ରାୟଗଡା: ମହାମାରୀ କୋରୋନାର ଦ୍ବିତୀୟ ଲହରରେ ରାୟଗଡ ଜିଲ୍ଳାରେ ଦିନକୁ ଦିନ ବୃଦ୍ଧି ପାଉଥିବା ସଂକ୍ରମିତ ଓ ମୃତକଙ୍କ ସଂଖ୍ୟାରେ ବ୍ରେକ୍ ଲଗାଇବା ପାଇଁ ଜିଲ୍ଳା ପ୍ରଶାସନ ପକ୍ଷରୁ ଯଥାସମ୍ଭବ ପ୍ରୟାସ ଜାରି ରଖାଯାଇଛି । ଲକଡାଉନ ସମୟରେ କଟକଣାକୁ କଡାକଡି ଭାବେ ପାଳନ ନ କଲେ ଆଗାମୀ ଦିନରେ ଜିଲ୍ଳାରେ ସ୍ଥିତି ଵିଗିଡିପାରେ । ତେଣୁ ସର୍ତକତା ଓ ସାବଧାନତା ଅବଲମ୍ବନ କରି ନିଜେ ବଞ୍ଚନ୍ତୁ,ନିଜ ପରିବାରକୁ ବଞ୍ଚାନ୍ତୁ ଏବଂ ଅନ୍ୟଙ୍କୁ ସୁରକ୍ଷିତ ରଖିବାରେ ସହଯୋଗ କରିଲେ ଜିଲ୍ଳାରେ କୋରୋନା ସଂକ୍ରମଣ ବୃଦ୍ଧି ପାଇବ ନାହିଁ ବୋଲି ଜିଲ୍ଳାପାଳ ସରୋଜ କୁମାର ମିଶ୍ର ଜିଲ୍ଳାବାସୀଙ୍କୁ ଏକ ଭିଡିଓ ମାଧ୍ୟମରେ ବାର୍ତା ଦେଇଛନ୍ତି ।
ଜିଲ୍ଳାରେ କୋଭିଡ ପରିଚାଳନା ନିମନ୍ତେ କୋରୋନାରେ ଆକ୍ରାନ୍ତଙ୍କ ଚିକିତ୍ସା ନିମନ୍ତେ ଆବଶ୍ୟକତା ଅନୁଯାୟୀ ବ୍ୟବସ୍ଥା କରାଯାଇଥିବା କୋଭିଡ ହସ୍ପିଟାଲ, ସିସିସି,ଟିଏମସି, ଆମ୍ବୁଲାନ୍ସ,ଅକ୍ସିଜେନ୍ ଆଦି ବିଷୟଗୁଡିକ ଉପରେ ଜିଲ୍ଳାର ସ୍ଥିତିକୁ ନେଇ ବିସ୍ତୃତ ସୂଚନା ପ୍ରଦାନ କରିଛନ୍ତି । ଜିଲ୍ଳାରେ ଆଜି ମୋଟ ୧୫୮ଜଣ ସଂକ୍ରମିତ ଚିହ୍ନଟ ହୋଇଥିବା ବେଳେ ଗତ ମେ’୧ ତାରିଖରୁ ଆଜି ପର୍ଯ୍ୟନ୍ତ ୯ ଦିନ ମଧ୍ୟରେ ୧୩୭୪ଜଣ ଚିହ୍ନଟ ହୋଇଛନ୍ତି ଏବଂ ଗତ ଏପ୍ରିଲ ମାସରୁ ଆଜି ପର୍ଯ୍ୟନ୍ତ ୨୪ ଜଣ ମୃତ୍ୟୁବରଣ କରିଛନ୍ତି । ଫଳରେ ସଂକ୍ରମଣ ପଜିଟିଭ୍ ହାର ୧୬.୦୯ ପ୍ରତିଶତ ରହିଛି । ଯାହାକି କୋରୋନାର ପ୍ରଥମ ଲହରରେ ଗତବର୍ଷ ଅଗଷ୍ଟ ମାସରେ ନେଇଥିବା ପିକ୍ ସମୟରେ ସଂକ୍ରମଣ ହାର ୧୭.୩୦ ରହିଥିଲା ଏବଂ ଏଥିରେ ୩୫୬୧ଜଣ ଚିହ୍ନଟ ହୋଇଥିଲେ ଏବଂ ୧୯ ଜଣଙ୍କ ମୃତ୍ୟୁ ହୋଇଥିଲା । ଚଳିତ ମେ’ମାସରେ ଏହି ସଂକ୍ରମଣ ହାର ଅଗଷ୍ଟ ମାସର ସଂକ୍ରମଣ ହାରର ପାଖାପାଖି ରହିଛି ।
