ଭୁବନେଶ୍ବର: ପ୍ରଖ୍ୟାତ ଆନ୍ତର୍ଜାତିକ ଲେଖିକା, ସାମ୍ବାଦିକା, ଡକ୍ୟୁମେଣ୍ଟାରୀ ଫିଲ୍ମ ନିର୍ମାତା ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବଡ ଭଉଣୀ ଗୀତା ମେହେଟ୍ଟାଙ୍କ ପରଲୋକ ହୋଇଛି । ଦିଲ୍ଲୀ ସ୍ଥିତ ବାସଭବନରେ 80 ବର୍ଷ ବୟସରେ ଗୀତାଙ୍କ ଦେହାନ୍ତ ହୋଇଛି । ସେ ଦୀର୍ଘ ଦିନ ଧରି ଅସୁସ୍ଥ ଥିଲେ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଦିଲ୍ଲୀ ଗସ୍ତ କରିବା ନେଇ ସୂଚନା । ଗୀତା ମେହେଟ୍ଟାଙ୍କ ପରଲୋକରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କଠୁ ନେଇ ବହୁ ବିଶିଷ୍ଟ ବ୍ୟକ୍ତି ଶୋକ ପ୍ରକାଶ କରିଛନ୍ତି ।

ନବୀନଙ୍କ ଏକମାତ୍ର ଭଉଣୀ: 1943 ମସିହାରେ ଜନ୍ମିତ ଗୀତା ମେହେଟ୍ଟା ପୂର୍ବତନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକ ଓ ଜ୍ଞାନ ପଟ୍ଟନାୟକଙ୍କର ଏକମାତ୍ର କନ୍ୟା । । ନବୀନ ପଟ୍ଟନାୟକ ଓ ପ୍ରେମ ପଟ୍ଟନାୟକଙ୍କ ଭଉଣୀ ହେଉଛନ୍ତି ଗୀତା । ପାଠ ପଢା ସରିବା ପରେ ବ୍ରିଟେନର କେମ୍ବିଜ ବିଶ୍ବବିଦ୍ୟାଳୟରେ ଉଚ୍ଚଶିକ୍ଷା ହାସଲ କରିଥିଲେ । 1965ରେ ସେ ଆମେରିକାସ୍ଥିତ ଅଲଫ୍ରେଡ ଏ ନୋଫ ପ୍ରକାଶନୀ ସଂସ୍ଥାର ମୁଖ୍ୟଙ୍କ ସୋନୀ ମେହେଟ୍ଟାଙ୍କୁ ବିବାହ କରିଥିଲେ । ତାଙ୍କର ଜଣେ ପୁତ୍ର ସନ୍ତାନ ଆଦିତ୍ୟ ସିଂହ ମେହେଟ୍ଟା ରହିଛନ୍ତି । ସୋନୀ ମେହେଟ୍ଟାଙ୍କର ଗତ ୨୦୧୯ରେ ପରଲୋକ ହୋଇଥିଲା ।

ଲେଖିକା ଭାବେ ବିଶ୍ବରେ ରହିଛି ଖ୍ୟାତି: ଦିଲ୍ଲୀ ଓ ଇଂଲଣ୍ଡରେ ଶିକ୍ଷା ଲାଭ କରିଥିଲେ ଗୀତା ଲେଖାଲେଖି ସହ ଡକ୍ୟୁମେଣ୍ଟାରୀ ଫିଲ୍ମ ମଧ୍ୟ ନିର୍ମାଣ କରିଛନ୍ତି । ସାମ୍ବାଦିକା ଭାବେ ତାଙ୍କର ପରିଚୟ ରହିଛି । ତାଙ୍କର 3ଟି ପୁସ୍ତକ କର୍ମା କୋଲା, ସାପ ଏବଂ ଶିଡି, ଏ ରିଭର ସୂତ୍ର, ରାଜ୍ ଆଣ୍ଡ ଏଣ୍ଟରନାଲ ଗଣେଶ । ଗୀତାଙ୍କ ଏକ ପୁସ୍ତକ 21ଟି ଭାଷାରେ ଅନୁବାଦ ହୋଇଛି । ଯାହା ଭାରତ ସମେତ ୟୁରୋପରେ ଖ୍ୟାତି ଲାଭ କରିଛି । ସେ ବହୁତ ଡକ୍ୟୁମେଣ୍ଟାରୀ ଫିଲ୍ମ ତିଆରି କରିଛନ୍ତି ।

