ଭଦ୍ରକ: ଧାମନଗର ଉପନିର୍ବାଚନ ଫଳାଫଳ ପୂର୍ବରୁ ହିଂସାକାଣ୍ଡ(Dhamnagar Bypoll Violence) । ରାଜନୈତିକ ଆକ୍ରୋଶରେ ଶିକାର ହେଲେ ବାପା ଓ ଝିଅ । ଗତକାଲି ବିଳମ୍ବିତ ରାତିରେ ଧାମନଗର ନିର୍ବାଚନ ମଣ୍ଡଳୀ ଅନ୍ତର୍ଗତ ତିହିଡି ଥାନା ତଳଗୋପବିନ୍ଧା ପଞ୍ଚାୟତର ପାଇକ ସାହିରେ ନିର୍ବାଚନୀ ହିଂସାକାଣ୍ଡ ଦେଖିବାକୁ ମିଳିଛି । ଉପନିର୍ବାଚନ ମତଦାନକୁ କେନ୍ଦ୍ର କରି ଏଠାରେ ଦୁଇ ବାପ-ଝିଅଙ୍କ ଉପରେ ମରଣାନ୍ତକ ଆକ୍ରମଣ ହୋଇଥିବା ଅଭିଯୋଗ ହୋଇଛି । ଗୁରୁତର ଅବସ୍ଥାରେ ଦୁଇ ଜଣଙ୍କୁ ଭଦ୍ରକ ମେଡିକାଲରେ ଭର୍ତ୍ତି କରାଯାଇଛି ।
ସୂଚନା ମୁତାବକ, ଗତକାଲି ରାତିରେ ପାଇକ ସାହିର ଶଶିକାନ୍ତ ଜେନା କୌଣସି କାର୍ଯ୍ୟରେ ବାହାରକୁ ଯାଇଥିବା ବେଳେ କିଛି ଲୋକଙ୍କ ସହ ବଚସା ହୋଇଥିଲା । ଏହାକୁ ନେଇ ସେମାନେ ଶଶିକାନ୍ତଙ୍କ ଉପରେ ଆକ୍ରମଣ କରିଥିଲେ । ଶଶିକାନ୍ତଙ୍କ ଝିଅ ସଞ୍ଜିବନୀ ବେହେରାଙ୍କୁ ଏହାକୁ ପ୍ରତିବାଦ କରିବାକୁ ତାଙ୍କ ଉପରେ ମଧ୍ୟ ସଂଘବଦ୍ଧ ଆକ୍ରମଣ ହୋଇଥିଲା । ଏଥିରେ ଦୁଇ ବାପ-ଝିଅ ଗୁରୁତର ଆହତ ହୋଇଥିଲେ ।
ଉଭୟଙ୍କୁ ଭଦ୍ରକ ମେଡିକାଲରେ ଭର୍ତ୍ତି କରାଯାଇଥିବା ବେଳେ ସେମାନେ ଏବେ ଚିକିତ୍ସାଧୀନ ଅଛନ୍ତି । ତେବେ ଉପନିର୍ବାଚନରେ ମତଦାନକୁ କେନ୍ଦ୍ର କରି ଦୁହିଁଙ୍କ ଉପରେ ଏହି ମରଣାନ୍ତକ ଆକ୍ରମଣ ହୋଇଥିବା ଅଭିଯୋଗ ହୋଇଛି ।
ଇଟିଭି ଭାରତ, ଭଦ୍ରକ
