ସୁବର୍ଣ୍ଣପୁର:ବିନିକା ବନାଞ୍ଚଳର ସିଂହୀଯୁବା ସେକ୍ସନ ସଂରକ୍ଷିତ ଜଙ୍ଗଲରେ ବ୍ୟାପକ ପରିମାଣରେ ଗଛ କଟା ଚାଲିଛି। ବନ ବିଭାଗ ପୁରୁଣା ଜଙ୍ଗଲର ପୁନଃରୁଦ୍ଧାର କରି ନୂତନ ଜଙ୍ଗଲ ସୃଷ୍ଟି କରାଯାଇଥିଲା। ଏହି ସେକ୍ସନ ଅଧୀନରେ କିଛି ନୂଆ ଚାରା ଲଗାଯାଇଥିଲା ।
ତେବେ ଗଛ ଗୁଡିକ ଆଖି ଦୃଶିଆ ହେବା ପରେ କିଛି ଅସାମାଜିକ ଲୋକ ବ୍ୟାପକ ପରିମାଣରେ ଗଛ କାଟି ଚାଲିଛନ୍ତି। ଗଛ ବେପାରୀ ମାନେ ବଳୀ ଗୁଡ଼ିକ କାଟି ଜଙ୍ଗଲରେ ହିଁ ସାଇତି ରଖୁଛନ୍ତି । ତେବେ ସମୟ ସୁବିଧା ଦେଖି ଜଙ୍ଗଲରୁ ବଳୀ ଗୁଡିକ ପାର କରୁଥିବା ଜଣାପଡିଛି।
ଏହି ବେଆଇନ ଗଛ କଟା ଓ ବେପାରର କିଛି ବନ ବିଭାଗର କର୍ମଚାରୀ ସାମିଲ ହୋଇଥିବା ଅଭିଯୋଗ ହେଉଛି । ତୁରନ୍ତ ବନ ବିଭାଗ ସକ୍ରିୟ ହୋଇ ଜଙ୍ଗଲର ସୁରକ୍ଷା କରିବା ସହିତ ଦୋଷୀ ବନ କର୍ମଚାରୀ ମାନଙ୍କ ଉପରେ କାର୍ଯ୍ୟାନୁଷ୍ଠାନ ନନେଲେ ଏହାର ପ୍ରତିବାଦରେ ଆନ୍ଦୋଳନ କରାଯିବ ବୋଲି ସ୍ବେଚ୍ଛାସେବୀ ବଳଦେବ ବେଦବାଗ କହିଛନ୍ତି।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା ,ଇଟିଭି ଭାରତ