ରାଇରଙ୍ଗପୁର: ଗ୍ରାମରେ ପଶିଲା ଆହତ ଭାଲୁ । ମୟୂରଭଞ୍ଜ ଜିଲ୍ଲା କରଞ୍ଜିଆ ବନଖଣ୍ଡ ଠାକୁରମୁଣ୍ଡା ରେଞ୍ଜ ଅନ୍ତର୍ଗତ ଖଣ୍ଡବନ୍ଧ ପୁରୁଣାପାଣି ଗ୍ରାମରେ ଏକ ଆହତ ଭାଲୁ ଦେଖିବାକୁ ମିଳିଛି । ଗ୍ରାମରେ ଆହତ ଭାଲୁକୁ ଦେଖି ଆତଙ୍କିତ ଅବସ୍ଥାରେ ଅଛନ୍ତି ସ୍ଥାନୀୟ ଲୋକେ ।
ଗାଁକୁ ପଶି ଆସିଲା ଆହତ ଭାଲୁ, ଆତଙ୍କିତ ଲୋକେ
କୌଣସି ଏକ କାରଣରୁ ଭାଲୁଟି ଆହତ ଅବସ୍ଥାରେ ଗ୍ରାମରେ ପଶି ଆସିଥିଲା । କିଛି ଲୋକେ ଆହତ ଭାଲୁଟିକୁ ଟେକା ପଥର ମାରି ଘଉଡ଼ାଇବାକୁ ଚେଷ୍ଟା କରିଥିଲେ । ଆହତ ଭାଲୁଟି ଜୀବନ ବଞ୍ଚାଇବା ପାଇଁ ଅନେକ ସମୟ ଧରି ଏଣେତେଣେ ଧାଁ ଦୌଡ଼ କରିବା ସତ୍ତ୍ବେ ବନ ବିଭାଗ ଏଥିପ୍ରତି ଦୃଷ୍ଟି ଦେଇନଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି । ବନବିଭାଗ ଜଙ୍ଗଲ ସୁରକ୍ଷା ସହିତ ବନ୍ୟଜନ୍ତୁଙ୍କ ସୁରକ୍ଷା ପାଇଁ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରୁଛି । ହେଲେ ପୁରୁଣାପାଣି ଗ୍ରାମରେ ପଶି ଆସିଥିବା ଆହତ ଭାଲୁଟିର ସୁରକ୍ଷା ନେଇ ବନବିଭାଗର କାର୍ଯ୍ୟ ଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି।
ରାଇରଙ୍ଗପୁରରୁ ସଞ୍ଜୟ କୁମାର ପରିଡ଼ା, ଇଟିଭି ଭାରତ
