விஜய் நடித்துள்ள ’மாஸ்டர்’ படத்தின் இசைவெளீயிட்டு விழா நேற்று சென்னையில் நடைப்பெற்றது. அதில் பேசிய விஜய் சேதுபதி, “கடவுள் மேல இருக்காரு, மனிதன் தான் பூமியில் இருக்கான். அதனால் மனிதனை காப்பாற்ற மனிதன் தான் வருவான். மேல இருந்து ஒன்னும் வராது. கரோனா வந்தால் உறவினர்களே கூட தொட அச்சப்படுவார்கள். ஆனால் அவர்களை தொட்டு சிகிச்சை செய்யும் மருத்துவர்களுக்கு நன்றி’’ என்று கூறினார்.
தொடர்ந்து பேசிய விஜய் சேதுபதி, “சாமி பல கோடி வருஷமாக இங்கே இருக்கிறது. ஆனா சாமியை காப்பாத்துற அளவுக்கு மகா மனுஷனை இன்னும் அது படைக்கவில்லை. எனவே சாமியை காப்பாத்துறேன்னு சொல்ற எந்தக் கூட்டத்தோடும் தயவுசெய்து பழகாதீர்கள்" என்று பேசினார்.
விஜய் சேதுபதியின் இந்த பேச்சுக்கு எதிர்ப்பு தெரிவித்து நடிகையும், பாஜக ஆதரவாளருமான காயத்ரி ரகுராம் தனது ட்விட்டர் பக்கத்தில் பதிவு ஓன்று வெளியிட்டுள்ளார். அதில், “இன்னொரு மனிதனை நம்ப வேண்டும் என்று சொல்லிய நண்பருக்கு குட் லக். எந்த நம்பிக்கையையும் அழிக்க முடியாது.
பல கோடி பேர் இருக்கிறார்கள் (அனைத்து மதங்களிலும்). அவர்களை நீங்கள் முட்டாள் என நினைத்தால், உங்களை நினைத்து நான் வருத்தப்படுகிறேன். மனிதர்கள் தான் பொய் சொல்வார்கள், வெறுப்பைக் காட்டுவார்கள். வாழ்க்கையை வடிவமைத்தது கடவுள் தான்.
இந்த உலகத்தில் வேறொரு மனிதர் உங்களை உயர்த்தி பிடிப்பார் என எதிர்பார்த்து, உங்களுக்கு கிடைக்கும் வளர்ச்சியை நம்பி சந்தோஷப்பட்டால் அது ஜோக். அப்படி ஒருவர் செய்திருந்தால் அவர் கடவுளை பின்பற்றுவதால் செய்திருப்பார். கடவுளை பின்பற்றாதவர்கள் மனதில் பல அழுக்குகளை வைத்திருப்பார்கள்.
மனிதர்கள் தங்கள் விருப்பத்திற்கு ஏற்ப பொய் சொல்வார்கள். அப்படிபட்ட மனிதர்களை நான் நம்பப்போவதில்லை" என்று அதில் குறிப்பிட்டுள்ளார்.
இதையும் படிங்க: கடவுளுக்கும் மனுஷக்கும் இடையே மதம் தேவையில்லாதது - விஜய் சேதுபதி மாஸ்டர் பேச்சு
