டெல்லி: நாடு முழுவதும் எம்பிபிஎஸ், பிடிஎஸ், சித்தா, ஆயுர்வேதா, யுனானி, ஓமியோபதி உள்பட இளநிலை மருத்துவப் படிப்புகளுக்கு தேசியத் தகுதி மற்றும் நுழைவுத் தேர்வு (நீட்) அடிப்படையில் மாணவர் சேர்க்கை நடத்தப்படுகிறது.
ஆண்டுதோறும் மே மாதம் தேசியத் தேர்வு முகமை (என்டிஏ - NATIONAL TESTING AGENCY) சார்பில் நீட் தேர்வு நடத்தப்பட்டு வருகிறது. இதற்கிடையே, கரோனா பரவலால் கடந்த ஆண்டு நீட் தேர்வு பலமுறை ஒத்திவைக்கப்பட்டதை அடுத்து, செப்டம்பர் 13ஆம் தேதி நடத்தப்பட்டது.
இந்தாண்டு சிபிஎஸ்இ 12ஆம் பொதுத்தேர்வுகளை ஒன்றிய அரசு ரத்து செய்துவிட்ட நிலையில், மாணவர்களுக்கு மதிப்பெண் வழங்கும் பணி நடைபெற்று வருகிறது. சிபிஎஸ்இ பொதுத்தேர்வுகள் ரத்து குறித்து அறிவித்த போது, நீட் தேர்வு பற்றி அறிவிப்பு ஏதும் அரசு வெளியிடவில்லை.
இதனால், நீட் தேர்வு ரத்து செய்யப்படுமா என கேள்வியெழுந்து வந்த நிலையில், வரும் செப்டம்பர் மாதம் நீட் தேர்வு நடத்தவிருப்பதாக தகவல் வெளியாகியுள்ளது.
தேர்வு, பாடத்திட்டம், வயது வரம்பு, இட ஒதுக்கீடு, தேர்வுக் கட்டணம், தேர்வு மையங்கள் உள்ளிட்ட தகவல்கள் விரைவில் https://ntaneet.nic.in/ என்ற இணையதளத்தில் வெளியிடப்படும்.
தேதி அறிவிப்பு தொடர்பான வதந்தி
செப்டம்பர் 5ஆம் தேதி நீட் தேர்வு நடத்தப்படும் என தேசிய தேர்வு முகமை அறிவித்ததாக இணையத்தில் செய்திகள் வெளியான நிலையில், அதுபோன்ற அறிவிப்பை தாங்கள் வெளியிடவில்லை என தேசிய தேர்வு முகமை தெரிவித்துள்ளது.
