ସୁନ୍ଦରଗଡ: ଭୁଲିଗଲେ ମାନବିକତା, ହରାଇବସିଲେ ହିତାହିତ ଜ୍ଞାନ । କୁକୁଡା ବୋଝେଇ ଗାଡି ଓଲଟି ପଡିବା ପରେ ଲୋକେ କୁକୁଡା ବୋହିନେବାରେ ବ୍ୟସ୍ଥ ରହିଲେ । ହେଲେ ଦୁର୍ଘଟଣାର ଶିକାର ହୋଇଥିବା ଡ୍ରାଇଭରଙ୍କ ଅବସ୍ଥା କେହିବୁଝିଲେନି । ପୋଲିସ ପହଞ୍ଚି ଆମ୍ବୁଲାନ୍ସ ଯୋଗେ ଡ୍ରାଇଭରଙ୍କୁ ଡାକ୍ତରଖାନାରେ ଭର୍ତ୍ତି କରିଛି । ଏପରି ଏକ ଘଟଣା ସୁନ୍ଦରଗଡରେ ଦେଖିବାକୁ ମିଳିଛି ।
ସୂଚନା ଅନୁଯାୟୀ ଜିଲ୍ଲା ସ୍ଥିତ ସଦର ଥାନା ଅନ୍ତର୍ଗତ ଭେଡାବାହାଲ କୁଲକୁଲା ଜଙ୍ଗଲ ନିକଟରେ ଏକ କୁକୁଡା ବୋଝେଇ ଗାଡି ଦୁର୍ଘଟଣାଗ୍ରସ୍ତ ହୋଇ ଓଲଟି ପଡିଥିଲା । ଦୁର୍ଘଟଣା ପରେ ସ୍ଥାନୀୟ ଲୋକେ ଡ୍ରାଇଭରଙ୍କ ଅବସ୍ଥା ନଦେଖି କୁକୁଡା ସବୁ ବୋହି ନେଇଯିବାର ଦୃଶ୍ୟ ଦେଖିବାକୁ ମିଳିଛି ।
ଏପରିକି ଲୋକେ ବ୍ୟାଗ, ବସ୍ତା ଆଦିରେ କୁକୁଡା ବୋହି ନେଇ ଯାଇଛନ୍ତି । କାହାରି ଆଖିକୁ ଡ୍ରାଇଭରଙ୍କ ଅବସ୍ଥା ଦେଖାଯାଇନଥିଲା । ସମସ୍ତେ କୁକୁଡା ନେବାରେ ବ୍ୟସ୍ତ ଥିଲେ । ଏହିସମୟରେ କିଛି ଲୋକେ ଭିଡିଓ ସୁଟ୍ ମଦ୍ୟ କରିଛନ୍ତି, ଯାହା ସୋସିଆଲ ମିଡିଆରେ ଭାଇରାଲ୍ ହେଉଛି । ଅନ୍ୟପଟେ ପୋଲିସ ଘଟଣାସ୍ଥଳରେ ପହଞ୍ଚି ଆମ୍ବୁଲାନ୍ସ ଯୋଗେ ଡ୍ରାଇଭରଙ୍କୁ ସୁନ୍ଦରଗଡ ମୁଖ୍ୟଚିକିତ୍ସାଳୟରେ ଭର୍ତ୍ତି କରିଛି
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
