மும்பை: "பியார் கா பஞ்ச்னமா" படம் மூலம் கடந்த 2011ஆம் ஆண்டு திரையுலகில் அறிமுகமான சோனாலி செய்கல் அதனை தொடர்ந்து ஹிந்தி உள்ளிட்ட பல்வேறு மொழிகளில் ஏராளமான படங்களில் நடித்துள்ளார். நடிப்பு மட்டும் இன்றி மாடலிங் துறையில் மிகுந்த ஈடுபாடு உள்ள சோனாலி செய்கலுக்கு ஏராளமான ரசிகர் பட்டாளமும் உள்ளது. இந்நிலையில் திரைப்படங்களில் பிஸியாக நடித்து வந்த சோனாலி செய்கல் கடந்த 5 வருடங்களாக தொழிலதிபரான ஆஷேஷ் எல் சஜ்னானி என்பவரை காதலித்து அவருடன் லிவிங் டுகெதர் வாழ்கையில் இருந்தார்.
இதனை தொடர்ந்து ஆஷேஷ் எல் சஜ்னானியை திருமணம் செய்துகொள்ள முடிவு செய்த சோனாலி செய்கல் இது தொடர்பான அறிவிப்பை ரகசியமாக வைத்திருந்தார். இந்நிலையில் சோனாலி செய்கல் மற்றும் ஆஷேஷ் எல் சஜ்னானி ஆகியோருக்கு நெருக்கமான உறவினர்கள் மற்றும் நண்பர்கள் முன்னிலையில் இன்று திருமணம் நடந்துள்ளது.
மும்பையில் உள்ள குருத்வாராவில் நடைபெற்ற இந்த திருமணம் தொடர்பான புகைப்படங்கள் இணையத்தில் வைரலாகி வருகிறது. மணமக்கள் இருவரும் வெள்ளை மற்றும் பிங்க் நிற ஆடையில் ஜொலிக்கும் காட்சிகள் அதில் இடம் பெற்றுள்ளன. அது மட்டுமின்றி திருமணம் நடைபெற்ற இடம் முதல் அங்கு உள்ள அலங்காரங்கள் வரை அனைத்தும் அதே பிங்க் மற்றும் வெள்ளை நிறத்தில் மிக பிரமாண்டமாக அலங்கரிக்கப்பட்டுள்ளது.
மேலும் தனது திருமணம் குறித்து பேசியுள்ள சோனாலி செய்கல், நாங்கள் இருவரும் விரும்பிய வாழ்க்கைகுள் மகிழ்ச்சியோடு நுழைந்திருக்கிறோம். எங்கள் வாழ்கையில் புதிய அத்யாயம் தொடங்கி இருக்கிறது. மேலும் இது எங்கள் தனிப்பட்ட குடும்ப நிகழ்ச்சி என்பதால் குருத்வாராவில் நடத்த வேண்டும் என குடும்பத்தினர் அனைவரும் ஆசைப்பட்டதாகவும் அதனால் திருமணத்தை அங்கே நடத்தியதாகவும் தெரிவித்துள்ளளார்.
மேலும் திருமண வாழ்த்து கூறிய அனைவருக்கும் தனது நன்றிகளை தெரிவித்துக்கொள்வதாகவும் சோனாலி தெரிவித்து உள்ளார். சோனாலி செய்கல் மற்றும் அவரது கணவர் ஆஷேஷ் எல் சஜ்னானி திருமண புகைப்படங்கள் இணையத்தில் வைரலாகியுள்ள நிலையில் திரை பிரபலங்கள், ரசிகர்கள் உள்ளிட்ட பலரும் அவர்களுக்கு வாழ்த்து தெரிவித்து வருகின்றனர்.
இதையும் படிங்க: பெரிய ஹீரோக்களுக்கான ஃபார்முலாவில் என்னால் கதை பண்ண முடியாது: பிரபல இயக்குநர்!
