ଖୋର୍ଦ୍ଧା: ସାରା ରାଜ୍ୟରେ ଆଜି ପାଳନ ହେଉଛି କୁମାର ପୂର୍ଣ୍ଣିମା । କୁମାରୀମାନଙ୍କ ବଡ ପର୍ବ କୁମାର ପୂର୍ଣ୍ଣିମା ଅବସରରେ ଚଳଚଞ୍ଚଳ ହୋଇ ଉଠିଛି ପୁରଠୁ ପଲ୍ଲୀ । ଉତ୍କଳୀୟ ସଂସ୍କୃତି ଓ ପରମ୍ପରାର ଆଧାରରେ କାହିଁ କେଉଁ କାଳରୁ ପାଳନ ହୋଇଆସୁଛି ଏହି ପର୍ବ । ପ୍ରତିଟି କୁମାରୀ ପାଇଁ ଏହି ପର୍ବର ରହିଥାଏ ଏକ ବିଶେଷ ମହତ୍ତ୍ବ । ରୋଗରୁ ମୁକ୍ତ ଧନପ୍ରାପ୍ତ ଓ କାର୍ତ୍ତିକେୟଙ୍କ ଭଳି ସୁନ୍ଦର ବର ପାଇବା ବିଶ୍ବାସରେ ଓଡିଆ ଘରର ଝିଅମାନେ ଏହି ବ୍ରତ ଖୁବ ନିଷ୍ଠାର ସହ କରିଥାନ୍ତି ।
ଆଶ୍ୱିନ ମାସ ପୂର୍ଣ୍ଣିମା ତିଥିରେ କୁମାରୋତ୍ସବ ବା କୁମାର ପୂର୍ଣ୍ଣିମା ପର୍ବ ପାଳିତ ହୁଏ । ଏହିଦିନ ଧନଦାତ୍ରୀ ମା’ ଲକ୍ଷ୍ମୀଦେବୀଙ୍କର ମଧ୍ୟ ଆରଧନା କରାଯାଏ । ଯେଉଥିପାଇଁ ଏହାକୁ ଗଜଲକ୍ଷ୍ମୀ ପୂଜା ମଧ୍ୟ କୁହାଯାଏ । ଏହିପର୍ବ ପ୍ରତ୍ୟେକ ଓଡିଆ ଘରେ ଘରେ ପାଳିତ ହୁଏ ଏବଂ ଏହି ଦିନ ଓଡ଼ିଶାବାସୀ ଗଜଲକ୍ଷ୍ମୀ, ଚନ୍ଦ୍ର, ସୂର୍ଯ୍ୟ ଓ କାର୍ତ୍ତିକଙ୍କର ପୂଜା ଆରାଧନା କରି ନିଜର ସୁଖ, ସୌଭାଗ୍ୟ, ଯଶ, ଧନ ଓ କୀର୍ତ୍ତି କାମନା କରିଥାନ୍ତି ।
କୁମାର ପୂର୍ଣ୍ଣମୀ ଅବସରରେ ପାଳିତ ହେଉଥିବା ଜହ୍ନି ଓଷା ବ୍ରତର ଆଜି ସମାପନ ହୋଇଥାଏ । ଭାଦ୍ରବ ପୂର୍ଣ୍ଣମୀ ଠାରୁ କୁମାର ପୂର୍ଣ୍ଣମୀ ପର୍ଯ୍ୟନ୍ତ କୁମାରୀ କନ୍ୟାମାନେ ଏକାଠି ହୋଇ ବୃନ୍ଦାବତୀଙ୍କ ଠାରେ ଜହ୍ନି ଓଷା କରନ୍ତି । ଜହ୍ନି ଫୁଲରେ କୋଠି ତିଆରି କରି, କଳସ ସ୍ଥାପନା କରି, ତୁଳସୀ ଚଉରା ମୂଳେ ପୂଜା କରିଥାନ୍ତି । ରୋଗରୁ ମୁକ୍ତ ଧନପ୍ରାପ୍ତ ଓ କାର୍ତ୍ତିକେୟଙ୍କ ଭଳି ସୁନ୍ଦର ବର ପାଇବା ପାଇଁ କୁମାରୀ ମାନେ ଏହି ବ୍ରତ କରିଥାନ୍ତି ।
ଅନ୍ୟପଟେ ଆଜି ଜହ୍ନି ଓଷାର ଶେଷ ଦିନ ହୋଇଥିବା ବେଳେ ସକାଳୁ ପ୍ରତ୍ୟେକ ଓଡିଆ ଘରର କୁମାରୀ ମାନେ ନୂତନ ବସ୍ତ୍ର ପରିଧାନ କରି ସକାଳୁ ଲିଆ(ଖଇ), ନଡ଼ିଆ, ଗୁଆ ଓ ବିଭିନ୍ନ ପ୍ରକାର ଫଳମୂଳର ଅଞ୍ଜଳି ଟେକି ଚନ୍ଦ୍ର ଓ ସୂର୍ଯ୍ୟଙ୍କୁ ଅର୍ଘ୍ୟ ପ୍ରଦାନ କରିବ ସହ ଉତ୍ସାହର ସହିତ ଏହି ପାଳନ କରିଥାନ୍ତି ।
ତେବେ ଖୋର୍ଦ୍ଧା ଜିଲ୍ଲାରେ ମଧ୍ୟ ବିଭିନ୍ନ ସ୍ଥାନରେ କୁମାରୀମାନେ ସକାଳେ ଆଞ୍ଜୁଳୀ ଟେକି କୁମାର ପୂର୍ଣ୍ଣମୀ ପାଳନ କରିଥିବା ଦେଖିବାକୁ ମିଳିଛି । ଅନ୍ୟପଟେ ଆଜି ଚନ୍ଦ୍ର ଗ୍ରହଣ ପଡୁଥିବାରୁ ସ୍ୱତନ୍ତ୍ର ରୀତିନୀତିରେ ପୂଜା କରାଯାଉଥିବା ଜଣାପଡିଛି । ଅପରାହ୍ମ 4ଟା ମଧ୍ୟରେ ପୂଜା କାର୍ଯ୍ୟ ଶେଷ କରିବାକୁ ନୀତି ରହିଛି ।
ଇଟିଭି ଭାରତ, ଖୋର୍ଦ୍ଧା
