ଭଦ୍ରକ: ମହାମାରୀ କୋରୋନା ସଂକ୍ରମଣ ଭୟ ପାଇଁ ଗତ ଦୁଇ ବର୍ଷ ଅନଲାଇନ ମାଧ୍ୟମରେ ମାଟ୍ରିକ ପରୀକ୍ଷା ହେଉଥିଲା । ତେବେ ବର୍ଷ ଅଫଲାଇନ୍ରେ ମୋଡରେ ପରୀକ୍ଷା ଦେଉଛନ୍ତି । ଯାହାକୁ ନେଇ ପିଲାମାନଙ୍କ ମଧ୍ଯରେ ପ୍ରବଳ ଉତ୍ସାହ ଦେଖାଦେଇଛି । ଚଳିତ ବର୍ଷ ଭଦ୍ରକ ଜିଲ୍ଲାର ମୋଟ ୧୨୪ଟି ପରୀକ୍ଷା କେନ୍ଦ୍ର କରାଯାଇଛି । ଜିଲ୍ଲାର ମୋଟ ୨୩ ହଜାର ୭୭ ଜଣ ରେଗୁଲାର ଏବଂ ଏକ୍ସ ରେଗୁଲାର ପରୀକ୍ଷାର୍ଥୀ ପରୀକ୍ଷା ଦେଉଛନ୍ତି ।
ସେହିପରି ଚଳିତ ବର୍ଷ ସର୍ବାଧିକ ୩୧ଟି ପରୀକ୍ଷା କେନ୍ଦ୍ର ଧାମନଗର ବ୍ଲକରେ ହୋଇଛି । ଜିଲ୍ଲାର ମୋଟ ୧୧ଟି ନୋଡାଲ ସେଣ୍ଟରରେ ପ୍ରଶ୍ନପତ୍ର ରଖାଯାଇଛି । ସେଠାରୁ ପ୍ରତ୍ୟେକ ଦିନ କଡା ସୁରକ୍ଷା ମଧ୍ୟରେ ପରୀକ୍ଷା କେନ୍ଦ୍ରକୁ ପ୍ରଶ୍ନପତ୍ର ଆସିବା ନେଇ ବ୍ୟବସ୍ଥା ହୋଇଛି ।
ଆଜି ଠାରୁ ୭ ତାରିଖ ପର୍ଯ୍ୟନ୍ତ ମାଟ୍ରିକ୍ ପରୀକ୍ଷା ଚାଲିବ । ତେଣୁ ଆଜି ସକାଳୁ ଛାତ୍ରଛାତ୍ରୀମାନେ ଆଗ୍ରହ ସହିତ ବିଭିନ୍ନ ପରୀକ୍ଷା କେନ୍ଦ୍ରରେ ପହଞ୍ଚି ପରୀକ୍ଷା ଦେଇଛନ୍ତି । ତେବେ କୋଭିଡ ପରେ ପ୍ରଥମ କରି ଅଫଲାଇନ୍ ମୋଡ଼ରେ ପରୀକ୍ଷା ହେଉଥିବାରୁ ସବୁ ପରୀକ୍ଷା କେନ୍ଦ୍ରରେ ବ୍ୟାପକ ବ୍ୟବସ୍ଥା ହୋଇଛି । ଛାତ୍ରଛାତ୍ରୀ ମାନେ ମଧ୍ୟ ଏହି ପରୀକ୍ଷାକୁ ନେଇ ବେଶ ଖୁସି ଥିବା କହିଛନ୍ତି । ଅନ୍ୟପଟେ ଆଜି କପି କରିବା ବେଳେ ୨ ଜଣ ଛାତ୍ର ଧରା ପଡିଥିବା ସୂଚନା ମିଳିଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
