சென்னை: நடிகர் விஷ்ணு விஷாலின் நடிப்பில் உருவான கட்டா குஸ்தி திரைப்படம் திரையரங்குகளில் வெற்றிகரமாக ஓடி வருகிறது. இதனையொட்டி நேற்று இந்த திரைப்படத்தின் வெற்றிக்கு நன்றி தெரிவிக்கும் விழாவானது சென்னை வடபழனியில் உள்ள தனியார் நட்சத்திர ஹோட்டலில் நடைபெற்றது.
நிகழ்ச்சியில் படக்குழுவினர் கலந்து கொண்டு பேசினர். நடிகை லிஸி பேசியபோது,”12 வருட சினிமாவில் 60க்கும் மேற்பட்ட திரைப்படங்களில் நடித்துள்ளேன். ஆனால் இந்த படத்தில் தான் முதன்முறையாக மேடையில் நின்றுள்ளேன்” என்று கண் கலங்கினார்.
நடிகர் விஷ்ணு விஷால் பேசியபோது,”நான் இங்கு நிற்பதற்குக் காரணம் பத்திரிக்கையாளர்கள் தான். என்னிடம் என் அப்பா சொன்னது இதுதான். அவர் ஒரு காவல் துறையைச் சார்ந்தவர், அவருக்கு உறுதுணையாக இருப்பது பத்திரிக்கையாளர்கள் தான் என்றார். அதனால் என்னையும் எப்போதும் பத்திரிக்கையாளர்களிடம் நட்பை வைத்திருக்கச் சொல்வார். எல்லா விதமான கருத்துக்களையும் வரவேற்கிறேன்.
இந்த கதையை முதலில் தயாரிக்கக் காரணம், ஆணும் பெண்ணும் ஒன்று எனச் சொன்ன அந்த கதை பிடித்திருந்தது. அதனால் தான் இந்த கதையைத் தயாரிக்கவும், நடிக்கவும் காரணம். எனது அக்கா தான் நான் இங்கு நிற்க காரணம். என் பையனுடைய அம்மா, எனது மனைவி போன்றோரும் முக்கிய காரணம். கண்டிப்பாக ஒரு ஆணின் வெற்றிக்குப் பெண் துணையாக நிற்பார்.
இந்த ஆண்டு எப்ஐஆர் படத்திற்குப் பிறகு இது என்னுடைய இரண்டாவது வெற்றி, எனக்கு 9 படம் தோல்வி, இந்த படங்களின் வெற்றிக்குப் பிறகு எனக்கு இப்போது 9 படங்கள் கையிருப்பு இருக்கிறது. எனக்கு மார்க்கெட் இல்லையென்று சொன்னார்கள். அதை இப்போது உடைத்திருக்கிறது இந்த படம். எனக்கான மார்க்கெட்டை வளர்த்துக் கொள்ளவே தயாரிப்பில் ஈடுபட்டேன்” என்றார்.
இதையும் படிங்க: பா.ரஞ்சித் - கலையுலகில் ஒரு கலகக்குரல்!
