ପୁରୀ: ପାରିବାରିକ କଳହକୁ କେନ୍ଦ୍ରକରି ସ୍ତ୍ରୀକୁ ହତ୍ୟାକାଣ୍ଡ ଘଟଣାରେ ଧରା ପଡ଼ିଲା ଅଭିଯୁକ୍ତ ସ୍ବାମୀ । ଗତ ୨୧ ତାରିଖ ପୁରୀ ସଦର ଚନ୍ଦନପୁର ଥାନା ଅନ୍ତର୍ଗତ ରୁଆ ଗ୍ରାମରେ ରଶ୍ମିତା ବରାଳଙ୍କୁ ହତ୍ୟା କରିଥିଲା ତାଙ୍କ ସ୍ବାମୀ । ହତ୍ୟାକାଣ୍ଡ ଘଟାଇ ସ୍ବାମୀ ପ୍ରମୋଦ କୁମାର ବରାଳ ଚମ୍ପଟ ମାରିଥିବା ବେଳେ ଅଭିଯୁକ୍ତକୁ ଗିରଫ କରିବା ସହ କୋର୍ଟ ଚାଲାଣ କରାଯାଇଛି । ଘଟଣାର ସମ୍ପର୍କରେ ଏକ ପ୍ରେସମିଟ୍ କରି ସୂଚନା ଦେଇଛନ୍ତି ପୁରୀ ସଦର ଏସଡିପିଓ ରବିନାରାୟଣ ଭଞ୍ଜ ।
ରୁଆ ଗ୍ରାମ ହତ୍ୟାକାଣ୍ଡକୁ ନେଇ ପୁରୀ ସଦର ଏସଡିପିଓ ରବିନାରାୟଣ ଭଞ୍ଜ କହିଛନ୍ତି, "ପାରିବାରିକ କଳହକୁ କେନ୍ଦ୍ରକରି ଏହି ହତ୍ୟାକାଣ୍ଡ ଘଟିଛି । ହତ୍ୟା କରିଥିବା ଅଭିଯୁକ୍ତ ସ୍ବାମୀ ହେଉଛି ରୁଆ ଗ୍ରାମର ଭୁଟିଆ ଓରଫ ପ୍ରମୋଦ କୁମାର ବରାଳ। ହତ୍ୟାକାଣ୍ଡରେ ବ୍ୟବହୃତ କଟୁରୀକୁ ପୋଲିସ ଜବତ କରିଥିବା ବେଳେ ଅଭିଯୁକ୍ତ ପ୍ରମୋଦକୁ ଚନ୍ଦନପୁର ଥାନା ପୋଲିସ ଗିରଫ କରି କୋର୍ଟ ଚାଲାଣ କରିଛି । ଉଭୟ ପ୍ରେମ ବିବାହ କରିଥିଲେ । ମାତ୍ର ବିବାହ ପରଠୁ ଉଭୟ ସ୍ବାମୀ-ସ୍ତ୍ରୀଙ୍କ ମଧ୍ୟରେ ପାରିବାରିକ କଳହକୁ କେନ୍ଦ୍ରକରି ଝଗଡ଼ା ଲାଗି ରହୁଥିଲା । ସ୍ଵାମୀ ପ୍ରମୋଦ ସବୁବେଳେ ନିଶା ସେବନ କରୁଥିବାରୁ ଏହାକୁ ନେଇ ଉଭୟଙ୍କ ମଧ୍ୟରେ ସବୁବେଳେ ଝଗଡ଼ା ଲାଗି ରହିଥିଲା । ଏଥିପାଇଁ ସ୍ବାମୀ ସ୍ତ୍ରୀ ମଧ୍ଯରେ ତିକ୍ତତା ବୃଦ୍ଧି ପାଇଥିଲା ।"
ଏହା ବି ପଢ଼ନ୍ତୁ: ପୂର୍ବ ଶତ୍ରୁତାକୁ କେନ୍ଦ୍ର କରି ବୀଭତ୍ସ କାଣ୍ଡ, ମହିଳାଙ୍କୁ ନିର୍ମମ ହତ୍ୟା
ଗତ ୨୧ ତାରିଖରେ ସ୍ଵାମୀ ସ୍ତ୍ରୀ ମଧ୍ଯରେ ଏହି ବିବାଦ ଉଗ୍ର ରୂପ ଧାରଣ କରିଥିଲା । ପାରିବାରିକ କଳହକୁ ନେଇ ସ୍ବାମୀ ପ୍ରମୋଦ ଉତ୍ତେଜିତ ହୋଇଯାଇଥିଲେ। ରଶ୍ମିତା ତାଙ୍କ ଦୋକାନରେ ବସିଥିବା ସମୟରେ ତାଙ୍କ ପ୍ରମୋଦ ତାଙ୍କୁ ବାହାରକୁ ଟାଣି ଆଣି ମାର୍ପିଟ୍ କରିବା ସହ ଧାରୁଆ ଅସ୍ତ୍ରରେ ଆକ୍ରମଣ କରିଥିଲା । ଫଳରେ ଘଟଣାସ୍ଥଳରେ ହିଁ ରଶ୍ମିତାଙ୍କ ମୃତ୍ୟୁ ଘଟିଥିଲା । ହତ୍ୟାକାଣ୍ଡ ପରେ ଅଭିଯୁକ୍ତ ପ୍ରମୋଦ ଫେରାର ଥିବାବେଳେ ଚନ୍ଦନପୁର ଥାନା ପୋଲିସ ତାକୁ ଗିରଫ କରି କୋର୍ଟ ଚାଲାଣ କରିଛି । ଏହି ଘଟଣାକୁ ଅତ୍ୟନ୍ତ ଗୁରତ୍ୱର ସହ ନେବ ସହ ଏକ ମାସ ମଧ୍ୟରେ ଚାର୍ଜସିଟ୍ ପ୍ରସ୍ତୁତ କରି ଦୋଷୀକୁ ଉପଯୁକ୍ତ ଦଣ୍ଡ ଦିଆଯିବ ବୋଲି କହିଛନ୍ତି ପୁରୀ ସଦର ଏସଡିପିଓ ରବିନାରାୟଣ ଭଞ୍ଜ ।
ଏହା ବି ପଢନ୍ତୁ: ଫୋନ ହଜାଇ ଦେବାରୁ ସ୍ତ୍ରୀକୁ ଠେଙ୍ଗା ପିଟିପିଟି ହତ୍ୟା
ନିକଟରେ ରାଇରଙ୍ଗପୁରରେ ମଧ୍ୟ ସ୍ତ୍ରୀ ଫୋନ୍ ହଜାଇ ଦେବାରୁ ନିର୍ମମଭାବେ ସ୍ବାମୀ ହତ୍ୟା କରିଥିଲା । ମୃତ ମହିଳା ହେଉଛନ୍ତି ଗ୍ରାମର ରାମଚନ୍ଦ୍ର ସିଂଙ୍କ ସ୍ତ୍ରୀ ମୁଗୁଲି ସିଂ । ପୋଲିସ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଥିଲା ।
ଇଟିଭି ଭାରତ, ପୁରୀ
