அன்னபூரணி படத்துக்கு வலுக்கும் எதிர்ப்பு..! என்ன காரணம்?

author img

By ETV Bharat Tamil Nadu Desk

Published : Dec 3, 2023, 4:56 PM IST

opposition raise to nayanthara starrer movie annapoorani

Opposition Raise to Annapoorani Movie: நயன்தாராவின் 75வது படமாக இந்த மாதம் 1ஆம் தேதி வெளியான அன்னபூரணி படத்திற்கு ராஷ்ட்ரிய இந்து மகா சபா மாநில தலைவர்‌ வேலு எதிர்ப்பு தெரிவித்துள்ளார்.

சென்னை : திரைப்படத்துறையில் முன்னணி நடிகையாக வலம் வரும் நயன்தாரா, தனது 75வது படமான ‘அன்னபூரணி - The Goddess of Food’ என்ற படத்தில் நடித்துள்ளார். இவர் சோலோ ஹீரோயினாக நடிக்கும் படங்களுக்கு ரசிகர்கள் மத்தியில் நல்ல வரவேற்பு இருக்கும். அந்த வகையில், இந்த படமும் இவருக்கு சோலோ ஹீரோயின் கதையிலேயே அமைந்துள்ளது.

ஜீ ஸ்டுடியோஸ், நாட் ஸ்டுடியோஸ் மற்றும் டிரிடெண்ட் ஆர்ட்ஸ் இணைந்து தயாரித்துள்ள இந்தப் படத்தை, நிலேஷ் கிருஷ்ணா இயக்கியுள்ளார். இப்படம் இந்த மாதம் 1ஆம் தேதி திரையரங்குகளில் வெளியானது. இந்த படத்துக்கு கலவையான விமர்சனங்கள் கிடைத்து வருகிறது. இப்படத்தில் நயன்தாரா பிராமணர் குடும்பத்தைச் சேர்ந்த பெண்ணாக நடித்து உள்ளார்.

சமையற்கலை நிபுணராக வேண்டும் என்ற ஆசையில் இருக்கும் அவருக்கு அப்பா எதிர்ப்பு தெரிவிக்கிறார். ஆனாலும் அப்பாவின் எதிர்ப்பை மீறி சமையற்கலை நிபுணராகிறார். அதன் பிறகு அந்த துறையில் அவருக்கு இருக்கும் சவால் என்ன என்பதே இப்படம். இந்த நிலையில் இப்படத்திற்கு ராஷ்ட்ரிய இந்து மகா சபா எதிர்ப்பு தெரிவித்துள்ளது.

அன்னபூரணி திரைப்படம் பிராமண சமுதாயத்தை இழிவுபடுத்தும் விதமாக கதையம்சம் கொண்டுள்ளதாகவும், அப்படத்தின் இயக்குநர் மற்றும் அதில் நடித்த நயன்தாரா ஆகியோரை வன்மையாக கண்டிப்பதாகவும் ராஷ்ட்ரிய இந்து மகா சபா மாநில தலைவர்‌ வேலு தெரிவித்துள்ளார்.

இதுகுறித்து அவர் ஈடிவி பாரத் செய்தி நிறுவனத்திற்கு அவர் கூறியதாவது, "அன்னபூரணி படத்தில் பிராமணர் குடும்பத்தில் பிறந்த பெண்ணான நயன்தாரா, சமையல் போட்டியில் வெற்றிபெற அசைவம் சமைப்பது எப்படி என்ற புத்தகத்தை படித்துக் கொண்டு இருப்பார். வேறு மதத்தைச் சேர்ந்தவர் இப்படி செய்பவராக காட்டி இருந்தால் இந்நேரம் எத்தனை பிரச்சினை வந்திருக்கும்.

அதுமட்டுமின்றி ஒரு இஸ்லாமிய இளைஞரை பிராமணர் பெண் காதலிப்பதாக காட்சிகள் வைத்துள்ளனர். இதனை வன்மையாக கண்டிக்கிறேன். படத்தை தடை செய்ய வேண்டும்.‌ படத்துக்கு எதிராக பொதுநல வழக்கு தொடர உள்ளோம். மேலும் திரையரங்குகளில் முற்றுகை போராட்டம் நடத்தப்படும். தொடர்ந்து இந்து மதத்தை குறிவைத்து திரைப்படங்கள் எடுக்கப்பட்டு வருகின்றன" என தெரிவித்து உள்ளார்.

மேலும், அன்னபூரணி படம் வெளியாகி தற்போது திரையரங்குகளில் ஓடிக் கொண்டு இருக்கும் நிலையில், இவ்வாறு திடீரென படத்திற்கு எதிர்ப்பு கிளம்பி இருப்பது திரையுலகினர் மத்தியில் அதிர்ச்சியை ஏற்படுத்தி உள்ளது.

இதையும் படிங்க: நாவலாசிரியர் கதையில் உருவாகும் புது படம்! அப்டேட் என்ன?

ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.