திருநெல்வேலி மாவட்டம், தச்சநல்லூர் அருகே கரையிருப்பு கிராமத்தில் வசிக்கும் இந்திய ஜனநாயக வாலிபர் சங்கத்தின் நெல்லை மாவட்ட பொருளாளரும், மார்க்சிஸ்ட் கம்யூ., கட்சியின் இடைக்குழு உறுப்பினருமான அசோக் (24) அந்த கிராமத்தில் உள்ள சாதிவெறியர்களால் படுகொலை செய்யப்பட்டார்.
இந்தப் படுகொலையை மார்க்சிஸ்ட் கம்யூனிஸ்ட் கட்சியின் தமிழ்நாடு மாநில செயற்குழு வன்மையாக கண்டிக்கிறது. இது குறித்து கண்டனம் தெரிவித்து அறிக்கை வெளியிட்டுள்ளது.
அதில், 'கரையிருப்பு கிராமத்தில் உள்ள பட்டியிலின மக்கள் தங்களது வேலை, அன்றாடப் பணிகளுக்காக வேறு சமூக மக்கள் வசிக்கும் பொதுப் பாதை வழியாகவே செல்ல முடியும். அவ்வழியே செல்லும் பட்டியிலன மக்களை சில சாதி ஆணவம் கொண்ட வெறியர்கள் சாதிய ரீதியாக இழிவுபடுத்தும் செயல்கள் தொடர்ந்து அரங்கேற்றிவந்துள்ளனர். இதனைத் தட்டிக் கேட்க முன்வருபவர்களை இடைமறித்து இழிவுபடுத்துவது, அச்சுறுத்தி தாக்குவது போன்ற சம்பவங்களும் நடந்துள்ளன.
இந்நிலையில் அசோக் அவ்வழியே தனது தாயாருடன் இரண்டு வாரங்களுக்கு முன்பு இருசக்கர வாகனத்தில் செல்லும்போது சில சாதிவெறி சமூக விரோத சக்திகளால் வழிமறிக்கப்பட்டு தாக்கப்பட்டனர். இது குறித்து காவல்துறையினரிடம் புகார் அளிக்கப்பட்டும், புகார் மீது எந்த நடவடிக்கையும் மேற்கொள்ளவில்லை. நேற்று முன்தினம் (12.06.2019) இரவு சுமார் 9.00 மணியளவில் அசோக் வேலைக்கு செல்லும்போது, சாதி வெறியர்களால் படுகொலை செய்யப்பட்டுள்ளார். இந்தப் படுகொலைக்கு காவல் துறையின் மெத்தனப்போக்கே காரணமாகும்.
தென் மாவட்டங்களில் இதுபோன்று பட்டியலி மக்கள் மீதான தாக்குதல்களும், படுகொலைகளும் சாதிய வெறியர்களால் தொடர்ச்சியாக நிகழ்த்தப்படுகிறது. அரசும், காவல் துறையும் இதனை தடுத்து நிறுத்தவும், சமூக நல்லிணக்கத்தை உறுதிப்படுத்தவும் உறுதியான நடவடிக்கைகளை எடுக்காததனுடைய விளைவே இதுபோன்ற படுகொலை சம்பவங்கள் தொடர்ச்சியாக நடைபெறுகின்றன.
எனவே, அசோக்கை படுகொலை செய்த கொலையாளிகள் அனைவரையும் உடனடியாக கைது செய்து, கொலைக்குற்றப் பிரிவுகளுடன்- எஸ்.சி./எஸ்.டி. வன்கொடுமைத் தடுப்புச் சட்டப் பிரிவுகளை இணைப்பது உள்ளிட்டு சட்டரீதியான நடவடிக்கைகளை எடுக்க வேண்டுமெனவும், படுகொலை செய்யப்பட்ட அசோக்கின் குடும்பத்திற்கு உரிய இழப்பீடு, அரசு வேலைவாய்ப்பு வழங்கிட வேண்டுமெனவும், முன்னரே புகார் அளித்தும் நடவடிக்கை எடுக்காத காவல் துறையினர் மீது உரிய நடவடிக்கைகள் எடுக்க வேண்டுமெனவும் மார்க்சிஸ்ட் கம்யூனிஸ்ட் கட்சி தமிழ்நாடு அரசை வலியுறுத்துகிறது.
அசோக் படுகொலையை கண்டித்தும், சாதி வெறியர்கள் மீது உரிய நடவடிக்கைகள் எடுத்திட வலியுறுத்தியும் அனைத்து மாவட்டங்களிலும் உடனடியாக கண்டன இயக்கங்கள் நடத்திட வேண்டுமென கட்சி அணிகளை மாநில செயற்குழு கேட்டுக் கொள்கிறது' எனத் தெரிவிக்கப்பட்டுள்ளது.