ପଦ୍ମଶ୍ରୀ ସମ୍ମାନକୁ କହିଥିଲେ ନା: ୪୦ ବର୍ଷର ସାହିତ୍ୟ ସାଧନାରେ ତାଙ୍କର ଅନେକ ପୁସ୍ତକ ଉଲ୍ଲେଖନୀୟ ସଫଳତା ଲାଭ କରିଛି । ଗୀତା ମେହେଟ୍ଟା ଇଂଲଣ୍ଡ, ୟୁରୋପ ଏବଂ ଆମେରିକା ପାଇଁ ୧୪ଟି ଦୂରଦର୍ଶନ ପ୍ରାମାଣିକ ଚଳଚ୍ଚିତ୍ରର ନିର୍ମାଣ କରିଛନ୍ତି । ୧୯୭୦-୧୯୭୧ ମସିହା ମଧ୍ୟରେ ସେ ଆମେରିକା ଦୂରଦର୍ଶନ ଏନବିସି ପାଇଁ ଯୁଦ୍ଧ ସମ୍ବାଦଦାତା ଭାବରେ କାର୍ଯ୍ୟ କରିଥିଲେ । ତାଙ୍କର ଚଳଚ୍ଚିତ୍ର ‘କମ୍ପାଇଲେସନ ଅଫ ଦି ବାଙ୍ଗଲାଦେଶ ରିଭୋଲୁସନ, ଡେଡଲାଇନ ବାଙ୍ଗଲାଦେଶ, ଉଭୟ ଭାରତ ଏବଂ ବିଦେଶର ପ୍ରେକ୍ଷାଳୟରେ ପ୍ରଦର୍ଶିତ ହୋଇଥିଲା । 2019 ମସିହାରେ ତାଙ୍କ ନାଁ ପଦ୍ମଶ୍ରୀ ପୁରସ୍କାର ପାଇଁ ଘୋଷଣା ହୋଇଥିଲା । କିନ୍ତୁ ସେ ପୁରସ୍କାର ଗ୍ରହଣ କରିବା ଲାଗି ମନା କରିଦେଇଥିଲେ । ପଦ୍ମଶ୍ରୀ ସମ୍ମାନକୁ ପ୍ରତ୍ୟାଖ୍ୟାନ କରି ସେ ଚର୍ଚ୍ଚାକୁ ଆସିଥିଲେ ।

ଦିଲ୍ଲୀ ଯିବେ ନବୀନ: ଗୀତାଙ୍କ ଦେହାନ୍ତ ଖବର ପାଇବା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି (ରବିବାର) ଦିଲ୍ଲୀ ଗସ୍ତରେ ଯିବେ । ଦିଲ୍ଲୀରେ ଭଉଣୀଙ୍କ ଶେଷ ଦର୍ଶନ କରିବେ ନବୀନ । ସେଠାରେ ତାଙ୍କର ଶେଷକୃତ୍ୟ ସମ୍ପର୍ଣ୍ଣ ହେବ । ନବୀନଙ୍କ ସହିତ ଗୀତାଙ୍କର ବହୁତ ବ୍ୟକ୍ତିଗତ ସମ୍ପର୍କ ଥିଲା । ନବୀନଙ୍କୁ ଅନ୍ତର୍ଜାତୀୟ ସ୍ତରରେ ପରିଚିତ କରିବାରେ ଗୀତାଙ୍କର ବଡ଼ ଭୂମିକା ଥିଲା । ରାଜନୀତିରେ ନବୀନଙ୍କ ପ୍ରବେଶ ପଛରେ ଗୀତାଙ୍କର ବଡ଼ ହାତ ରହିଛି । ନବୀନ ସରକାର ଗଠନ ସମୟରେ ଗୀତା ଓଡିଶାରେ ଉପସ୍ଥିତ ଥିଲେ ।

