କୋରାପୁଟ: ପାଖରେ ଥିଲା ସମ୍ବଳ, ହେଲେ ନଥିଲା ବୈଷୟିକ ଜ୍ଞାନକୌଶଳ । କୋରାପୁଟ ଜଙ୍ଗଲରେ ହେଉଥିଲା କଫି ଚାଷ, ଆଉ ଏହାକୁ ଆଦରୀ ନେଇଥିଲେ ଚାଷୀ । ହେଲେ ସେହି ସମୟରେ କଫିକୁ ପ୍ରଧାନ୍ୟ ଦିଆଯାଉନଥିଲା । ସମାୟାନୁକ୍ରମେ ବଢିଲା କଫିର ଚାହିଦା ଓ ସରକାରଙ୍କ ଦୃଷ୍ଟି ଆକର୍ଷଣ ହେଲା । କୋରାପୁଟ କଫି ଉନ୍ନୟନ ପରିଷଦ, କଫି ବୋର୍ଡ ଓ କଫି ଡେଭେଲପମେଣ୍ଟ ଟ୍ରଷ୍ଟର ମିଳିତ ପ୍ରୟାସରେ ଖୋଲାଗଲା କଫି ପ୍ରକ୍ରିୟାକରଣ ୟୁନିଟ । ତାପରେ କୋରାପୁଟ କଫି ବୋର୍ଡ ପାଇଲା ସ୍ବତନ୍ତ୍ର ପରିଚୟ । ଏବେ କୋରାପୁଟ ବ୍ରାଣ୍ଡରେ ବିକ୍ରି ହେଉଛି କଫି । କୋରାପୁଟ କଫିର ମହକରେ ମହକୁଛି ସାରା ବିଶ୍ବ । ଅପରିଚିତ କୋରାପୁଟ କଫି ପାଇଛି ବ୍ରାଣ୍ଡ ଭ୍ୟାଲିର ମାନ୍ୟତା ।
ଓଡ଼ିଶାର କୋରାପୁଟ ଅଞ୍ଚଳରେ କଫି ଚାଷ ପାଇଁ ଅନୁକୂଳ ଜଳବାୟୁ ଥିବାରୁ ଏଠାରେ ୧୯୭୧ ମସିହାରେ ଜିଲ୍ଲା ପ୍ରଶାସନ ଆନୁକୁଲ୍ୟରେ କଫି ଚାଷ ଆରମ୍ଭ କରାଯାଇଥିଲା । ଏହି ୪୮ ବର୍ଷ ମଧ୍ୟରେ କୋରାପୁଟ ଜିଲ୍ଲାର ତିନି ହଜାର ହେକ୍ଟରରୁ ଊର୍ଦ୍ଧ୍ବ ଜମିରେ କଫି ଚାଷ କରାଯାଇ ପାରିଥିବାରୁ ଜିଲ୍ଲାରେ କଫି ଚାଷର ଉନ୍ନତି ନିମନ୍ତେ କେନ୍ଦ୍ର ସରକାରଙ୍କ ଦ୍ବାରା ପ୍ରତିଷ୍ଠା ହେଲା କଫି ବୋର୍ଡ । ତାପରେ ଧିରେ ଧିରେ ଏହି ଜମିରେ ଉତ୍ପାଦିତ ହେଲା କଫି ମଞ୍ଜି । ଅନ୍ୟୁନ ତିନି ହଜାର କ୍ଷୁଦ୍ର ଚାଷୀ ତଥା ଶତାଧିକ କଫି ଉଦ୍ୟୋଗୀ ଏହି ଚାଷ କରି ଲାଭାନ୍ଵିତ ହେଲେ । ଏହି କଫି ବଗିଚା ଗୁଡିକରେ 5 ହଜାରରୁ ଊର୍ଦ୍ଧ୍ବ ଦିନ ମଜୁରିଆ ବର୍ଷ ତମାମ କାମ ପାଇଥାନ୍ତି ବୋଲି କଫି ବୋର୍ଡ ଅଧିକାରୀ ସୂଚନା ଦେଇଛନ୍ତି ।
