ସୁବର୍ଣ୍ଣପୁର: ସୁବର୍ଣ୍ଣପୁର ଜିଲ୍ଲା ଯାଲୋଏ ଗାଁର ବଳଭଦ୍ର ସିଂହ । ପରିବାର କହିଲେ 5 ପ୍ରାଣୀ କୁଟୁମ୍ବ । ଦିନ ମଜୁରିଆ ଭାବେ କାର୍ଯ୍ୟ କରି ସେ ନିଜ ପରିବାର ପ୍ରତିପୋଷଣ କରନ୍ତି । ହେଲେ ବିଧିର ବିଧାନ ଥିଲା କିଛି ଅଲଗା । ଗତ 6 ମାସ ତଳେ ପରିବାରର ଏକମାତ୍ର ରୋଜଗାରକ୍ଷମ ବ୍ୟକ୍ତି ପାଦରେ ପଡିଯାଇଥିଲା ବେଡି । ଆଉ ସେବେଠୁ ତାଙ୍କୁ ଘାରିଛି ନିଜ ପରିବାର ଚିନ୍ତା ।
ଆଜିକୁ 6 ମାସରୁ ଅଧିକ ଦିନ ହେବ ଶଯ୍ୟାଶାୟୀ ବଳଭଦ୍ର । କଣ କରିବେ, କେମିତି ପରିବାର ଚଳିବ । ଏମିତି ଅନେକ ପ୍ରଶ୍ନ ତାଙ୍କ ଆଖି ସାମ୍ନାରେ । ଏହି ଚିନ୍ତାକୁ ଦୃଷ୍ଟିରେ ରଖି ସେ ସୁସ୍ଥ ହେବାକୁ ସବୁ ପ୍ରକାର ଚେଷ୍ଟା କରିଛନ୍ତି । ଏଥିପାଇଁ ଆର୍ଥିକ ସମ୍ବଳ ଭାବେ ଥିବା ଏକମାତ୍ର ପୈତୃକ ଘରକୁ ବିକି ସୋନପୁର, ସମ୍ବଲପୁର, ଭୁବନେଶ୍ବର ପରେ କଟକ କର୍କଟ କେନ୍ଦ୍ରରେ ନିଜର ଚିକିତ୍ସା କରାଇଛନ୍ତି । ହେଲେ ସମ୍ପୂର୍ଣ୍ଣ ସୁସ୍ଥ ହେବା ପାଇଁ ଆବଶ୍ୟକ ଲକ୍ଷାଧିକ ଟଙ୍କା । ଆଉ ସେହି ଅର୍ଥାଭାବ ଯୋଗୁଁ ତାଙ୍କ ଘରେ କେବେ ଚୁଲି ଜଳୁଛି ତ ଆଉ କେତେବେଳେ ଭୋକ ଉପାସରେ ଦିନ କାଟୁଛନ୍ତି ସାରା ପରିବାର । ଏମିତିରେ ସେ ଏତେ ଟଙ୍କା ଦେଇ ନିଜର ଚିକିତ୍ସା କରିବେ ବା କେମିତି ।
ମାତ୍ର ଏତିକିରେ ଥମିନି ବଳଭଦ୍ରଙ୍କ ଦୁଃଖ । ପ୍ରତି 15 ଦିନରେ ରକ୍ତ ନେବା ପାଇଁ ପତ୍ନୀଙ୍କ ଗହଣା ଠୁ ବାସନକୁସନ ସବୁକିଛି ବିକି ସାରିଛନ୍ତି । ଆଉ ଏବେ ଘରୁ ମୁଖ୍ୟ ଚିକିତ୍ସାଳୟକୁ ଆସି ରକ୍ତ ଚଢାଇବାକୁ ବି ପାଖରେ ସମ୍ବଳ ନାହିଁ । ରାଜ୍ୟ ସରକାର ଗରିବଙ୍କ ଚିକିତ୍ସା ପାଇଁ ବିଜୁ ସ୍ବାସ୍ଥ୍ୟ କଲ୍ୟାଣ ପରି ଯୋଜନା କରିଛନ୍ତି । ହେଲେ ସରକାରଙ୍କ ଏହି ଯୋଜନା ବଳଭଦ୍ରଙ୍କ ପାଇଁ ମୂଲ୍ୟହୀନ ହୋଇଯାଇଛି । ଅନ୍ୟପଟେ ରୋଗୀ ଡାକ୍ତରଖାନା ଆସିଲେ ମାଗଣାରେ ଚିକିତ୍ସା ହେବ ବୋଲି କହିଛନ୍ତି ଜିଲ୍ଲା ମୁଖ୍ୟ ଚିକିତ୍ସାଧିକାରୀ ।
ନିଜ ପରିବାର ପୋଷିବା ଚିନ୍ତାରେ ସୁସ୍ଥ ଜୀବନ କାମନା କରୁଥିବା ବଳଭଦ୍ର କେବେ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରେ ଅନ୍ତର୍ଭୂକ୍ତ ହେବେ ସେନେଇ ଦିନ ଗଣୁଛନ୍ତି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
