'பட்டனை அழுத்தினால் காப்பாற்ற போலீஸ் வரும்'

சென்னை: காவலன் செயலி மூலம் உதவிக்கு அழைத்தால் காவல் துறை உடனடியாக உதவும் என்று சென்னை மாநகர காவல் துறை ஆணையர் ஏ.கே.விஸ்வநாதன் தெரிவித்துள்ளார்.

சென்னை மயிலாப்பூர் காமராஜர் சாலையில் உள்ள ராணி மேரி கல்லூரியில் காவலன் எஸ்.ஒ.எஸ். செயலியை சென்னை மாநகர காவல் ஆணையர் ஏ.கே. விஸ்வநாதன் தொடங்கி வைத்தார். அப்போது மாணவிகள் மத்தியில் பேசிய அவர், "ராணி மேரி கல்லூரி அருகே டிஜிபி அலுவலகம் இருக்கிறது. உங்களுக்கு பிரச்னை என்றால் முதலில் அங்கு தகவல் சென்றுவிடும்.

காவலன் எஸ்.ஒ.எஸ். செயலியை பதிவிறக்கம் செய்து கொள்ளுங்கள். உங்களுக்கு ஏதாவது சிக்கல் ஏற்பட்டால் அதிலுள்ள பட்டனை அழுத்துங்கள்; உடனே காவல்துறை உதவும். இந்த செயலி தமிழ்நாடு முதலமைச்சரால் சென்ற ஆண்டு வெளியிடப்பட்டது. இதை அனைவரும் பயன்படுத்த வேண்டும்.

பாதுகாப்பான உணர்வு இல்லையென்றால் உடனே காவலன் எஸ்.ஒ.எஸ். செயலி மூலம் தகவல் தெரிவிக்கலாம். இந்தியாவிலேயே பாதுப்பான நகரங்களாக சென்னையும் கோவையும் திகழ்கின்றன. இதுமட்டுமின்றி, அம்மா ரோந்து வாகனமும் ரோந்துப் பணியில் ஈடுபட்டுள்ளது, அவர்களிடம் உங்கள் குறைகளைச் சொல்லலாம்.

முகம் தெரியாத நபர்களோடு சமூக ஊடகங்களில் பழகுவதை தவிர்க்க வேண்டும். இதுவரை காவலன் செயலியில் நான்கு நாட்களில் ஒரு லட்சம் பேர் பதிவு செய்துள்ளனர். மேலும், தினந்தோறும் 20 ஆயிரம் பேர் பதிவிறக்கம் செய்து வருகின்றனர். இந்த எண்ணிக்கை மேலும் அதிகரிக்கும்" என்றார்

மேலும், சென்னை பெண் ஐடி ஊழியர் ஒருவருக்கு இந்த செயலி மூலம் காவல் துறையினர் உடனே உதவியதையும் அவர் சுட்டிக்காட்டினார்.

இதையும் படிங்க: திமுகவுக்கு தோல்வி பயம் - அன்புமணி ராமதாஸ் விமர்சனம்