சென்னை: மாதம் சம்பளம் வாங்கி குடும்பத்தை வழிநடத்திச் செல்லும் நடுத்தர குடும்பத்தைச் சேர்ந்தவர்களுக்குத் தான் தெரியும் மாத கடைசியில் ஏற்படும் வறுமையின் கஷ்டம். இஎம்ஐ, மருத்துவச் செலவு, உணவிற்கான செலவு, குழந்தைகளின் படிப்பிற்கான செலவு, மின்சாரக் கட்டணம், வீட்டு வாடகை என அடுக்கிக்கொண்டே போகலாம்.
எவ்வளவு பணம் வந்தாலும் வந்த இடம் தெரியாமல் அடுத்த நாளே காலியாகிவிடும். இதற்கு இடையில் எப்படிச் சேமிப்பது? என்ன செய்வது? என நம்மில் பலர் பலமுறை புலம்பி இருப்போம். உங்களுக்கான சேமிப்பை உருவாக்கவும், மாதக் கடைசியில் உணவு உள்ளிட்ட அடிப்படைத் தேவைகளுக்குக் கஷ்டப்படாத வகையிலும் ஒரு குடும்பத்திற்கான மாதாந்திர நிதிநிலையை எப்படித் திட்டமிடுவது எனப் பார்க்கலாம்.
மாதம் சம்பளம் வாங்கிய உடன் முதலில் என்ன செய்ய வேண்டும்.? சம்பளம் வாங்கிய உடன் பலரும் மேற்கொள்ளும் முதல் விஷயம் கடனை அடைப்பது மற்றும் செலவுகளை மேற்கொள்வதும்தான். இதன் காரணமாக வாழ்கையில் ஏதேனும் சிறிய அளவிலாவது முன்னேற்றம் ஏற்படுமா? எனக்கேட்டால் அது சாத்தியம் இல்லை. வாழ்க்கை மாத சம்பளத்தை நம்பி மட்டுமே நகரும். ஒரு கட்டத்தில் என்னடா இது வாழ்க்கை என்ற சலிப்பும் ஏற்படலாம். இதற்கு மாற்றாக நீங்கள் மேற்கொள்ள வேண்டியது உங்கள் சேமிப்பில் கவனம் செலுத்துவதுதான்.
சேமிப்பை எப்படி மேற்கொள்வது; மாதம் சம்பளம் வாங்கிய உடன் முதலில் அந்த சம்பளத்தில் இருந்து மூன்றில் ஒரு பங்கு அல்லது உங்களால் முடிந்த சிறிய தொகையைச் சேமிப்பிற்காக ஒதுக்க வேண்டும் அதையும் உங்கள் முதல் செலவாகவே கருத வேண்டும். கையில் சம்பளம் வாங்கிய 1 முதல் 5 நாட்களுக்குள் உங்கள் சேமிப்பு தொகையை வங்கிக் கணக்கிற்கோ அல்லது ஒரு கிராம் தங்கத்தின் அளவிற்கோ மாற்றுங்கள். அல்லது பணத்தை ஓரளவு சேமித்த பிறகு அதை வைத்து தங்கத்தில் முதலீடு செய்யுங்கள். அது சிறந்த ஒரு சேமிப்பாக இருக்கும்.
மாத செலவைப் பட்டியல் இடுங்கள்; மாதம் வீட்டிற்குத் தேவையான உணவுப் பொருட்கள், மின்சாரக் கட்டணம், இஎம்ஐ உள்ளிட்டவற்றைப் பட்டியலிட்டு அதே போல் சம்பளம் வாங்கிய 1 முதல் 5 நாட்களுக்குள் செலவு செய்து முடித்து விடுங்கள். ஒரு மாதத்திற்குத் தேவையான உணவுப் பொருட்களை மொத்தமாக வாங்கி வைப்பதன் மூலம் மாதக்கடைசியில் உணவுப் பொருளுக்கான திண்டாட்டம் வராது. அதேபோல், நீங்கள் வாங்கிய பொருளைத் தேவை இல்லாமல் வீணடிக்காமல் ஒரு மாதம் வரை செலவு செய்ய வேண்டும் என்ற உத்வேகமும் பிறகும்.
தேவையற்ற செலவைத் தவிருங்கள்; நமது அன்றாட வாழ்க்கையில் தேவையான செலவு, தேவையற்ற செலவு அல்லது நம்மால் தவிர்க்க முடியும் செலவு எனச் சிலவை இருக்கும். நீங்கள் மாதா மாதம் குடும்பத்திற்கான நிதிநிலையைக் கணக்கிட்டு மேற்கொள்ளும்போது நடைமுறையில் நீங்கள் எந்த செலவைத் தவிர்க வேண்டும் அல்லது குறைக்க வேண்டும் என்ற ஆலோசனை வரும். அதன்படி வரும் மாதங்களில் நீங்கள் முன்பு செய்த செலவைக் கொஞ்சம் குறைத்து அதையும் உங்கள் சேமிப்பு கணக்கில் போடுங்கள்.
வாழ்வியல் நடைமுறையை முடிந்த வரை எளிமையாக்குங்கள்; நாம் வாங்கும் சம்பளத்தை வைத்துச் சேமிப்பில் கவனம் செலுத்தும்போது நமது அன்றாட வாழ்வியல் நடைமுறையைக் கொஞ்சம் எளிமையாக்க வேண்டும். ஒரு புடவை லட்சங்கள் செலவு செய்தும் வாங்க முடியும் 200 ரூபாய்க்கும் வாங்க முடியும்.
நமது தேவை அறிந்து அதிகப் பணம் செலவு செய்து மேற்கொள்ளும் ஆடம்பரத்தை தவிர்க வேண்டும். நமக்கு தற்போது தேவை இல்லாத பொருள் என்றாலும் பக்கத்து வீட்டில் வைத்திருக்கிறார்கள். அல்லது நமது நண்பர்கள் வாங்கி இருக்கிறார்கள். வீட்டில் இந்த பொருள் இல்லை என்றால் வீட்டிற்கு வருபவர்கள் நம்மை என்ன நினைப்பார்கள் என நினைத்து பணத்தை வீணடிக்க வேண்டாம். கடன் வாங்குவதை முடிந்தவரை தவிர்க்கவும், நேரத்தை வீணடிக்காமல் அதையும் பணமாக மாற்ற உங்கள் சூழலுக்கு ஏற்றார்போல் வேலைகள் இருந்தால் அதையும் பார்ப்பது சிறந்தது.
உலகப்புகழ் பெற்ற முதலீட்டாளரான வாரன் பஃப்பெட் "தேவையற்றதை வாங்கினால் தேவையானவற்றை விற்க நேரிடும்" என்கிறார். இதனை நினைவில் கொண்டாலே உங்களின் பெரும்பாலான சிக்கல்களிலிருந்து வெளியே வந்துவிட முடியும்.
இதையும் படிங்க: ஒரே வாரத்தில் ரூ.1000 வரை குறைந்த தங்கம்.. இன்றைய விலை நிலவரம் என்ன?
