர்வலர்கள், பத்திரிகையாளர்கள் உள்ளிட்ட பலரும் கலந்துகொண்டுள்ளனர்.
இந்த ஆர்ப்பாட்டத்தில் பேசியது;
பாலகிருஷ்ணன் சி.பி.எம்:
குடியுரிமையை வழங்க மதத்தை அளவுகோல் ஆக்கிவிட்டனர். அந்தளவிற்கு அரசியல் அமைப்பு சட்டத்தைக் கெடுத்துள்ளனர். இலங்கை தமிழர்களுக்கு குடியுரிமை ஏன் வழங்கவில்லை என்று கேட்டால் பதில் இல்லை. இந்தியாவின் ராஜபக்சேவாக மோடி மாறியுள்ளார். மோடி ஆட்சிக்கு மலர் அஞ்சலி செலுத்தும் நேரம் வந்துள்ளது என்றார்.
இதையும் படிங்க: ' மாணவர்கள் வன்முறையில் ஈடுபடவில்லை ' - டெல்லி ஜாமியா பல்கலை. துணைவேந்தர் அதிரடி
கோபண்ணா, காங்கிரஸ் கட்சி:
பாபர் மசூதி வழக்கில் உச்ச நீதிமன்றம் தீர்ப்பு என்பதால் இஸ்லாமியர்கள் எதிர்க்கவில்லை. ஆனால் குடியுரிமைச் சட்டத்திற்கு எதிராக நாடுமுழுவதும் எதிர்ப்புகள் வலுத்துள்ளது. மக்களை மதரீதியாக பிளவுபடுத்துவதை மக்கள் விரும்பவில்லை. மிகப்பெரிய பேராபத்து ஏற்பட்டுள்ளது. இந்தச்சட்டம் மாணவர்கள் மத்தியில் வெறுப்பை ஏற்படுத்தியுள்ளது எனப் பேசினார்.
ஜி.ராமகிருஷ்ணன், சி.பி.எம்:
இச்சட்டத்திற்கு எதிராக தமிழ்நாடு முழுவதும் போராட்டம் ஒன்றை நடத்த வேண்டும். கேரளாவில் கம்யூனிஸ்ட், காங்கிரஸ் கட்சிகள் இணைந்து போராட்டத்தை நடத்தினர். இச்சட்டம் நிறைவேற்றப்பட்ட அதே நாளில் ஏற்பட்ட விபத்தில் 40க்கும் மேற்பட்டோர் உயிரிழந்தனர். அப்போது இஸ்லாமிய தொழிலாளி முஷ்ரப் அலி இறக்கும் தருவாயில், இந்து நண்பர் அகர்வால் தான் தன் குடும்பத்தை காப்பாற்ற வேண்டும் என்று கூறியுள்ளார். இதுதான் மதம் கடந்த மனிதாபிமானம். அப்படிப்பட்ட மக்களை பிரிக்கும் வேலையை பாஜக செய்கிறது.
இந்திய அரசியலமைப்புச் சட்டத்தை இயற்றிய பின் நிறைவு உரையின்போது பேசிய அம்பேத்கர், இந்த அரசு மக்களால் மக்களுக்காக அமைக்கப்பட்ட அரசு என்றார். அதனை பாஜக சிதைத்துள்ளது எனப் பேசினார்.
ஆர்.எஸ்.பாரதி, திமுக:
குடியுரிமைச் சட்டத்திற்கு எதிரான இந்தப் போராட்டம் மெல்லமெல்ல வலுவானதாக மாறியிருக்கிறது. இச்சட்டம் மிகப்பெரிய ஆபத்து. இப்போராட்டம் இரண்டாம் சுதந்திர போராட்டம் என்பது போல் உருவாகவுள்ளது. உலகில் அதிக இஸ்லாமியர்கள் இந்தியாவில்தான் வாழ்கிறார்கள். அஸாம் உள்ளிட்ட மாநிலங்களில் போராட்டம் தீவிரமாகியுள்ளது. அன்புமணி பதவி ஏற்றபின் இச்சட்டத்தை ஆதரிக்க மட்டுமே அவைக்கு வந்திருந்தார். அதிமுக உள்ளிட்ட பல்வேறு கட்சிகளின் உறுப்பினர்கள் ஆதரவளிக்காமல் இருந்திருந்தால் இச்சட்டம் நிறைவேறி இருக்காது. அனைவரும் ஒன்றுபட்டு இச்சட்டத்தை எதிர்க்க வேண்டும் என்றார்.
ஊடகவியலாளர் ஜென்.ராம்:
அனைத்தையும் உள்ளடக்கிய இந்தியாவை எதிர்பார்த்தவர் காந்தி. அவற்றையெல்லாம் பறிக்கும் விதமாக பல்வேறு சட்டங்களை பாஜக கொண்டுவந்திருக்கிறது. இவர்களால் உருவாக்கப்பட்ட சட்டங்களினால் ஒரு குறிப்பிட்ட மக்கள் பாதிப்புக்கிள்ளாகின்றனர் எனப் பேசினார்.