ଉଭୟ ସରକାରୀ ଏବଂ ବେସରକାରୀ ସଂସ୍ଥାର ପ୍ରୟାସରେ କୋରାପୁଟ ଅଞ୍ଚଳରେ କଫି ଚାଷର ସମ୍ଭାବନା ଓ ଆଦିବାସୀ ବହୁଳ ଅଞ୍ଚଳରେ ଅର୍ଥନୈତିକ ବ୍ୟବସ୍ଥାରେ ଉନ୍ନତି ହୋଇପାରିଛି । କଫି ବୋର୍ଡର ବୈଷୟିକ ଜ୍ଞାନ କୌଶଳ ସାଙ୍ଗକୁ ଏହି ଗବେଷଣା କେନ୍ଦ୍ରରେ ଗାଁ ପାଖ ଜଙ୍ଗଲରେ କିପରି କଫି ଚାଷ କରିହେବ ତାହାର ପ୍ରଦର୍ଶନୀ ଚାଷୀଙ୍କୁ ଅନେକ ମାତ୍ରାରେ ପ୍ରେରଣା ଯୋଗାଇଦେଇଛି । ଏହାସହିତ ଅନେକ ଛୋଟବଡ କଫି ବଗିଚାରେ ସ୍ଥାନୀୟ ଲୋକେ କାମ ପାଇପାରିଛନ୍ତି। ଚାଷୀମାନେ ପ୍ରଥମେ ପାଚିଲା କଫି ମଞ୍ଜିକୁ ତୋଳି ସଫା କରିବା ପରେ ଚୋପା ଛଡେଇ ସୁଖେଇ ଦେଉଛନ୍ତି ।
ତାପରେ ମଞ୍ଜି ଭଲଭାବେ ସୁଖିଗଲା ପରେ ଭାଜୁଛନ୍ତି । ଏହା ଭାଜି ହେବା ପରେ ଗୁଣ୍ଡ ପ୍ରସ୍ତୁତ କରି କୋରାପୁଟ ବ୍ରାଣ୍ଡରେ ବିକ୍ରି କରାଯାଉଛି । ଏଥିଲାଗି ଜିଲ୍ଲାରେ ଅନ୍ୟୁନ 3 ହଜାର କ୍ଷୁଦ୍ର ଚାଷୀ ଲାଭାନ୍ଵିତ ହେଉଛନ୍ତି । କଫି ବଗିଚାରେ କାମ ପାଉଥିବା ଯୋଗୁଁ ସ୍ଥାନୀୟ ଯୁବକ ଯୁବତୀଙ୍କୁ ଦାଦନ ପାଇଁ ବାହାରକୁ ଯିବାକୁ ପଡୁନାହିଁ । ଜିଲ୍ଲାରେ କଫି ଦାନାର ବିକ୍ରୟ ବାର୍ଷିକ ୧୨ କୋଟି ଟଙ୍କାରୁ ଉର୍ଦ୍ଧ୍ବ ହେଉଛି । ଏବେ କୋରାପୁଟ କଫି ଭାବରେ କଫି ଗୁଣ୍ଡ ମଧ୍ୟ ରାଜ୍ୟ ତଥା ଦେଶବିଦେଶରେ ଉତ୍ତମ ବଜାର ସୃଷ୍ଟି କରିଛି ।
କମାଲ କରୁଛି କୋରାପୁଟ କଫି । ରାଜ୍ୟରେ ସର୍ବାଧିକ କଫି ଚାଷ ହେଉଥିବା ଜିଲ୍ଲାର ମାନ୍ୟତା ପାଇ କୋରାପୁଟ ଏ କ୍ଷେତ୍ରରେ ଅଗ୍ରଗତି କରିଛି । ଖାଲି କଫି ପ୍ୟାକେଟରେ ନୁହେଁ ବରଂ ରାଜ୍ୟର ସମସ୍ତ କ୍ୟାଫେରେ ମିଳୁଛି କୋରାପୁଟ କଫିର ମହକ ।
କୋରାପୁଟରୁ ସିଏଚ୍ ଶାନ୍ତାକାର, ଇଟିଭି ଭାରତ
