ଭୁବନେଶ୍ବର: ରାଜଧାନୀ ପାଓ୍ବାର ହାଉସ ଛକରେ ବାଇକକୁ ରେଞ୍ଜ ରୋଭର କାର ଧକ୍କା ଦେବା ଘଟଣା । ପରିବହନ ବିଭାଗ ଦ୍ବାରା ଜାରି ହୋଇଥିବା ଟ୍ରାଫିକ ଚାଲାଣ ଖୋଲିଲା କାରର ଗୁମର । ଥରେ ନୁହେଁ ଅନେକ ଥର ଏହି ଦାମି କାର ଭାଙ୍ଗିଛି ଟ୍ରାଫିକ ନିୟମ । ପାଓ୍ବାର ହାଉସ ଛକରେ ଦୁର୍ଘଟଣା ପୁର୍ବରୁ ଏହା କାର ତିନି ତିନି ଥର ଭାଙ୍ଗିଛି ଟ୍ରାଫିକ ନିୟମ । ବାରମ୍ବାର ଟ୍ରାଫିକ ନିୟମ ଉଲ୍ଲଘଂନ କରିଥିଲେ ମଧ୍ୟ କେବଳ ଚାଲାଣ କାଟିବା ଛଡା ଆଉ କୌଣସି ବି କାର୍ଯ୍ୟାନୁଷ୍ଠାନ ଗ୍ରହଣ କରିନି ପୋଲିସ । ଏଣୁ ପ୍ରଶ୍ନ ଉଠିଛି ଏହା କାର ମାଲିକ କିଏ । ଯେଉଁଥି ପାଇଁ କାର ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ ।
ପରିବହନ ବିଭାଗ ସୁତ୍ରରୁ ମିଳିଥିବା ତଥ୍ୟ ଅନୁସାରେ, ଏହା କାରର ଦାମ 3 କୋଟି 47 ଲକ୍ଷ 19 ହଜାର 294 ଟଙ୍କା । ଗାଡ଼ିଟି ARMOUR RAY VENTURES PVT LIMITED ନାଁରେ ୭ନଭେମ୍ବର ୨୦୨୨ରେ କିଣାଯାଇଥିଲା । ଏହା ପରେ 10 ନଭେମ୍ବର 2022ରେ ଝାରସୁଗୁଡା ଆଞ୍ଚଳିକ ପରିବହନ କେନ୍ଦ୍ରରେ ରେଜିଷ୍ଟ୍ରେସନ ହୋଇଥିଲା । ଯେଉଁ କମ୍ପାନୀର ଏହି ଗାଡ଼ିଟି ରହିଛି ସେହି କମ୍ପାନୀର ନିର୍ଦ୍ଦେଶକ ରହିଛନ୍ତି ବିଶାଲ ଦାସ । ଯିଏକି ପୂର୍ବତନ ମନ୍ତ୍ରୀ ସ୍ବର୍ଗତ ନବଦାସଙ୍କ ପୁଅ ଓ ବର୍ତ୍ତମାନର ଝାରସୁଗୁଡା ବିଧାୟିକା ଦୀପାଲି ଦାସଙ୍କ ଭାଇ ବୋଲି ଜଣାପଡିଛି । ବିଶାଲ ଦାସଙ୍କର କେବଳ ଏଇ ଗୋଟିଏ କମ୍ପାନୀ ନୁହେଁ ଅନେକ କମ୍ପାନୀର ନିର୍ଦ୍ଦେଶକ ରହିଛନ୍ତି । ମିନିଷ୍ଟ୍ରି ଅଫ କର୍ପୋରେଟ ଆଫାୟାର୍ସର ତଥ୍ୟ ଅନୁସାରେ ସେ ଡିରେକ୍ଟର ଅଫ ଆଇଡେଣ୍ଟିଫିକେସନ ନମ୍ବର 05289269 ବୋଲି ଜଣାପଡିଛି ।
ଏହା ମଧ୍ୟ ପଢନ୍ତୁ-ପାଓ୍ବାର ହାଉସ ଛକରେ ବାଇକକୁ ପିଟିଲା କାର, 2 ଗୁରୁତର
ଅନ୍ୟପଟେ କମିଶନରେଟ ପୋଲିସ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନଥିବା ବେଳେ କେବଳ ୩୧ ତାରିଖରେ ପାଓ୍ବାର ଛକରେ ଦୁର୍ଘଟଣା ଯୋଗୁଁ କ୍ୟାପିଟାଲ ଥାନାରେ ଏକ ମାମଲା ରୁଜୁ କରାଯାଇ ଗାଡି ଚଲାଉଥିବା ଡ୍ରାଇଭର ସୋଭାଗ୍ୟ କୁମାର ବାଗକୁ ଗିରଫ କରାଯାଇଛି । ଭୁଲ ନମ୍ବର ଦର୍ଶାଇ ଗାଡି ସିଜ୍ କରାଯାଇଥିବା ବେଳେ ପରେ ଏହାର ସଠିକ ଗାଡି ନମ୍ବର ଦର୍ଶାଇଥିଲା କମିଶନରେଟ୍ ପୋଲିସ ।
ଓଭର ସ୍ପିଡି ପାଇଁ ଏହି ଗାଡି ନାଁରେ ଅନେକ ଥର ପରିବହନ ବିଭାଗ କାଟିଛି ଚାଲାଣ । ଭୁବନେଶ୍ଵରରେ ପାଓ୍ବାର ହାଉସ ଛକ ସିରିଜ ଦୁର୍ଘଟଣା ଘଟାଇବା ପୂର୍ବରୁ କଟକ ଜଗତପୁର ଠାରେ ଥରେ ଏବଂ ଦୁଇ ଥର ଭୁବନେଶ୍ୱରରେ ଭାଙ୍ଗିଛି ଟ୍ରାଫିକ ନିୟମ।ତାହା ପୁଣି ଏଜି ଛକ ଭଳି ଜିରୋ ଟଲେରାନ୍ସ ଜୋନରେ । ଏଥିପାଇଁ ଦୁଇ ଦୁଇ ଥର କଟିଛି ଟ୍ରାଫିକ ନିୟମ ଉଲ୍ଲଘଂନ ନେଇ ଚାଲାଣ । ଏପରିକି ନିୟମ ଉଲ୍ଲଘଂନ ନେଇ ଦୁଇ ଥର ଚାଲାଣ କଟିବା ପରେ ତୃତୀୟ ଥର ପାଇଁ ଟ୍ରାଫିକ ପୋଷ୍ଟ ପାଓ୍ବାର ହାଉସ ଛକରେ ଦୁଇ ଜଣଙ୍କୁ ଧକ୍କା ଦେବା ଘଟଣା ସାମ୍ନାକୁ ଆସିଛି । ଗତ ୧୫ ଜୁନ ୨୦୨୩ରେ କଟକ ଜଗତପୁର ଠାରେ ନିର୍ଦ୍ଧାରିତ ବେଗଠୁ ଅଧିକ ବେଗରେ ଯିବା ବେଳେ କଟିଥିଲା ଚାଲାଣ । ଭୁବନେଶ୍ୱର ଏଜି ଛକରେ ୧୫ଏପ୍ରିଲ ୨୦୨୩ରେ ଏକ ଚାଲାଣ କଟିଥିବା ବେଳେ ୩ ଏପ୍ରିଲରେ ମଧ୍ୟ ଚାଲାଣ କଟିଥିଲା ।
ଇଟିଭି ଭାରତ, ଭୁବନେଶ୍ବର
