ଜଗତସିଂହପୁର: ବହୁ ଚର୍ଚ୍ଚିତ ରଶ୍ମି ରଞ୍ଜନ ସ୍ବାଇଁ ହତ୍ୟା ମାମଲାର ପର୍ଦ୍ଦଫାସ କରିଛି ପୋଲିସ । ମଙ୍ଗଳବାର ତିର୍ତ୍ତୋଲ ପୋଲିସ ଏକ ସାମ୍ବାଦିକ ସମ୍ମିଳନୀରେ ଘଟଣା ଉପରୁ ପର୍ଦ୍ଦାଫାସ କରିଛି ।
ରଶ୍ମି ରଞ୍ଜନ ଜଣେ ଅସାମାଜିକ ବ୍ୟକ୍ତି ଥିଲେ । ସେହି ଗ୍ରାମରେ ରହୁଥିବା ଜଣେ ଜୈନିକ ମହିଳାଙ୍କୁ ବିଭିନ୍ନ ସମୟରେ ବଳାତ୍କାର ଉଦ୍ୟମ କରିବା ସହିତ ଶାରୀରିକ ଓ ମାନସିକ ନିର୍ଯାତନା ଦେଇ ଆସୁଥିଲା । ଏଥିରେ ମହିଳା ଜଣକ ଅତିଷ୍ଠ ହୋଇ ସୁଦୂର ମୁମ୍ବାଇରେ ରହୁଥିବା ନିଜ ସ୍ବାମୀ ମହାଦେବ କାଣ୍ଡିକୁ ଘଟଣା ସମ୍ପର୍କରେ ଜଣାଇଥିଲେ । ମହାଦେବ ଗାଁକୁ ଆସି ରଶ୍ମି ରଞ୍ଜନକୁ ଡାକି ତାଙ୍କ ପତ୍ନୀକୁ ହଇରାଣ ନ କରିବା ପାଇଁ କହିଥିଲେ । ଏହା ପରେ ସେ ମୁମ୍ବାଇ ପଳାଇଥିଲେ ।
ପୁନର୍ବାର ରଶ୍ମି ଉକ୍ତ ମହିଳାଙ୍କୁ ବଳାତ୍କାର ଉଦ୍ୟମ କରିଥିଲେ । ଏ ସମ୍ପର୍କରେ ମହିଳାଙ୍କ ସ୍ବାମୀ ଜାଣିବା ପରେ ରଶ୍ମିକୁ ହତ୍ୟା କରିବା ପାଇଁ ବ୍ଲୁ ପ୍ରିଣ୍ଟ ପ୍ରସ୍ତୁତ କରିଥିଲେ । ସୁପାରୀ କିଲରଙ୍କୁ 3 ଲକ୍ଷରେ ଟଙ୍କା ଦେଇ ରଶ୍ମିକୁ ହତ୍ୟା କରିବା ନେଇ କରିଥିଲେ ଡିଲ୍ । ମହାଦେବ ପ୍ରଥମେ 70 ହଜାର ଓ ମର୍ଡର ପରେ ଆଉ ପଚାଶ ହଜାର ଦେଇଥିଲେ । ପରେ ସୁପାରୀ କିଲର ରଶ୍ମିକୁ ଘରୁ ଡ଼ାକିନେଇ ଗଳାକାଟି ହତ୍ୟା କରି ଗାଁ ପୋଖରୀରେ ଫିଙ୍ଗି ଦେଇଥିଲେ ।
ପୋଲିସ ହତ୍ୟା ଘଟଣାର ଖୋଲତାଡ଼ କରି 2 ଅଭିଯୁକ୍ତକୁ ଶନିବାର ଗିରଫ କରିଥିଲା । ସୁପାରୀ ଦେଇଥିବା ମହାଦେବ କାଣ୍ଡି ମଙ୍ଗଳବାର ତିର୍ତ୍ତୋଲ ପୋଲିସ ପାଖରେ ଆତ୍ମସମର୍ପଣ କରିଛି । ଘଟଣାର ବିସ୍ତୃତ ବିବରଣୀ ଆୟୋଜିତ ସାମ୍ବାଦିକ ସମ୍ମିଳନୀରେ ତିର୍ତ୍ତୋଲ ଏସଡିପିଓ ଦୀପକ ରଞ୍ଜନ ଜେନା ପ୍ରକାଶ କରିଥିଲେ ।
ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ
