ବୌଦ୍ଧ: ଉପାନ୍ତ ଅଞ୍ଚଳକୁ ରାସ୍ତା ଖଣ୍ଡେ ପାଇଁ ଦାବି କରି ବିଫଳ ହେବାପରେ ଆଜି ଅଞ୍ଚଳର ଚାରିଖଣ୍ଡ ଗ୍ରାମବାସୀ ଦୀର୍ଘ ସମୟ ଧରି ଜାତୀୟ ରାଜପଥ ଅବରୋଧ କରିଥିଲେ । ପ୍ରତିଶ୍ରୁତି ପରେ ପ୍ରତିଶ୍ରୁତି । ରାସ୍ତା ଖଣ୍ଡେ ପାଇଁ ବାରମ୍ବାର ଗୁହାରି ପରେ ମଧ୍ୟ କୌଣସି ସୁଫଳ ନମିଳିବାରୁ ଆଜି ଅଞ୍ଚଳବାସୀ ଦୀର୍ଘ ସମୟ ଧରି ଜାତୀୟ ରାଜପଥ ଅବରୋଧ କରିଛନ୍ତି ।
ଘଟଣା ହେଉଛି ବୌଦ୍ଧ ଜିଲ୍ଲା ହରଭଙ୍ଗା ବ୍ଲକର ଚିର ଅବହେଳିତ ଆଢେଣୀଗଡ ପଞ୍ଚାୟତ । ଆଢେଣୀଗଡ ପଞ୍ଚାୟତର ଆଦିବାସୀ ଅଧ୍ୟୁଷିତ ତଥା ଉପାନ୍ତ ଅଞ୍ଚଳରେ ରହିଛି କଣ୍ଡରା, କାଚପାଜୁ, ବାଙ୍କପାଜୁ, ସୁଲକେଟି ଭଳି ଗ୍ରାମ । କିନ୍ତୁ ଏହି ଚାରି ଖଣ୍ଡ ଗ୍ରାମକୁ ଆଜି ପର୍ଯ୍ୟନ୍ତ ସବୁଦିନିଆ ରାସ୍ତା ଖଣ୍ଡେ ନିର୍ମାଣ ହୋଇପାରି ନାହିଁ । ଫଳରେ ଏଠାରେ ସରକାରଙ୍କ କୌଣସି ଯୋଜନା ଠିକରେ ପହଞ୍ଚି ପାରୁନାହିଁ ।
ବାରମ୍ବାର ଏନେଇ ଅଞ୍ଚଳବାସୀ ଗୁହାରି ପରେ ମଧ୍ୟ କୌଣସି ସୁଫଳ ନମିଳିବାରୁ ଆଜି ମାଧପୁର ଛକ ନିକଟରେ ଅଞ୍ଚଳବାସୀ ଦୀର୍ଘ ସମୟ ଧରି 57 ନମ୍ବର ଜାତୀୟ ରାଜପଥ ଅବରୋଧ କରିଥିଲେ । ଘଟଣା ସ୍ଥଳରେ ହରଭଙ୍ଗା ତହସିଲଦାର ପହଞ୍ଚି ଆନ୍ଦୋଳନକାରୀଙ୍କ ସହିତ ଆଲୋଚନା କରିବା ପରେ ରାସ୍ତା ଅବରୋଧ ହଟିଥିଲା ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