ପ୍ରଧାନମନ୍ତ୍ରୀଙ୍କ ସମେତ ବିଶିଷ୍ଟ ବ୍ୟକ୍ତିଙ୍କ ଶୋକ: ଗୀତ ମେହେଟ୍ଟାଙ୍କ ପରଲୋକରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୋକ ପ୍ରକାଶ କରିଛନ୍ତି । ଗୀତଙ୍କ ବିୟୋଗରେ ଶୋକ ପ୍ରକାଶ କରି ପ୍ରଧାନମନ୍ତ୍ରୀ ଲେଖିଛନ୍ତି, ଗୀତା ଜଣେ ପ୍ରତିଷ୍ଠିତ ଲେଖିକା ଥିଲେ । ସେ ନିଜ ଦକ୍ଷତା ବଳରେ ବହୁମୁଖୀ ପ୍ରତିଭାର ଅଧିକାରିଣୀ ହୋଇଥିଲେ । ସୃଜନଶୀଳ ସାହିତ୍ୟ ରଚନା ଓ ଫିଲ୍ମ ନିର୍ମାତା ପାଇଁ ପରିଚତ ଥିଲେ । ପ୍ରକୃତି ଏବଂ ଜଳ ସଂରକ୍ଷଣ ଦିଗରେ ସେ ବହୁ କାର୍ଯ୍ୟ କରିଛନ୍ତି । ଏଭଳି ଦୁଃଖ ସମୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମେତ ଶୋକସନ୍ତପ୍ତ ପରିବାର ପ୍ରତି ସମବେଦନା ଜଣାଉଛି । ତାଙ୍କର ଅମର ଆତ୍ମାର ସତଗତି କାମନା କରୁଛି ।''

ସେହପରି ରାଜ୍ୟପାଳ ପ୍ରଫେସର ଗଣେଶୀ ଲାଲ ଆନ୍ତର୍ଜାତିକ ଲେଖିକା, ସାମ୍ବାଦିକା, ଡକ୍ୟୁମେଣ୍ଟାରୀ ଫିଲ୍ମ ନିର୍ମାତା ଦେହାନ୍ତରେ ଶୋକ ପ୍ରକାଶ କରିଛନ୍ତି । ସେ ଲେଖିଛନ୍ତି, '' ଗୀତ ଜଣେ ଉଚ୍ଚକୋଟୀର ଲେଖିକା ଥିଲେ । ତାଙ୍କ କୃତି ଚିର ଅମର ହୋଇ ରହିବ । ଦିଂବଗତ ଆତ୍ମା ପ୍ରତି ଶ୍ରଦ୍ଧାଞ୍ଜଳି ସହ ପରିବାରଙ୍କୁ ଏଭଳି ଦୁଃଖ ସମୟରେ ଭଗବାନ ସହାୟ ହୁଅନ୍ତୁ ।

କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଗୀତ ମେହେଟ୍ଟାଙ୍କ ବିୟୋଗରେ ଗଭୀର ଶୋକ ପ୍ରକାଶ କରିଛନ୍ତି । ସେ ଲେଖିଛନ୍ତି, '' ସୁନାମଧନ୍ୟ ଲେଖିକା ଗୀତ ମେହେଟ୍ଟାଙ୍କ ଦେହାନ୍ତ ଖବର ଶୁଣି ମଁ ମର୍ମାହତ । ଗୀତାଙ୍କ ପରଲୋକ ସାହିତ୍ୟ ଜଗତ ପାଇଁ ବଡ କ୍ଷତି । ଏଭଳି ଦୁଃଖଦ ସମୟରେ ଭଗବାନ ଶୋକ ସନ୍ତପ୍ତ ପରିବାରକୁ ଶକ୍ତି ଦିଅନ୍ତୁ । ଓମ୍ ଶାନ୍ତି ।''

ଇଟିଭି ଭାରତ, ଭୁବନେଶ୍ବର