புலந்தசகர்: உத்தரபிரதேச மாநிலத்தில் ஆழ்குழாய் கிணற்றில் இருக்கும் மோட்டாரில் ஏற்பட்ட பழுதை சரிசெய்வதற்காக மூன்று பேர் கிணற்றில் இறங்கிய நிலையில் மூவரும் விஷவாயு தாக்கி உயிரிழந்தனர். புலந்தசகர் மாவட்டத்தில் உள்ள ஜதாவுல் கிராமத்தைச் சேர்ந்தவர்கள் ஹன்ஸ்ராஜ், அனில் மற்றும் கைலாஷ்.
மூவரும் விவசாய தொழில் செய்து வரும் நிலையில், அவர்களது ஆழ்குழாய் கிணற்றில் இருக்கும் மோட்டாரில் ஏற்பட்ட பழுதை சரி செய்வதற்கான பணியில் ஈடுபட்டு உள்ளனர். அப்போது, அதில் ஒருவர் மட்டும் கிணற்றுக்குள் இறங்கியதாக தெரிகிறது. அப்போது அவருக்கு மூச்சு திணறல் ஏற்பட்டுள்ளது.
உடனடியாக அவர் மற்ற இருவர்களை அழைத்துள்ளார். உடனடியாக அவர்களும் கிணற்றில் இறங்கி மீட்கும் பணியில் ஈடுபட்டனர். ஆனால், அவர்களையும் விஷ வாயு தாக்கியதாக சொல்லப்படுகிறது. இதில், மூவரும் சம்பவ இடத்திலேயே உயிரிழந்தனர். இது குறித்து தகவலறிந்து சம்பவ இடத்திற்குச் சென்ற காவல் துறையினர், உயிரிழந்தவர்களின் உடல்களை மீட்டு உடற்கூராய்வுக்காக மருத்துவமனைக்கு அனுப்பி வைத்தனர்.
தொடர்ந்து இச்சம்பவம் குறித்து வழக்குப்பதிவு செய்த காவல் துறையினர், விசாரணை நடத்தி வருகின்றனர். இதனை அறிந்த உத்தரப் பிரதேச மாநில முதலமைச்சர் யோகி ஆதித்யநாத், உயிரிழந்தவர்களின் குடும்பங்களுக்கு ஆறுதல் தெரிவித்தார். தொடர்ந்து உயிரிழந்தவர்களது குடும்பத்தினருக்கு தலா 5 லட்ச ரூபாய் நிதி உதவி வழங்குவதாக அறிவித்தார்.
இது குறித்து நீதிபதி சந்திர பிரகாஷ் சிங் கூறுகையில், "விபத்தில் உயிரிழந்தவர்களது குடும்பங்களுக்கு அரசு நிதி உதவி வழங்கவுள்ளது. இது தவிர, வரும் நாட்களில் மேலும் நிதி உதவி கொடுக்க வேண்டும் என நான் வேண்டுகோள் விடுக்கிறேன். குறிப்பாக மழைக்காலத்தில் கிணற்றில் இறங்கக் கூடாது என ஊடகங்கள் மூலம் விவசாயிகளுக்கு செய்திகள் வாயிலாக தெரிவிக்கப்பட்டுள்ளது. குறிப்பாக காலையில் விஷவாயு அதிகமாக உருவாகும் போது கிணற்றுக்குள் செல்வது ஆபத்தானது" என்றார்.
இதையும் படிங்க: UP Slap Video: சிறுபான்மை மாணவரை அறையச் சொன்ன ஆசிரியை மீது வழக்குப்பதிவு!