ப்ரண்ட் லைன் பத்திரிக்கை ஆசிரியர் விஜயசங்கர்:
இந்தியா இப்போது எழுந்து நிற்கிறது. கேரளாவில் எதிரெதிர் கட்சிகள் இணைந்து போராடுகின்றன. அஸாமில் இந்துக்களும், இஸ்லாமியர்களும் போராடுகிறார்கள். அடையாளங்களை வைத்து மக்களை பிரித்தாளும் போக்கை பாஜக கடைபிடிப்பது அபாயகரமானது என்றார்.
அகில இந்திய முஸ்லிம் லீக் தலைவர் காதர்மொய்தீன்:
இந்த நாடு சமய சார்பற்ற நாடு. கடந்த 72 ஆண்டுகளாக பின்பற்றி வந்த மாண்புகளை உடைத்து இந்தச் சட்டம் கொண்டுவரப்பட்டுள்ளது. மக்கள் எதிர்ப்பிற்கு ஏற்று சட்டத்தில் மாறுதல் செய்யப்படாவிட்டால், நாடு முழுமையாக ஏற்பட உள்ள போராட்டங்களின் நெருப்பில் பாஜக அரசு எரிந்து விடும். இந்தப்போராட்டம் பரவும், வெடிக்கும் என்பதில் மாற்றுக்கருத்து இல்லை. மக்களின் மனதை பிரிக்கும்படியான சட்டத்தை பாஜக கொண்டுவந்துள்ளது. இப்போராட்டம் இத்தோடு நின்றுவிடாமல், தெருத்தெருவாக நடக்க வேண்டும். இந்தப் போராட்டம் தொடர வேண்டும் என்றார்.
மூத்த வழக்கறிஞர் பிரசாத்:
கம்யூனிஸ்ட் கட்சி நேர்மையான கொள்கையுடன் மக்களுக்காக போராடுகிறது. உண்மையில் மக்களுக்காக தான் இச்சட்டம் என்றால் ஒருதரப்பினருக்கு மட்டும் மறுப்பது ஏன்? மக்கள் போராட்டம் வலுப்பெற்றால் தான் இச்சட்டம் தொடர்பான வழக்கு உச்ச நீதிமன்றத்தில் வெல்லும் என்றார்.
இதையும் படிங்க: குடியுரிமை சட்டத்திருத்தத்துக்கு எதிர்ப்பு: கேரளாவில் கூட்டாகப் போராடும் முதலமைச்சரும், எதிர்க்கட்சி தலைவரும்..!
சி.பி.ஐ மாநில செயலாளர் முத்தரசன்:
குடியரசுத் தலைவரிடம் ஏற்கனவே வெத்துப் பேப்பரில் கையெழுத்து வாங்கி விட்டார்கள். ஜனநாயகத்தில் எள் முனையளவும் நம்பிக்கை இல்லாமல் சர்வாதிகார நம்பிக்கை கொண்ட பாசிஸ்ட் ஆட்சி இங்கு நடந்து வருகிறது. மோடி ஒரு ஹிட்லர், அமித் ஷா ஒரு கோயபல்ஸ். ஹிட்லர் தன் உடலின் சாம்பல் கூட கிடைக்கக் கூடாது என்றதை சரியாக செய்தவர் கோயபல்ஸ். அதேபோல் அமித் ஷா செய்வாரா என்பது எனக்குத் தெரியாது. ஆனால் அப்படி ஆகிவிடக் கூடாது.
60% மக்கள் பாஜகவிற்கு எதிராகத்தான் உள்ளார்கள். மோடியின் பினாமி கட்சிகள் இந்த சட்டத்திற்கு ஓட்டுப் போட்டுள்ளனர். பின்னர் அவர்கள் அமைச்சர் பதவி வாங்கிக்கொள்வார்கள். பலக்கட்சிகள் கைக்கூலிகளாக உள்ளனர். அஸாமில் மட்டுமல்ல திரிபுரா, மேற்கு வங்கம், டெல்லி உள்ளிட்ட பகுதிகளில் போராட்டங்கள் நடக்கிறது. மாணவர்கள் பேருந்துகளை எரிக்கவில்லை. காவல்துறையினர் தான் எரித்திருக்கின்றனர். நாட்டை படிப்படியாக இராணுவ மயத்திற்கு பாஜக மாற்றி வருகிறது. ஆர்.எஸ்.எஸ்-ன் குழந்தையாக உள்ள பாஜக, அதற்கு துணைபோகும் அதிமுக உள்ளிட்ட கட்சிகளிடமிருந்து நாட்டை காப்பாற்றுவோம் என்றார்.
