ଭୁବନେଶ୍ବର: ବଢ଼ିବ ମୋ ବସ ସେବାର କଳେବର । ଭୁବନେଶ୍ବର, କଟକ, ଖୋର୍ଦ୍ଧା, ରାଉଲକେଲା ପରେ କେନ୍ଦୁଝର ଜିଲ୍ଲାରେ ଗଡିବ ମୋ ବସ । ସେହିପରି ୫ଟି ସହରରେ ଇ-ବସ ସେବା ଆରମ୍ଭ ହେବ । କ୍ୟାପିଟାଲ ରିଜିଅନ ଅର୍ବାନ ଟ୍ରାନ୍ସପୋର୍ଟ ବା କ୍ରୁଟର ୪୪ତମ ବୋର୍ଡ ବୈଠକରୁ ଏହି ସୂଚନା ମିଳିଛି । ଉନ୍ନୟନ କମିଶନର ତଥା କ୍ରୁଟର ଅଧ୍ୟକ୍ଷ ଅନୁ ଗର୍ଗଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ରାଜ୍ୟରେ ଗମନାଗମନ ବ୍ୟବସ୍ଥାକୁ ଅଧିକ ସୁଦୃଢ଼ କରିବା ପାଇଁ ବ୍ୟାପକ ଯୋଜନା କରାଯାଇଛି । ପରିବେଶ ପ୍ରତି ସଚେତନ ଥିବା ସହରାଞ୍ଚଳରେ ଲୋକଙ୍କୁ ସୁବିଧାଜନକ ଓ ନିରନ୍ତର ପରିବହନ ସେବା ଯୋଗାଇ ଦେବାକୁ କ୍ରୁଟ ପ୍ରାଥମିକତା ଦେଇଆସୁଛି ।
ବୈଠକରେ କେନ୍ଦୁଝର ଜିଲ୍ଲାରେ ତୁରନ୍ତ ମୋ ବସ ସେବା ଆରମ୍ଭ କରିବା ପାଇଁ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି । ଏହାଦ୍ୱାରା ଖଣିଜ ଜିଲ୍ଲା କେନ୍ଦୁଝର ବାସିନ୍ଦାଙ୍କ ପାଇଁ ଗମନାଗମନ ସୁଲଭ ଓ ସୁଗମ ହୋଇପାରିବ । ନିକଟରେ ଘୋଷଣା କରାଯାଇଥିବା ପିଏମ ଇ-ବସ ଯୋଜନା ଭଳି କ୍ରୁଟ ଭୁବନେଶ୍ବର, କଟକ, ରାଉରକେଲା, କେନ୍ଦୁଝର ଏବଂ ସମ୍ବଲପୁରର ପ୍ରମୁଖ ସ୍ଥାନ ଗୁଡିକରେ ଇ-ବସ ସେବା ଆରମ୍ଭ କରିବାକୁ ଯୋଜନା କରିଛି । ଏହି ରଣନୀତିକ ପଦକ୍ଷେପ କ୍ରୁଟର ପରିବେଶ ପ୍ରତି ଥିବା ଉତ୍ତରଦାୟିତ୍ବ ଓ ପ୍ରତିବଦ୍ଧତା ଉପରେ ଗୁରୁତ୍ବ ଦେଉଛି । ଓଡିଶାରେ ପରିବେଶ ଅନୁକୂଳ ବିକଳ୍ପ ପରିବହନ ବ୍ୟବସ୍ଥା ଗ୍ରହଣ କରିବାରେ କ୍ରୁଟ ପ୍ରଥମରେ ରହିଛି ।
ଏହି ପଦକ୍ଷେପଗୁଡ଼ିକୁ ସମ୍ପୂର୍ଣ୍ଣ କରିବା ପାଇଁ କ୍ରୁଟ ଏକ ବ୍ୟାପକ ଭିତ୍ତିଭୂମି ବିକାଶ ଯୋଜନା କରିଛି । ପ୍ରମୁଖ ଭିତ୍ତିଭୂମି ବିକାଶ ପ୍ରକଳ୍ପଗୁଡ଼ିକ ମଧ୍ୟରେ କଟକ ନରାଜରେ ଏକ ଆଧୁନିକ ବସ ଡିପୋ, ଗାଡକଣରେ ଏକ ଉତ୍ସର୍ଗୀକୃତ ଇଲେକ୍ଟ୍ରୋନିକ ଭେହିକିଲ ବା ଇଭି ଡିପୋ ଏବଂ ଭୁବନେଶ୍ବରର ପୋଖରୀପୁଟରେ ଏକ ଅତ୍ୟାଧୁନିକ ବସ ଡିପୋ ନିର୍ମାଣ ଅନ୍ତର୍ଭୁକ୍ତ । ଏହାଛଡା ଭୁବନେଶ୍ୱରର ଅରିଜିନ ଡେଷ୍ଟିନେସନ ଟର୍ମିନାଲ ଘାଟିକିଆରେ ଏକ ଇଲେକ୍ଟ୍ରିକ ଚାର୍ଜିଂ ଷ୍ଟେସନ ସ୍ଥାପନ ସହ ଗଞ୍ଜାମର ଛତ୍ରପୁର, ଗୋପାଳପୁର ଓ ହଳଦୀପଦର ଏବଂ ସମ୍ବଲପୁରର ମୋଦୀପଡା ଏବଂ ଅଇଁଠାପାଲିରେ ଅରିଜିନ ଡେଷ୍ଟିନେସନ ଟର୍ମିନାଲ ପ୍ରତିଷ୍ଠା ପାଇଁ କ୍ରୁଟ ଯୋଜନା କରିଛି ।
ଏହାମଧ୍ୟ ପଢନ୍ତୁ: ମୁଖ୍ୟ ଶାସନ ସଚିବଙ୍କ ଡିଏମଏଫ ସମୀକ୍ଷା, ବାର୍ଷିକ ପ୍ରଗତିଶୀଳ ଯୋଜନା ଉପରେ ଗୁରୁତ୍ୱ
ପୁନରୁଦ୍ଧାର ବ୍ୟବସ୍ଥାକୁ ଆହୁରି ଉନ୍ନତ କରିବା ପାଇଁ କ୍ରୁଟ ଭୁବନେଶ୍ବରର ମାଷ୍ଟର କ୍ୟାଣ୍ଟିନରେ ଥିବା ବସ ଟର୍ମିନାଲର ମରାମତି, ନବୀକରଣ ଏବଂ ଉନ୍ନତି ପାଇଁ ସମ୍ବଳ ଯୋଗାଇ ଦେଇଛି । ଏହିବସବୁ ଭିତ୍ତିଭୂମି, ପଦକ୍ଷେପ ଏବଂ ଉନ୍ନତି ଲୋକମାନଙ୍କ ପାଇଁ ଭ୍ରମଣ ଅଭିଜ୍ଞତାକୁ ଆହୁରି ସହଜ କରିବ ବୋଲି ଆଶା କରାଯାଉଛି । ରାଜ୍ୟ ସରକାରଙ୍କ ୫-ଟି ଉପକ୍ରମ ଆଧାରରେ ରାଜ୍ୟର ବିଭିନ୍ନ ପରିଚାଳନା କ୍ଷେତ୍ରରେ କାର୍ଯ୍ୟରତ କର୍ମଚାରୀଙ୍କ ଆଭାସୀ ପ୍ରଶିକ୍ଷଣ ଓ ଦକ୍ଷତା ବିକାଶକୁ ସୁଗମ କରିବା ପାଇଁ ପଟିଆ ଏବଂ ଭଗବାନପୁର ଡିପୋରେ ଅତ୍ୟାଧୁନିକ ଭିଡିଓ କନଫରେନ୍ସିଂ ବ୍ୟବସ୍ଥା କରାଯିବ । ରାଜ୍ୟବାସୀଙ୍କ ସେବାରେ ଏକ ବୃତ୍ତିଗତ ତାଲିମପ୍ରାପ୍ତ କର୍ମଚାରୀ ଦଳକୁ ସବୁ ସମୟରେ ପ୍ରସ୍ତୁତ ରଖିବା ଏହାର ଉଦ୍ଦେଶ୍ୟ ।
ଜନସାଧାରଣଙ୍କ କଲ୍ୟାଣ ପାଇଁ ସଂଗଠନ ନୂତନତ୍ବ, ସ୍ଥିରତା ଏବଂ ନିରନ୍ତର ସେବା ଉପରେ ବୈଠକରେ ଗୁରୁତ୍ୱ ଦିଆଯାଇଛି । ଦୂରଦୃଷ୍ଟି ସମ୍ପନ୍ନ ନିଷ୍ପତ୍ତି ପ୍ରଗତିଶୀଳ ଓଡିଶାର ଆକାଂକ୍ଷା ପୂରଣ କରିବ । ଏହାସହ ଅଧିକ ଯୋଗାଯୋଗ ସମ୍ପନ୍ନ, ଦକ୍ଷ ଏବଂ ପରିବେଶ ସଚେତନ ସହରାଞ୍ଚଳ ପରିବହନ ବ୍ୟବସ୍ଥା ପାଇଁ ଢାଞ୍ଚା ସ୍ଥାପନ କରିଛି । ବୈଠକରେ ନିର୍ଦ୍ଦେଶକ ମଣ୍ଡଳୀର ସଦସ୍ୟ ନଗର ଉନ୍ନୟନ ପ୍ରମୁଖ ଶାସନ ସଚିବ ଜି ମାଥି ଭଥନନ, ଟ୍ଵିନସିଟି ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ, କ୍ରୁଟର ପରିଚାଳନା ନିର୍ଦ୍ଦେଶକ ଅରୁଣ ବୋଥ୍ରା, ପରିବହନ କମିଶନର ଅମିତାଭ ଠାକୁର, ଭୁବନେଶ୍ବର ସ୍ମାର୍ଟ ସିଟି ଲିମିଟେଡର ପରିଚାଳନା ନିର୍ଦ୍ଦେଶକ ବଲୱନ୍ତ ସିଂ, ସିଏମସି କମିଶନର ନିଖିଲ ପବନ କଲ୍ୟାଣ, ଗଞ୍ଜାମ, କେନ୍ଦୁଝର, ସମ୍ବଲପୁର ଓ ଝାରସୁଗୁଡ଼ା ଜିଲ୍ଲାପାଳ ଉପସ୍ଥିତ ଥିଲେ ।
ଇଟିଭି ଭାରତ, ଭୁବନେଶ୍ବର
