ଯାଜପୁର: ଧର୍ମଶାଳା ଥାନା ଅନ୍ତର୍ଗତ ରାୟଧରାପୁର- ବନ୍ଧଢି଼ହ ମୁଖ୍ୟ ରାସ୍ତା ବରଡ଼ା ଛକ ନିକଟ ରାସ୍ତାରୁ ଉଦ୍ଧାର ହେଲା ଯବାନଙ୍କ ମୃତଦେହ । ମୃତକଜଣଙ୍କ ସ୍ଥାନୀୟ ବାଲିଚନ୍ଦ୍ରପୁର ଥାନା ଅନ୍ତର୍ଗତ ଜନକ ଗ୍ରାମର ଜିତେନ୍ଦ୍ର ଜେନାସାମନ୍ତ ଓ ସେ ଭାରତୀୟ ସେନାରେ ଯବାନ ଭାବେ କାର୍ଯ୍ୟ କରୁଥିଲେ ବୋଲି ଜଣାପଡିଛି । ସେ ହାଇଦ୍ରାବାଦରେ କାର୍ଯ୍ୟରତ ଥିବା ବେଳେ ଗତକିଛି ଦିନ ତଳେ ଛୁଟିରେ ଗ୍ରାମକୁ ଫେରିଥିଲେ ।
ମିଳିଥିବା ସୂଚନା ଅନୁସାରେ, ଆଜି ସକାଳେ ସ୍ଥାନୀୟ ଲୋକେ ପ୍ରାତଃ ଭ୍ରମଣ କରୁଥିବା ସମୟରେ ରାସ୍ତା କଡରେ ଥିବା ପାଣି ଭିତରେ ଏକ ବାଇକ ସହ ଜଣେ ଯୁବକ ପଡ଼ିଥିବା ଦେଖିବାକୁ ପାଇଥିଲେ । ବ୍ରହ୍ମବରଦା ଫାଣ୍ଡି ପୋଲିସକୁ ଖବର ଦିଆଯିବା ପରେ ପୋଲିସ ପହଞ୍ଚି ପାଣି ଭିତରୁ ମୃତଦେହ ଉଦ୍ଧାର କରିବା ପରେ ପରିଚୟ ସ୍ପଷ୍ଟ ହୋଇଥିଲା ।
ଜିତେନ୍ଦ୍ର ଗତକାଲି ବାଇକ ଯୋଗେ ଘରୁ ବ୍ରହ୍ମବରଦା ଅଞ୍ଚଳକୁ ଆସିଥିଲେ । ତେବେ ଗତକାଲି ବିଳମ୍ବିତ ରାତିରେ ଘରକୁ ଫେରୁଥିବା ସମୟରେ ଦୁର୍ଘଟଣାର ଶିକାର ହୋଇ ଏଭଳି ଘଟଣା ଘଟିଥିବା ପ୍ରାଥମିକ ତଦନ୍ତରୁ ଅନୁମାନ କରାଯାଉଛି । ପୋଲିସ 21/ 2021ରେ ଏକ ଅପମୃତ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ମୃତ ଜିତେନ୍ଦ୍ର ହାଇଦ୍ରାବାଦରେ କାମ କରୁଥିବା ବେଳେ ୩ ଦିନ ତଳେ ଘରକୁ ଆସିଥିଲେ । ଏଭଳି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
