ରାଉରକେଲା: ପୋଲିସ ହେବତ ଏମିତି । ସୁନ୍ଦରଗଡ ଏସପି ସୌମ୍ୟା ମିଶ୍ର ସବୁବେଳେ ରହି ଆସିଛନ୍ତି ଚର୍ଚ୍ଚାରେ । କେତେବେଳେ ପୋଲିସର ମାତ୍ରାଧିକ ବଳ ପ୍ରୟୋଗକୁ ନେଇ ତ ଆଉ କେତେବେଳେ ନିଜର କର୍ତ୍ୟବନିଷ୍ଠ ଉଦ୍ୟମ ଲାଗି । କିନ୍ତୁ ମଙ୍ଗଳବାର ଅପରାହ୍ନରେ ଦୁର୍ଘଟଣାରେ ଗୁରୁତର ହୋଇ ରାସ୍ତାରେ ପଡ଼ିଥିବା ବ୍ୟକ୍ତିକୁ ପୋଲିସ ଗାଡ଼ିରେ ମେଡ଼ିକାଲ ନେଇଛନ୍ତି ଏସପି । ସୌମ୍ୟାଙ୍କର ଏପରି ହୃଦୟବାନ କାର୍ଯ୍ୟ ପାଇଁ ଚାରିଆଡ଼ୁ ଛୁଟୁଛି ସାବାସୀର ସୁଅ । ରାଉରକେଲା ସମେତ ସୁନ୍ଦରଗଡ ବାସୀଙ୍କ ପ୍ରଶଂସାର ପାତ୍ର ହୋଇଛନ୍ତି ଏସପି ସୌମ୍ୟା ମିଶ୍ର ।
ମଙ୍ଗଲବାର ପୋଲିସ ଗାଡ଼ିରେ ସୁନ୍ଦରଗଡ଼ରୁ ରାଜଗାଙ୍ଗପୁର ଆସୁଥିଲେ ସୌମ୍ୟା । କୁତ୍ରା ନିକଟ ବିଜୁ ଏକ୍ସପ୍ରେସରେ ସେହି ସମୟରେ ଏକ ସାଇକେଲ ଅରୋହୀଙ୍କୁ ଧକ୍କା ଦେଇଥିଲା ବାଇକ । ଫଳରେ ଗୁରୁତର ଭାବେ ଆହତ ହୋଇ ରାସ୍ତାରେ ଛଟପଟ ହେଉଥିଲେ ସାଇକେଲ ଆରୋହୀ । ହାଇୱେରେ ଅନେକ ଯାତ୍ରୀ ଯାଉଥିବା ସତ୍ତ୍ବେ କେହି ସାହାଯ୍ୟ କରିନଥିଲେ ।
ଏହି ସମୟରେ ସେଠାରେ ଏସ ପି ସୌମ୍ୟା ମିଶ୍ର ପହଞ୍ଚି ନିଜ ସରକାରୀ ପୋଲିସ ଗାଡ଼ିରେ ଆହତ ରାଜେନ୍ଦ୍ରକୁ ଚିକତ୍ସା ଲାଗି ନେଇଥିଲେ ରାଜଗାଙ୍ଗପୁର ହସ୍ପିଟାଲ । ଏପରିକି ପୋଲିସ ନିଜ ପୋଷାକ ଉପରେ ଯେଉଁ ରକ୍ଷା ଜ୍ୟାକେଟ ପିନ୍ଧିଥାଏ ତାକୁ ଷ୍ଟ୍ରେଚର ଭାବେ ବ୍ୟବହାର କରିଥିଲେ । ପ୍ରଥମେ ନିଜ ଗାଡ଼ିରେ କୁତ୍ରା ହସ୍ପିଟାଲ ଆଣି ପରେ ରାଜଗଙ୍ଗପୁର ଆଣିଥିଲେ । ସେଠାରେ ଚିକିତ୍ସା ସମୟରେ ରାଜେନ୍ଦ୍ରଙ୍କର ମୃତ୍ୟ ହୋଇଥିବାବେଳେ, ଦୁଇ ବାଇକ ଅରୋହୀ ରାଉରକେଲା ଆଇଜିଏଚରେ ଚିକିତ୍ସିତ ହେଉଛନ୍ତି । କିନ୍ତୁ ଦୁର୍ଘଟଣାରେ ଆହତଙ୍କୁ ତତ୍କାଳ ସାହାଯ୍ୟ କରିବା କେତେ ଜରୁରୀ ସେ ବାର୍ତ୍ତା ଦେଇଥିଲେ ଏସ ପି ସୌମ୍ୟା ମିଶ୍ର । ପୋଲିସ ଏସପି ଙ୍କ ଏହି କାର୍ଯ୍ୟ ସମଗ୍ର ଜିଲ୍ଲାରେ ଚର୍ଚ୍ଚା ସାଜିଥିବାବେଳେ ସଭିଙ୍କ ମୁହଁରେ ସୌମ୍ୟାଙ୍କ ପ୍ରଶଂସା ।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
