நாளை ஓடிடியில் வெளியாகிறது ரியோவின் ஜோ!

author img

By ETV Bharat Tamil Nadu Desk

Published : Jan 14, 2024, 5:22 PM IST

Joe OTT Release

Joe OTT Release: இயக்குனர் ஹரிஹரன் ராம் இயக்கத்தில்,ரியோ ராஜ் நடித்த ஜோ திரைப்படம் ஓடிடியில் வெளியாகும் தேதியை படக்குழு அறிவித்துள்ளது.

சென்னை: நடிகர் ரியோ, தொலைக்காட்சி நிகழ்ச்சியில் தொகுப்பாளராக இருந்து, பின்னர் சின்னத்திரை நடிகரானவர். அங்கு இல்லத்தரசிகள் மத்தியில் பிரபலமாகி, தமிழ் சினிமாவிலும் நடிகராக நுழைந்தார். பின்னர் 2019ஆம் ஆண்டு வெளியான 'நெஞ்சம் உண்டு நேர்மை உண்டு ஓடு ராஜா' படத்தின் மூலம் நாயகனாக அறிமுகமானார். அதனைத் தொடர்ந்து 'பிளான் பண்ணி பண்ணனும்' படத்தில் நடித்தார். இரண்டு படங்களும் இவருக்கு நல்ல அறிமுகத்தை பெற்றுத் தந்தது.

இதனைத் தொடர்ந்து, கடந்தாண்டு இயக்குநர் ஹரிஹரன் ராம் இயக்கத்தில் ‘ஜோ’ என்ற படத்தில் நடித்தார். இப்படத்தில் மாளவிகா மனோஜ், பாவ்யா ட்ரிகா உள்ளிட்டோர் நடித்திருந்தனர். இப்படம் வெளியாகி, இளைஞர்கள் மத்தியில் பெரும் வரவேற்பை பெற்றது. காதல் படமான இதில், சித்து குமாரின் பாடல்கள் ரசிக்க வைத்தது. மேலும் இப்படத்தில் சார்லி, அன்புதாசன் மற்றும் ஏகன் ஆகியோரும் முக்கிய கதாபாத்திரங்களில் நடித்துள்ளனர்.

ஜோ (ரியோ) எனும் இளைஞனின் வாழ்வும், அவனது காதலும், அவன் வாழ்வில் சந்திக்கும் பிரச்னைகளையும் பற்றிய கதைதான் இந்தப் படம். இப்படம் ஜோவின் வாழ்வில் குறுக்கிடும் இரு பெண்கள் பற்றியது. முதல் பாதி கல்லூரியில் காதலிக்கும் பெண்ணை பற்றியதாக இருந்தாலும், அடுத்த பாதி வாழ்க்கையின் பிற்பகுதியில் அவன் திருமணம் செய்து கொள்ளும் பெண்ணைப் பற்றியதாக அமைந்துள்ளது.

இயக்குநர் ஹரிஹரன் ராமின் வாழ்க்கையில் நடந்த நிஜ சம்பவங்களை மையமாக வைத்து எடுக்கப்பட்ட திரைப்படமாகும். இப்படத்தை டாக்டர் அருளானந்து மற்றும் மேத்யூ அருளானந்து ஆகியோர் இணைந்து தயாரித்துள்ளனர். இந்நிலையில் இப்படம் நாளை (ஜன.15) டிஸ்னி ப்ளஸ் ஹாட்ஸ்டார் ஓடிடியில் வெளியாகும் என அறிவிக்கப்பட்டுள்ளது.

இதையும் படிங்க: பொங்கல் வசூலில் கேப்டன் மில்லரை மிஞ்சிய அயலான்.. பாக்ஸ் ஆபிஸ் நிலவரம் என்ன?

ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.