ସୁନ୍ଦରଗଡ: ଜିଲ୍ଲାର ଦମାଲୁ ଗ୍ରାମରେ ଅଜଣା ରୋଗ ଆତଙ୍କ । ଅନୁଧ୍ୟାନ ପାଇଁ ଜିଲ୍ଲା ମୁଖ୍ୟ ଚିକିତ୍ସାଳୟରେ ପହଞ୍ଚିଲା ମେଡିକାଲ ଟିମ୍ । ଗତ ୨୧ତାରିଖ ଦିନ ଜିଲ୍ଲାର ଦମାଲୁ ଗ୍ରାମରେ ଦୁଇ ଦୁଇ ଜଣ ନିଷ୍ପାପ ଶିଶୁଙ୍କର ଅଜଣା ରୋଗରେ ଜୀବନ ଯାଇଥିଲା । ଏଥି ସହ ମୃତ ଶିଶୁଙ୍କର ମା’ ଓ ଦେଢ ବର୍ଷ ବୟସର ସାନ ଭାଇ ଗୁରୁତର ଅବସ୍ଥାରେ ଲହୁଣୀପଡା ଚିକିତ୍ସାଳୟରେ ଭର୍ତ୍ତି ହେବା ସାରା ଅଞ୍ଚଳକୁ ସ୍ତବ୍ଧ କରିଥିଲା । ଏନେଇ ଖବର ପ୍ରସାରଣ ପରେ ଗତକାଲି ସୁନ୍ଦରଗଡ ମୁଖ୍ୟ ଜିଲ୍ଲା ଚିକିତ୍ସାଧୀକାରୀ ଡାକ୍ତର ସରୋଜ କୁମାର ମିଶ୍ର , ଲହୁଣୀପଡା ମେଡିକାଲ ଅଫିସର ଡାକ୍ତର ଚିନ୍ମୟ କୁମାର ସାହୁ ଓ କେତେକ ମେଡିକାଲ ଷ୍ଟାଫ୍ ଦମାଲୁରେ ପହଞ୍ଚି ସ୍ଥାନୀୟ ଲୋକଙ୍କର ସ୍ୱାସ୍ଥ୍ୟ ପରୀକ୍ଷା ନିରୀକ୍ଷା ଆରମ୍ଭ କରିଥିଲେ ।
ହେଲେ ଏନେଇ କିଛି ନିର୍ଯ୍ୟାସ ବାହାରି ନଥିବା ବେଳେ ମୃତକଙ୍କ ଦେହର କିଛି ଅଂଶକୁ ଡାକ୍ତରୀ ପରୀକ୍ଷା ନିରୀକ୍ଷା ପାଇଁ ପଠାଯାଇଥିବା କଥା ଲହୁଣୀପଡା ମେଡିକାଲ ଅଫିସର କହିଛନ୍ତି । ତେବେ ଅସୁସ୍ଥ ହୋଇଥିବା ମା’ ଓ ଶିଶୁ ପିୁତ୍ରଙ୍କ ନିକଟରେ ଜ୍ୱର ଥିବା ବେଳେ ସେମାନଙ୍କ ଅବସ୍ଥାରେ ସୁଧାର ଆସୁଥିବା କଥା ଜଣାପଡିଛି । ତେବେ ଏହି ଅଭାବନୀୟ ଘଟଣା ଘଟିଥିଲେ ମଧ୍ୟ ସଂପୃକ୍ତ ପରିବାରର କେହି ଘଟଣା ଘଟିବା ପୂର୍ବରୁ ଡାକ୍ତରଖାନା କିମ୍ବା ଡାକ୍ତରଙ୍କ ପରାମର୍ଶ ନେଇ ନଥିବା କଥା ଲହୁଣୀପଡା ମେଡିକାଲ ଅଫିସର କହିଛନ୍ତି । ତେବେ ମୃତ୍ୟୁର କାରଣ ଜଣାପଡିନଥିଲେ ମଧ୍ୟ ଘରୋଇ ଚିକିତ୍ସା ବା ରୋଗ ନ ଚିହ୍ନି ଚିକିତ୍ସା କରାଇବା ଓ ଅନ୍ଧ ବିଶ୍ୱାସର ସହାୟତା ନେବା ରୁ ଦୁଇ ଶିଶୁଙ୍କ ମୃତ୍ୟୁ ହୋଇଥିବା ଅନ୍ୟତମ କାରଣ ବୋଲି ଜଣା ପଡିଛି ।
ସୁନ୍ଦରଗଡରୁ ହରିହର ଦାସ ମହାପାତ୍ର, ଇଟିଭି ଭାରତ
