ପୁରୀ: ସତ୍ୟବାଦୀ ବିଜେଡି ବିଧାୟକ ଉମାକାନ୍ତ ସାମନ୍ତରାୟ ଏବେ ବିବାଦ ଘେରରେ । ତାଙ୍କର ଏକ ଅଡିଓ କ୍ଲିପ୍ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଯେଉଁଥିରେ ଅଭଦ୍ର ଭାଷା ପ୍ରୟୋଗ କରି ଘରୁ ଟାଣି ଆଣି ଜଣେ ବ୍ୟକ୍ତିଙ୍କୁ ମାଡ ମାରିବାକୁ ସମର୍ଥକଙ୍କୁ ନିର୍ଦେଶ ଦେଉଛନ୍ତି । ଯାହା ଟଙ୍କା ଖର୍ଚ୍ଚ ହେବ ସେ ବୁଝିବେ ବୋଲି ସମର୍ଥକଙ୍କୁ ବିଧାୟକ କହୁଥିବା ଅଭିଯୋଗ ହୋଇଛି । ଏହି ଆଡ଼ିଓ କ୍ଲିପଟି ଜଣେ ସହଯୋଗୀଙ୍କ ସହିତ ଫୋନ ଯୋଗେ ବାର୍ତ୍ତାଳାପର କ୍ଲିପ୍ ଅଟେ ।
ତେବେ କଣ ପାଇଁ ଓ କାହାକୁ ସେ ଗାଳି ଗୁଲଜ କରୁଛନ୍ତି ଓ ଆକ୍ରମଣ ପାଇଁ ନିର୍ଦ୍ଦେଶ ଦେଇଛନ୍ତି, ତାହା ଅଡିଓ କ୍ଲିପରୁ ଜଣାପଡୁନି । ତେବେ ଏହାକୁ ସତ୍ୟବାଦୀ ବିଜେପି ପକ୍ଷରୁ ସୋସିଆଲ ମିଡିଆ ସାଇଟରେ ଅପଲୋଡ଼ କରାଯାଇଛି । ଏହାସହ ଉମାକାନ୍ତ ସାମନ୍ତରାୟଙ୍କ ଗୁଣ୍ଡାଗିରିକୁ କଡା ସମାଲୋଚନା କରାଯାଇଛି ।
ତେବେ ଜଣେ ବିଧାୟକ ଏଭଳି ଅସଭ୍ୟ ଭାଷା ପ୍ରୟୋଗ କରି ଜଣଙ୍କୁ ଆକ୍ରମଣ କରିବା ପାଇଁ ନିର୍ଦେଶ ଦେବା ଏବେ ଚର୍ଚ୍ଚାର ବିଷୟ ହୋଇଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
