ଭବାନୀପାଟଣା: କଳାହାଣ୍ଡି ଜିଲ୍ଲା କାରାଗାରରେ ବିଚାରଧିନ କଏଦୀ ମୃତ୍ୟୁ ଘଟଣା । ମୃତକଙ୍କ ପରିବାର ଲୋକଙ୍କୁ ବୁଝାସୁଝା କରିବା ପରେ ଉଠିଲା ମୃତଦେହ । ପୋଲିସ ପରିବାର ବର୍ଗକୁ ସହାୟତା ଯୋଗାଇ ଦେବାକୁ ପ୍ରତିଶ୍ରୁତି ଦେବା ପରେ ସେମାନେ ମୃତଦେହ ବ୍ୟବଚ୍ଛେଦ ପାଇଁ ଅନୁମତି ଦେଇଛନ୍ତି । ବ୍ୟବଚ୍ଛେଦ କରାଯାଇ ପରିଜନକୁ ମୃତଦେହ ହସ୍ତାନ୍ତର କରାଯାଇଛି । ଶୁକ୍ରବାର ବିଳମ୍ବିତ ରାତିରେ ଭବାନୀପାଟଣା ସ୍ଥିତ ଜିଲ୍ଲା କାରାଗାରରେ ଏହି ବିଚାରଧୀନ କଏଦୀଙ୍କ ସନ୍ଦେହ ଜନକ ମୃତ୍ୟୁ ଘଟିଥିଲା ।
ସୂଚନାଯୋଗ୍ୟ, ମୃତକ ସିଙ୍ଗା ଥାନା ଅନ୍ତର୍ଗତ ବାହାଦୁରପଦର ଗାଁର ହୃଦୟ କୁମାର ପୋଢ(୪୫) । ଗତ କିଛିଦିନ ତଳେ ସେ ଏକ ଅପରାଧୀକ ମାମଲାରେ ଜିଲ୍ଲା କାରାଗାରରେ ବିଚାରଧୀନ କଏଦୀ ଭାବରେ ରହିଥିଲେ । ଜେଲର୍ଙ୍କ କହିବା ମୁତାବକ, ହୃଦୟଙ୍କ ଦେହ ଅସୁସ୍ଥ ହେବାରୁ ତାଙ୍କୁ ଭବାନୀପାଟଣା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । କିନ୍ତୁ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ । ଏ ସମ୍ପର୍କରେ ଖବର ପାଇ ପରିବାର ଲୋକେ ସେଠାରେ ପହଞ୍ଚିବା ସହ ଏହା ଏକ ସ୍ବାଭାବିକ ମୃତ୍ୟୁ ନୁହେଁ ଅଭିଯୋଗ କରି ଏଥିପାଇଁ କର୍ତ୍ତୃପକ୍ଷଙ୍କୁ ଦାୟୀ କରିଥିଲେ । ମୃତଦେହ ବ୍ୟବଚ୍ଛେଦ ପାଇଁ ପୋଲିସକୁ ଅନୁମତି ମଧ୍ୟ ଦେଇଥିଲେ । ଏହାକୁ ନେଇ ମେଡିକାଲ ପରିସରରେ କିଛି ସମୟ ଧରି ଉତ୍ତେଜନା ଲାଗି ରହିଥିଲା ।
ଇଟିଭି ଭାରତ, କଳାହାଣ୍ଡି
