தமிழ்நாடு பொது நுழைவுத் தேர்வு (டான்செட்2019) சென்னை அண்ணாப் பல்கலைக்கழகம் நடத்தும் என்று அரசு அறிவித்துள்ளது. இந்த நுழைவுத் தேர்வு மூலம் அண்ணாப் பல்கலைக் கழகத்தின் துறைகள், அதன் உறுப்புக் கல்லூரிகள், அண்ணாப் பல்கலைக் கழகத்தின் மண்டல கல்லூரிகள், அண்ணாமலைப் பல்கலைக் கழகம், அரசு மற்றும் அரசு உதவிப்பெறும் சுயநிதி பொறியியல், கலை மற்றும் அறிவியல் கல்லூரியில் உள்ள எம்.பி.ஏ, எம்.சி.ஏ, எம்.இ, எம்.டெக், எம்.ஆர்க், எம்.பிளான் ஆகிய முதுகலைப் பட்டப்படிப்புகளில் மாணவர்கள் 2019-20ஆம் கல்வியாண்டில் சேரலாம்.
மேலும் சில பல்கலைக்கழகம் மற்றும் தனியார் கல்லூரிகள் டான்செட் மதிப்பெண் அடிப்படையில் மாணவர்களை சேர்கின்றனர். எம்.பி.ஏ, எம்.சிஏ மற்றும் எம்.இ, எம்.டெக், எம்.ஆர்க் ஆகிய பட்டப் படிப்பிற்கான நுழைவுத் தேர்வினை எழுதுவதற்கு விண்ணப்பக் கட்டணமாகப் பொதுப்பிரிவினர் ரூ.500, எஸ்.சி, எஸ்சிஏ, எஸ்டி பிரிவினர் ரூ.250 என இணையதளம் மூலம் செலுத்த வேண்டும். இத்தேர்வினை எழுதுவதற்கு மே 8ஆம் தேதி முதல் 25ஆம் தேதி வரை இணையதளம் மூலம் விண்ணப்பிக்கலாம் என அறிவிக்கப்பட்டிருந்தது. ஆனால் 25ஆம் தேதி வரையில் 35,531 பேர் மட்டுமே விண்ணப்பம் செய்திருந்தனர். எம்.பி.ஏ படிப்பிற்கு 18,497 பேரும், எம்.சி.ஏ. படிப்பிற்கு 5,212 பேரும், எம்.இ, எம்.ஆர்க், எம்.பிளான், எம்.டெக் படிப்பிற்கு 11,822 பேரும் விண்ணப்பித்துள்ளனர். இதனால் மாணவர்கள் விண்ணப்பம் செய்வதற்கான தேதியை மே 31ஆம் தேதி வரையில் விண்ணப்பிக்கலாம் என அறிவிக்கப்பட்டுள்ளது.
எம்.சி.ஏ படிப்பிற்கு ஜூன் 22ஆம் தேதி காலை 10 மணி முதல் 12 மணி வரையும், எம்.பி.ஏ படிப்பிற்கு ஜூன் 22ஆம் தேதி மதியம் 2.30 மணி முதல் 4.30 மணி வரையும், எம்.இ, எம்.டெக், எம்.ஆர்க், எம்.பிளான் படிப்பிற்கு ஜூன் 23ஆம் தேதி காலை 10 மணி முதல் 12 மணிவரை நுழைவுத் தேர்வு நடைபெறும். மாணவர்கள் சேர்வதற்கான தகுதி, பதிவு செய்தல், தேர்வுக்கூட நுழைவுச்சீட்டு, மதிப்பெண் பட்டியல் போன்றவற்றை www.annauniv.edu/tancet2019 என்ற இணையதளத்தில் பார்த்துத் தெரிந்து கொள்ளலாம்.
