ଖୋର୍ଦ୍ଧା: ଟାଙ୍ଗୀ ଥାନା ଅନ୍ତର୍ଗତ ଭୁଷଣ୍ଡପୁରରେ ବାଣ ବିସ୍ଫୋରଣ ଘଟଣା । ବର୍ତ୍ତମାନ ସୁଦ୍ଧା 5 ଜଣଙ୍କର ମୃତ୍ୟୁ ହୋଇଥିବା ବେଳେ ତିନି ଜଣଙ୍କ ଅବସ୍ଥା ଗୁରୁତର ରହିଛି । ଘଟଣାର ଗୋଟିଏ ଦିନ ପରେ ସାମ୍ନାକୁ ଆସିଲା ବିସ୍ଫୋରଣ ସମୟରେ ସେହି ଭୟଙ୍କର ଦୃଶ୍ୟ । ବାଣ ତିଆରି ଚାଲିଥିବା ଘରେ ହଠାତ ବିସ୍ଫୋରଣ ହୋଇଥିଲା । ଫଳରେ ବାଣ ଗୁଡିକ ବିସ୍ଫୋରଣ ହେବାରୁ ଘରେ ନିଆଁ ଲାଗିଯାଇଥିବା ଭିଡିଓରେ ଦେଖିବାକୁ ମିଳିଛି । ଯାହା ଏବେ ସୋସିଆଲ ମିଡିଆରେ ଭାଇରାଲ ହୋଇଛି । ଏହି ଘଟଣା ଘଟିବା ପରେ ଜିଲ୍ଲା ପ୍ରସାଶନ ଓ ପୋଲିସ ପ୍ରଶାସନ ତଦନ୍ତକୁ ଜୋରଦାର କରିଛନ୍ତି । ବିଭିନ୍ନ ସ୍ଥାନରେ ଚଢାଉ କରାଯାଇ 62 କେଜି ବିସ୍ଫୋରକ ଜବତ କରାଯିବା ସହ 6 ଜଣଙ୍କୁ ଗିରଫ କରାଯାଇଛି ।
ବାଣ ବିସ୍ଫୋରଣ ଘଟଣା ପରେ ଗତକାଲି ଜିଲ୍ଲାର ବିଭିନ୍ନ ଅଞ୍ଚଳରେ ବାଣ ବ୍ଯବସାୟୀ ମାନଙ୍କ ଘରେ ଓ ଗୋଦାମରେ ଚଢାଉ କରିଥିଲା ପୋଲିସ । ଏହି ସମୟରେ ବିପୁଳ ପରିମାଣର ବାଣ ସହ ବାଣ ତିଆରି ସାମଗ୍ରୀ ଜବତ କରାଯାଇଥିଲା । ଏହି ଘଟଣାରେ ଚିତ୍ତରଞ୍ଜନ ମହାନ୍ତି ନାମକ ଜଣେ ବ୍ୟକ୍ତିଙ୍କୁ ଗିରଫ କରାଯାଇ 41/23ରେ ଏକ ମାମଲା ରୁଜୁ କରି କୋର୍ଟ ଚାଲଣ କରାଯାଇଛି । ସେହିଭଳି ବେଗୁନିଆ ଥାନା ଅନ୍ତର୍ଗତ ଦେଉଳି ଗ୍ରାମରେ ଚଢାଉ କରି କବି ମଲ୍ଲିକଙ୍କୁ ଗିରଫ କରିବା ସହ ତାଙ୍କ ନିକଟରୁ 5 କେଜି ବିସ୍ଫୋରକ ସହ ବାଣ ଜବତ କରି 65/23 ରେ କେସ ରୁଜୁ କରାଯାଇଛି ।
ବୋଲଗଡ ପଞ୍ଚୁଦୋଳ ପଡିଆ ନିକଟରେ ଚଢାଉ କରାଯାଇ କେଙ୍କଟ ପୁଷ୍ଟିକୁ ଗିରଫ କରାଯାଇ ଥିବା ବେଳେ ତାଙ୍କ ନିକଟକୁ 10 କେଜି ବିସ୍ଫୋରକ ସାମଗ୍ରୀ ଜବତ କରିଛି ବୋଲଗଡ ପୋଲିସ । ଏହିପରି ଭାବେ ବେଗୁନିଆ ବାଘମାରୀ ଓ ବୋଲଗଡ ଥାନା ଅଞ୍ଚଳ ସହ ଅନ୍ୟ କିଛି ଅଞ୍ଚଳରୁ ମୋଟ 62 କେଜି ବିସ୍ଫୋରକ ସାମଗ୍ରୀ ସହ ବାଣ ଜବତ ହୋଇଛି । ଏନେଇ ବିଭିନ୍ନ ଥାନାରେ 7ଟି ମାମଲା ମଧ୍ୟ ରୁଜୁ ହୋଇଥିବା ଖୋର୍ଦ୍ଧା ଏସଡିପିଓ ଦିଲ୍ଲୀପ ଦାସ ସୂଚନା ଦେଇଛନ୍ତି ।
ଭୁଷଣ୍ଡପୁରରେ ଚୋରାରେ ବାଣ ତିଆରି କାମ ଚାଲିଥିବା ବେଳେ ଗତକାଲି ଏଭଳି ବଡ଼ ଅଘଟଣ ଘଟିଥିଲା । ବାଣ ବିସ୍ଫୋରଣର ଖବର ପାଇବା ପରେ ଘଟଣାସ୍ଥଳରେ ଖୋର୍ଦ୍ଧା ଜିଲ୍ଲାପାଳ କେ.ସୁଦର୍ଶନ ଚକ୍ରବର୍ତ୍ତୀ, ଏସପି, ଉପ ଜିଲ୍ଲାପାଳ, ବାଲୁଗାଁ ଏସଡିପିଓ, ଟାଙ୍ଗୀ ଆଇଆଇସି, ବିଡିଓ, ତହସିଲଦାର ପହଞ୍ଚି ତଦନ୍ତ ଆରମ୍ଭ କରିଥିଲେ । ଦୋଳ ମେଳଣ ସମୟରେ ଆତବାଜୀ ପ୍ରତିଯୋଗିତା ପାଇଁ ବାଣ ପ୍ରସ୍ତୁତି ଚାଲିଥିଲା ବୋଲି କୁହାଯାଉଛି ।
ଇଟିଭି ଭାରତ, ଖୋର୍ଦ୍ଧା
