ମାଲକାନଗିରି: ପଟେରୁ ଫରେଷ୍ଟ ଅଞ୍ଚଳ ପଗୁରୁକୋଣ୍ଡା ବନଖଣ୍ଡ ଅଞ୍ଚଳରେ ଗଛ କାଟୁଥିବା ସମୟରେ ବନବିଭାଗର ଚଢ଼ାଉ କରିଛି । ଗଛ କାଟୁଥିବା କାଠ ଲୁଟେରା ଫେରାର ହୋଇଯାଇଥିବା ବେଳେ ଘଟଣାସ୍ଥଳରୁ 2 ବାଇକ ସହ କରତ, ଟାଙ୍ଗିଆ ଜବତ କରିବାପରେ ସଫଳ ହୋଇଛି ବନ ବିଭାଗ । ପଟେରୁ ଫରେଷ୍ଟ ଅଞ୍ଚଳ ପଗୁରୁକୋଣ୍ଡା ବନ ସୁରକ୍ଷା ସମିତି ଠାରେ ବନବିଭାଗ ଦ୍ୱାରା ଆୟୋଜିତ ବୈଠକରେ ଜଙ୍ଗଲ ସୁରକ୍ଷା ଏବଂ ସଚେତନତା ବିଷୟରେ ଗ୍ରାମବାସୀଙ୍କ ସହ ଆଲୋଚନା ଚାଲିଥିଲା । ତେବେ ଉକ୍ତ ସମୟରେ ପଡୋଶୀ ଗ୍ରାମର କିଛି ଅସାଧୁ ବ୍ୟକ୍ତି ଗ୍ରାମର ସଂରକ୍ଷିତ ଜଙ୍ଗଲରୁ କାଠ କାଟୁଥିବା ଅଭିଯୋଗ କରିଥିଲେ ସ୍ଥାନୀୟ ଗ୍ରାମବାସୀ।
ଗ୍ରାମବାସୀଙ୍କ ଅଭିଯୋଗ ଆଧାରରେ ବନବିଭାଗ କର୍ମଚାରୀ ଓ କିଛି ଗ୍ରାମବାସୀ ମିଳିତ ଭାବେ ଚଢ଼ାଉ କରିଥଲେ । ଦୁର୍ଗମ ତଥା ପାହାଡ଼ିଆ ରାସ୍ତାରେ ୪ କିମି ବାଟ ଅତିକ୍ରମ କରିବାପରେ ଘଟଣାସ୍ଥଳରେ ପ୍ରାୟ 3 ଜଣ କାଠଚୋର ଏକ ବଡ ଗଛ କାଟୁଥିବାବେଳେ ବନବିଭାଗ କର୍ମଚାରୀଙ୍କୁ ଦେଖି ଘଟଣାସ୍ଥଳରୁ ଫେରାର ହୋଇଯିବାରେ ସଫଳ ହୋଇଛନ୍ତି । ବନ କର୍ମଚାରୀ ପିଛା କରି ସେମାନଙ୍କୁ ଧରିବାରେ ବିଫଳ ହେବା ପରେ 2 ଟି ବାଇକ ଏବଂ ଗଛ କଟାରେ ବ୍ୟବହୃତ କରତ, ଟାଙ୍ଗିଆ, ଶାବଳକୁ ଜବତ କରିବା ସହ କାଲିମେଳା ରେଞ୍ଜ ଅଫିସକୁ ନେଇ ଏକ ମାମଲା ରୁଜୁ କରିଛନ୍ତି ।
ମାଲକାନଗିରିରୁ ଦେବଦତ୍ତ ବେହେରା , ଇଟିଭି ଭାରତ