மனித நேய மக்கள் கட்சி தலைவர் ஜவாஹிருல்லா:
இச்சட்டத்தை அனைவரும் ஒன்றிணைந்து எதிர்க்க வேண்டும் என அதிமுக, பாமக உள்ளிட்ட கட்சிகளுக்கு நான் கடிதம் எழுதியிருந்தேன். அனால் நடந்தது என்னவென்று அனைவருக்கும் தெரியும். கட்சியின் பேரில் அண்ணா படம் இருக்கிறது. அம்மா ஆட்சி என்கிறார்கள். ஆனால் ஈழத்தமிழர்களுக்கு குடியுரிமை வழங்க வேண்டும் என அனைவரும் முழங்கியும், அவர்களுக்கு துரோகம் இழைத்து முதுகில் குத்தியுள்ளனர். நாட்டின் பல பிரச்னைகளை மறைக்க இந்த சட்டத்தை பாஜக அரசு உருவாக்கியுள்ளது. இருப்பினும், அதிமுகவையும், பாமகவையும் மறக்க முடியாது. வருகின்ற 18ஆம் தேதி முதலமைச்சர் எடப்பாடி பழனிசாமி வீட்டை முற்றுகையிடும் போராட்டம் நடைபெற உள்ளது. கோல்வார்க்கர் சிந்தனைகளை பாஜக அமல்படுத்துகிறது. நாட்டில் உள்ள மாநிலங்களுக்கு உள்ள உரிமைகளை பறித்து ஒட்டுமொத்த அதிகாரத்தையும் எடுத்துக்கொள்ள பாஜக முயல்கிறது என்றார்.
விடுதலை சிறுத்தைகள் கட்சித் தலைவர் திருமாவளவன் எம்.பி:
கேரளாவில் இச்சட்டத்திற்கு கடும் எதிர்ப்பு உள்ளது. நாம் சற்று மந்தமாக உள்ளோம். மோசமானவர்களிடம் இந்த நாடு சிக்கிக்கொண்டுள்ளது. இச்சட்டத்தின் மூலம் பாஜக வெளிப்படையாக இஸ்லாமியர்கள் மீது வெறுப்பை கக்குகிறது. இந்தச் சட்டம் அறிமுகப்படுத்தப்பட்டபோது இஸ்லாமியர்களுக்கு எதிரான சட்டம் இல்லை என்ற அமித் ஷா, நடுவே ரோகிங்யா இஸ்லாமியர்கள் எக்காலத்திலும் அனுமதிக்கப்பட மாட்டார்கள் என்றார். மோகன் பகவத் இந்தியா ஒரு இந்து ராஷ்ட்ரம் என அறிவிக்கிறார். அரசியலைப்பு சட்டத்தை நீர்த்துப்போகச் செய்துவிட்டு இந்து ராஷ்ட்ரம் உருவாக்க உள்ளனர். இந்துக்களின் தேசம் என அறிவிக்க வேண்டும் என்பதே அமித் ஷாவின் நோக்கம். இஸ்லாமிய மக்கள் தொகை அதிகரிப்பதைப் பொறுத்துக்கொள்ள முடியாது என்கிற அச்சத்தை அமித் ஷா வெளிப்படுத்தி, இஸ்லாமியர்களுக்கு மட்டும் இந்த சட்டத்தின் மூலம் குடியிரிமை மறுக்கப்படுகிறது. ஈழத்தமிழர்கள் பற்றி எந்த பேச்சும் இல்லை. இச்சட்டத்தின் டார்கெட் இஸ்லாமியர்கள் மட்டுமே என்பதால் இது அரசியலமைப்பு சட்டத்திற்கு எதிரானது என்கிறோம். அவர்களுக்கு தேவையெல்லாம் சனாதன தர்மம் மட்டுமே. அதிகாரம் கையில் இருப்பதால் அகந்தையோடும், ஆணவத்தோடும் பாஜக செயல்படுகிறது. இந்தப் போராட்டம் இஸ்லாமியர்களுக்கான போராட்டம் அல்ல. தேசத்தைக் காப்பதற்கானப் போராட்டம் என்றார்.
இது ஆபத்தான ஒன்று என பாஜக புரிந்துகொள்ள வேண்டும். காஷ்மீர் அமைதியாக உள்ளது என நினைக்க வேண்டாம். கந்தகக் கிணறு போல் உள்ள அந்த மாநிலம் விரைவில் கொதித்தெழும். அந்த மாநில இளைஞர்கள் பொங்கி எழுவார்கள். இஸ்லாமியர்களுக்கு இங்கு குடியுரிமை இல்லை என சொல்ல பாஜக யார் ?
குப்தர்கள், மவுரியர்கள், அசோகரின் காலத்தில் நாம் இல்லை. ஒற்றுமைக்கு நான் விரோதி அல்ல. இலங்கை தமிழர்களுக்கு அகதிகளாக வந்தவர்களுக்கு குடியுரிமை வழங்கப்படவில்லை. டெல்லி பல்கலை மாணவர்கள் போர்க்களம் புகுந்து விட்டார்கள். இந்த சட்டம் வங்காள விரிகுடா கடலில் தூக்கி எரியப்பட வேண்டும் என்றார்.
இந்த ஆர்ப்பாட்டம் முடிந்த பின்னர் இளைஞர்கள் தீப்பந்தங்களை ஏந்தியபடி அதிமுக மற்றும் பாஜக அரசுகளுக்கு எதிராக முழக்கமிட்டனர்.
இதையும் படிங்க: பேருந்தை கொளுத்த போலீஸ், மாணவர்களை அடிக்க அடியாட்கள்!