ବର୍ତମାନ ଆନ୍ଧ୍ର-ତେଲଙ୍ଗାନାରେ ଚିହ୍ନିଟ ଷ୍ଟ୍ରେନ୍ ଅଧିକ ମାରାତ୍ମକ ଥିବାରୁ ସମସ୍ତେ କୋରୋନା କଟକଣାକୁ ମାନି ଚିଳବା ସହ ଘରୁ ବାହାରକୁ ବାହାରିଲେ ୨ ସ୍ତରର ମାସ୍କ ବ୍ୟବହାର କରିବା ,ସାମାଜିକ ଦୂରତା ରକ୍ଷା କରିବା ସହ ହାତକୁ ନିୟମିତ ସାନିଟାଇଜ କରିବା ଉପରେ ଜିଲ୍ଳାପାଳ ଗୁରୁତ୍ବାରୋପ କରିଛନ୍ତି । ସେହିପରି ଜିଲ୍ଳାର ଜେକେପୁର ଠାରେ ଥିବା ଏକମାତ୍ର କୋଭିଡ ହସ୍ପିଟାଲରେ କୋରୋନା ରୋଗୀଙ୍କ ଚିକିତ୍ସା ନିମନ୍ତେ ୧୧ଠଟି ଶଯ୍ୟାର ବ୍ୟବସ୍ଥା ରହିଥିବା ବେଳେ ଏଥିରେ ଅକ୍ସିଜେନ୍ ପ୍ରଦାନ ବ୍ୟବସ୍ଥା ସହ ୪ ଗୋଟି ଭେଣ୍ଟିଲେଟର କକ୍ଷର ବ୍ୟବସ୍ଥା ରହିଛି । ଜିଲ୍ଳାରେ ବତର୍ମାନ ୮ ଟି ସିସିସିରେ ୧୪୮୦,୩୭ଟି କ୍ଳଷ୍ଟର ଟିଏମସିରେ ୨୮୫୦ଟି ଓ ୮୬ଟି ଟିଏମସିରେ ୪୩୦୭ଟି ସମୁଦାୟ ୮୭୪୭ଟି ଶଯ୍ୟା ଉପଲବ୍ଧ ରହିଛି । ଏଥିମଧ୍ୟରୁ ବର୍ତମାନ ସୁଦ୍ଧା ୨୪୪ଟି ଶଯ୍ୟା ବ୍ୟବହାର ହେଉଥିବା ବେଳେ ୮୫୦୩ଟି ଶଯ୍ୟା ବ୍ୟବହାର ଉପଯୋଗୀ ପାଇଁ ବଳକା ରହିଛି । ସେହିପରି ଜିଲ୍ଳାରେ ସଂକ୍ରମିତଙ୍କ ଚିହ୍ନଟ ହେବା ପରେ ୧୦୮ଟି ସ୍ଥାନରେ ମାଇକ୍ରୋ କନଟେନମେଂଟ ଜୋନ ଘୋଷଣା କରାଯାଇଛି । ରାୟଗଡ ଓ ଗୁଣପୁର ପୈାରାଞ୍ଚଳରେ ୨ଟି ଏବଂ ସମସ୍ତ ୧୧ଗୋଟି ବ୍ଳକରେ ୩ଟି ଲେଖାଁଏ ମୋଟ ୩୫ ଟି ଆରଆରଟି ଟିମ୍ ଗଠନ କରାଯାଇ ସେବା ଯୋଗାଇ ଦିଆଯାଉଛି ।
ଜିଲ୍ଳାରେ ୯୨ ପ୍ରତିଶତ ହାରରେ ୧୨୯୩ ଜଣ କୋରୋନା ଆକ୍ରାନ୍ତ ରୋଗୀ ହୋମ ଆଇସୋଲେସନ୍ରେ ରହି ଚିକିତ୍ସିତ ହେଉଛନ୍ତି । ଜିଲ୍ଳାରେ କୋରୋନା ଆକ୍ରାନ୍ତଙ୍କୁ ଜରୁରୀକାଳନୀ ଚିକିତ୍ସା ସେବା ଯୋଗାଇ ଦେବା ପାଇଁ ଅକ୍ସିଜେନ୍ ସରଞ୍ଜାମ ଉପଲବ୍ଧ ବିଶିଷ୍ଠ ୪୪ ଗୋଟି ଆମ୍ବୁଲାନ୍ସକୁ ପ୍ରସ୍ତୁତ ରଖାଯାଇ କାର୍ଯ୍ୟରେ ବ୍ୟବହାର କରାଯାଉଛି। ଲକଡାଉନ ଓ ଚଢାଉକୁ ଏଡାଇବା ପାଇଁ ହେଲେ ସମେସ୍ତ ଜନଗହଳି ଠାରୁ ଦୂରେଇ ରହିବା,ଲକଡାଉନ ନିୟମକୁ ପାଳନ କରିବା,ମାସ୍କର ବ୍ୟବହାର କରିବା ଏବଂ ଜ୍ବର,କାଶ,ଥଣ୍ଡା ଭଳି କୈାଣସି ଲକ୍ଷଣ ଦେଖାଗଲେ ତରୁନ୍ତ ଚିକିତ୍ସା ନିମେନ୍ତ ନିୟନ୍ତ୍ରଣକୁ କକ୍ଷକୁ ଯୋଗାଯୋଗ କରନ୍ତୁ ବୋଲି ଜିଲ୍ଳାପାଳ କହିଛନ୍ତି ।
ରାୟଗଡାରୁ ରଞ୍ଜନ କୁମାର ରଥ,ଇଟିଭି ଭାରତ
