ବ୍ରହ୍ମପୁର: ଦେଶର ପ୍ରମୁଖ ଶକ୍ତିପୀଠ ଭାବରେ ପରିଚିତ ତଥା ରାଜ୍ୟର ପର୍ଯ୍ୟଟନ ସ୍ଥଳୀର ଶୋଭା ବର୍ଦ୍ଧନ କରୁଥିବା ମା ତାରାତାରିଣୀ ମନ୍ଦିରର ପ୍ରତିଷ୍ଠା ପାଇଁ ଆସନ୍ତା ମଇ ୧୫ରୁ ୨୦ ପର୍ଯ୍ୟନ୍ତ ତାରିଖ ସ୍ଥିର ହୋଇଛି । ଏଥିସହ ପ୍ରତିଷ୍ଠା ପୂର୍ବରୁ ଶୁଭ ଖୁଣ୍ଟି ସ୍ଥାପନ କରାଯାଇଛି । ତେବେ ମଇ ୧୫ ତାରିଖ ଦିନ ଏହି କାର୍ଯ୍ୟ ଆୟୋଜନ ନେଇ ପ୍ରଶାସନ ଓ ମନ୍ଦିର କମିଟି ପକ୍ଷରୁ ଦିନ ଧାର୍ଯ୍ୟ ହୋଇଥିବା ବେଳେ ମାଙ୍କ ଆଜ୍ଞା ନେଇ ରବିବାର ଏହି ଶୁଭ ଖୁଣ୍ଟି ସ୍ଥାପନ କରାଯାଇଛି ।
ଏହି ଅବସରରେ ମନ୍ଦିର ପରିସରରେ ଗଞ୍ଜାମ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେଙ୍କ ଉପସ୍ଥିତିରେ ଏଭଳି ଶୁଭଖୁଣ୍ଟି ସ୍ଥାପନ ସହ ପୂଜାର୍ଚ୍ଚନା କରାଯାଇଛି । ମନ୍ଦିରର ସେବାୟତ, ପରିଚାଳନା କମିଟି ଏବଂ ଜିଲ୍ଲା ପ୍ରଶାସନର ବହୁ ଅଧିକାରୀ ଉପସ୍ଥିତିରେ ଏହି କାର୍ଯ୍ୟ ଆୟୋଜିତ ହୋଇଥିବା ବେଳେ ପ୍ରତିଷ୍ଠା ପାଇଁ ସମସ୍ତ ପ୍ରସ୍ତୁତି ଆରମ୍ଭ ହୋଇଛି । ୨୦୦୪ରେ ମସିହାରୁ ପ୍ରଥମେ ଆରମ୍ଭ ହୋଇଥିଲା ମାଆଙ୍କ ମନ୍ଦିରର ନବ କଳେବର କାର୍ଯ୍ୟ ।
ସେପଟେ ଦୀର୍ଘ ୧୮ ବର୍ଷ ଧରି ମନ୍ଦିର କାର୍ଯ୍ୟ ଚାଲିଥିବା ବେଳେ ବର୍ତ୍ତମାନ ଶେଷ ପର୍ଯ୍ୟାୟରେ ପହଞ୍ଚିଛି । ମନ୍ଦିର ପ୍ରତିଷ୍ଠା ତଥା ସଂସ୍କାର କରିବା ଲାଗି ମଇ ମାସ ୧୫ରୁ ୨୦ ତାରିଖ ଦିନ ଧାର୍ଯ୍ୟ କରାଯାଇଛି । ଏହି ପ୍ରତିଷ୍ଠା ଉତ୍ସବରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ଜଗତଗୁରୁ ଶଙ୍କରାଚାର୍ଯ୍ୟ ଓ ଗଜପତି ମହାରାଜାଙ୍କୁ ନିମନ୍ତ୍ରଣ କରାଯିବ ବୋଲି ପ୍ରସ୍ତାବ ରଖାଯାଇଛି ।
ସେହିଭଳି ମାଆଙ୍କ ମନ୍ଦିର ପୁନଃରୁଦ୍ଧାର ଓ ଉନ୍ନତିକରଣ ଲାଗି ୨୦୦୪ ମସିହାରେ ଗଠନ କରାଯାଇ ଥିବା ତାରାତାରିଣୀ ମନ୍ଦିର ଉନ୍ନୟନ ପରିଷଦ ମାଧ୍ୟମରେ ରାଜ୍ୟ ସରକାରଙ୍କ ଅନୁଦାନରେ କାର୍ଯ୍ୟ ଆରମ୍ଭ ହୋଇଥିଲା । ବିଭିନ୍ନ କାରଣରୁ ମନ୍ଦିର କାର୍ଯ୍ୟ ମନ୍ଥର ଗତିରେ ଚାଲିଥିବା ବେଳେ ଦୀର୍ଘ ୧୮ ବର୍ଷ ପରେ ମନ୍ଦିର କାର୍ଯ୍ୟ ଶେଷ ହୋଇଛି । ଏଥିଲାଗି ମନ୍ଦିର ପ୍ରତିଷ୍ଠା କରିବା ଲାଗି ମନ୍ଦିର ସେବାୟତ ଓ ମନ୍ଦିର ପରିଚାଳନା କମିଟି ପକ୍ଷରୁ ଜିଲ୍ଲା ପ୍ରଶାସନ ପକ୍ଷରୁ ନିବେଦନ ହୋଇଥିଲା ।
ଅନ୍ୟପଟେ ମନ୍ଦିର ନୀତିକାନ୍ତି ମନ୍ଦିର ସେବାୟତଙ୍କ ଦ୍ୱାରା ହେବାକୁ ଥିବା ବେଳେ ଶାନ୍ତି ଶୃଙ୍ଖଳାର ସହ ପ୍ରତିଷ୍ଠା ଉତ୍ସବ ଶେଷ କରିବା ଲାଗି ପୋଲିସ ପ୍ରଶାସନ ପକ୍ଷରୁ ସମସ୍ତ ପ୍ରକାର ବ୍ୟବସ୍ଥା ଗ୍ରହଣ କରାଯାଇଛି । ନାମଯଜ୍ଞ, ଘ୍ରୃତଯଜ୍ଞ, ଅନ୍ନଯଜ୍ଞ ଆୟୋଜନ କରାଯିବା ସହ ବହୁ ବ୍ରାହ୍ମଣ ଓ ପଣ୍ଡିତମାନେ ପ୍ରତିଷ୍ଠା ଉତ୍ସବରେ ଯୋଗ ଦେବେ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
