ଅଜଣା ଗାଡି ଧକ୍କାରେ ଏକମାତ୍ର ରୋଜଗାରକ୍ଷମଙ୍କ ମୃତ୍ୟୁ, କ୍ଷତିପୂରଣ ଦାବିରେ ରାଜପଥ ଅବରୋଧ

କଳାହାଣ୍ଡି ଜିଲ୍ଲା ସଦର ଥାନା ଅନ୍ତର୍ଗତ କୁଟୁରୁଖମାର ଗାଁରେ ଅଜଣା ଗାଡି ଧକ୍କାରେ ଜଣେ ମୃତ। ଅଧିକ ପଢନ୍ତୁ

ଭବାନୀପାଟଣା : ଅଜଣା ଗାଡି ଧକ୍କାରେ ଜଣେ ମୃତ। କଳାହାଣ୍ଡି ଜିଲ୍ଲା ସଦର ଥାନା ଅନ୍ତର୍ଗତ କୁଟୁରୁଖମାର ଗାଁରେ ଏହି ଦୁର୍ଘଟଣା ଘଟିଛି । କ୍ଷତିପୂରଣ ଦାବିରେ ରାଜରାସ୍ତା ଉପରେ ମୃତଦେହ ଜାତୀୟ ରାଜପଥ ଅବରୋଧ କରିଛନ୍ତି ସ୍ଥାନୀୟ ଲୋକେ । ସୂଚନା ଅନୁଯାୟୀ, କୁଟୁରୁଖମାର ଗାଁର ଅଖିଳ ମାଝୀ ଆଜି ସକାଳୁ ସକାଳୁ ନିଜ ଚାଷ ଜମିକୁ ପାଣି ଦେବା ପାଇଁ ଯାଉଥିବା ବେଳେ ଗାଁ ଛକରେ ଏକ ଅଜଣା ଗାଡି ତାଙ୍କୁ ଧକ୍କା ଦେଇଥିଲା । ଫଳରେ ଘଟଣା ସ୍ଥଳରେ ଅଖିଳଙ୍କ ମୃତ୍ୟୁ ହୋଇଥିଲା । ଖବର ପାଇ ପରିବାର ଓ ଗ୍ରାମବାସୀ ଘଟଣା ସ୍ଥଳରେ ପହଞ୍ଚି କ୍ଷତିପୂରଣ ଦାବିରେ ଭବାନୀପାଟଣା ଜୁନାଗଡ଼ ଜାତୀୟ ରାଜପଥ ୨୬କୁ କୁଟୁରୁଖମାର ନିକଟରେ ଅବରୋଧ କରିଥିବା ଜଣାପଡ଼ିଛି ।

ଅଖିଳ ପରିବାରର ଏକମାତ୍ର ରୋଜଗାରକ୍ଷମ ବ୍ୟକ୍ତି ରହିଥିବା ବେଳେ ତାଙ୍କର ମୃତ୍ୟୁ ପରେ ଏବେ ତାଙ୍କ ପରିବାର ଏବେ ବେସାହାରା ହୋଇ ପଡିଛି । ତେଣୁ ମୃତକଙ୍କ ପରିବାରକୁ ୧୦ ଲକ୍ଷ ଟଙ୍କା କ୍ଷତିପୂରଣ ସହ ଅଭିଯୁକ୍ତକୁ ଗିରଫ କରିବା ଦାବିରେ ଏହି ଜାତୀୟ ରାଜପଥ ଅବରୋଧ କରାଯାଇଛି । ଖବର ପାଇ ଘଟଣା ସ୍ଥଳରେ ପୋଲିସ ଓ ତହସିଲଦାର ପହଞ୍ଚି ଆନ୍ଦୋଳନକାରୀଙ୍କ ସହ ଆଲୋଚନା କଲା ପରେ ମଧ୍ୟ ଲୋକେ ନିଜ ଜିଦରେ ଅଡ଼ି ବସିଥିବା ଜଣାପଡିଛି । କ୍ଷତିପୂରଣ ପ୍ରଦାନ ନକରିବା ପର୍ଯ୍ୟନ୍ତ ଏହି ଅବରୋଧ ଚାଲିବ ବୋଲି ଆନ୍ଦୋଳନକାରୀ ମାନେ ଚେତାବନୀ ଦେଇଛନ୍ତି । ସକାଳ ୬ଟାରୁ ଆରମ୍ଭ ହୋଇଥିବା ଏହି ଆନ୍ଦୋଳନ ଦୀର୍ଘ ୭ ଘଣ୍ଟା ଧରି ଚାଲିବା ପରେ ମଧ୍ୟ ପ୍ରଶାସନ ରାସ୍ତା ଅବରୋଧ ହଟାଇବାରେ ବିଫଳ ହୋଇଛି ।

ସେହିପରି ଦୀର୍ଘ ସମୟ ଧରି ରାସ୍ତା ଅବରୋଧ ଫଳରେ ରାସ୍ତାର ଉଭୟ ପାର୍ଶ୍ଵରେ ସହ ସହ ଯାନବାହାନ ଅଟକି ରହିଥିବା ବେଳେ ଯାତ୍ରୀ ସମସ୍ୟାର ସମ୍ମୁଖୀନ ହେଉଥିବା ଦେଖିବାକୁ ମିଳିଛି । ସେପଟେ ବାରମ୍ବାର ଏହି ଗୋଟିଏ ସ୍ଥାନରେ ଦୁର୍ଘଟଣା ଘଟୁଥିବା ବେଳେ ଗ୍ରାମବାସୀ ପୂର୍ବରୁ ଜାତୀୟ ରାଜପଥରେ ସ୍ପିଡ଼ ବ୍ରେକର ବ୍ୟବସ୍ଥା କରିବା ପାଇଁ ଦାବି କରିଥିଲେ । ହେଲେ କେହି ଶୁଣୁ ନଥିବା ଯୋଗୁଁ ବାରମ୍ବାର ଏଭଳି ଦୁର୍ଘଟଣା ନେଇ ଅନେକଙ୍କ ଧନ ଜୀବନ ହାନି ହେଉଥିବା ବେଳେ ପ୍ରଶାସନ କେବେ ସଜାଗ ହେବ ତାହାକୁ ହିଁ ଅପେକ୍ଷା ।

ଇଟିଭି ଭାରତ, କଳାହାଣ୍ଡି