ନୟାଗଡ଼: ଦଲାଲ ବିରୋଧରେ ଆଞ୍ଚଳିକ ପରିବହନ ଅଧିକାରୀଙ୍କ ଦୃଢ଼ କାର୍ଯ୍ୟାନୁଷ୍ଠାନ । ବିଭିନ୍ନ ବେଆଇନ କାର୍ଯ୍ୟକଳାପରେ ସମ୍ପୃକ୍ତ ଥିବା ଦଲାଲ ବିରୋଧରେ ନୟାଗଡ ଟାଉନ ଥାନାରେ ଲିଖିତ ଅଭିଯୋଗ କରିଛନ୍ତି ନୟାଗଡ ପରିବହନ ଅଧିକାରୀ । ପୋଲିସକୁ ଦେଖି ଖସି ପଳାଇଛି ଅଭିଯୁକ୍ତ ଦଲାଲ ।
ପୂର୍ବରୁ ପରିବହନ କାର୍ଯ୍ୟାଳୟରେ ଦଲାଲଙ୍କ ରାଜ ଚାଲିଥିଲା । ଏନେଇ ଗଣମାଧ୍ୟମରେ ଖବର ପ୍ରସାରଣ ହୋଇଥିଲା । ସଜାଗ ହୋଇଥିଲେ ସରକାର । ପରିବହନକୁ 5Tରେ ଅନ୍ତର୍ଭୁକ୍ତ କରାଗଲା । ଦଲାଲମାନଙ୍କ ବିରୋଧରେ ମାମଲା ରୁଜୁ କରାଗଲା । ଏହାପରେ ମଧ୍ୟ ଆରଟିଓ କାର୍ଯ୍ୟାଳୟରେ ଦଲାଲଙ୍କ ଦଲାଲି କମି ନଥିବା ଦେଖିବାକୁ ମିଳିଛି । ନୟାଗଡ଼ ପରିବହନ ଅଫିସରେ ଜଗନ୍ନାଥ ପାଣି ନାମକ ଜଣେ ଦଲାଲ ଦଲାଲି କାର୍ଯ୍ୟ ଜାରି ରଖିଥିବା ପରିବହନ ଅଧିକାରୀ ଜାଣିପାରିଥିଲେ ।
ଅଭିଯୁକ୍ତ ଜଗନ୍ନାଥ ବିଭିନ୍ନ ବେଆଇନ କାର୍ଯ୍ୟକଳାପ କରୁଥିବା ଜାଣିବା ପରେ ସଙ୍ଗେସଙ୍ଗେ ନୟାଗଡ SPଙ୍କୁ ଖବର ଦେଇଥିଲେ ନୟାଗଡ଼ ଆଞ୍ଚଳିକ ପରିବହନ ଅଧିକାରୀ । ତେବେ ପୋଲିସ ପରିବହନ କାର୍ଯ୍ୟାଳୟରେ ପହଞ୍ଚିବା ବେଳକୁ ଦଲାଲ ଖସିପଳାଇ ଯିବାରେ ସକ୍ଷମ ହୋଇଛି । ଏନେଇ ନୟାଗଡ ଟାଉନ ଥାନାରେ ଲିଖିତ ଅଭିଯୋଗ କରିଛନ୍ତି ନୟାଗଡ ପରିବହନ ଅଧିକାରୀ । ପୋଲିସ ଏହାର ତଦନ୍ତ ଜାରି ରଖିଛି ।
ଇଟିଭି ଭାରତ, ନୟାଗଡ଼
