ବରଗଡ: ଧାନ ବିକ୍ରି ଉପରେ ହୋଇଥିବା ଟୋକନ ବ୍ୟବସ୍ଥା ବିରୋଧରେ ଲଗାତାର ଚାଷୀଙ୍କ ଆନ୍ଦୋଳନକୁ ଦେଖି ସରକାର ଆଲୋଚନା କରିବା ପରେ ଆନ୍ଦୋଳନ ପ୍ରତ୍ୟାହୃତ ହୋଇଛି । ଧାନ ବିକ୍ରିରେ ସ୍ବଚ୍ଛତା ଆଣିବାକୁ ସରକାର ଟୋକନ ବ୍ୟବସ୍ଥା କରିଥିଲେ । ଯାହାର ଦୃଢ ବିରୋଧ କରିଥିଲେ ଚାଷୀ । ଯାହାକୁ ନେଇ ବରଗଡ ଜିଲ୍ଲାରେ ଆନ୍ଦୋଳନକୁ ତୀବ୍ରତର କରିଥିଲେ ଚାଷୀ ।
ଚାଷୀଙ୍କ ଏମିତି ଆନ୍ଦୋଳନ ଦେଖି ରାଜ୍ୟ ସରକାର ଗୁରୁବାର ନିଜ ପ୍ରତିନିଧିଙ୍କୁ ଆନ୍ଦୋଳନରତ ଚାଷୀଙ୍କ ପାଖକୁ ପଠାଇ ସମାଧାନ କରିବାକୁ ନିର୍ଦ୍ଦେଶ ଦେଇଥିଲେ । ଫଳରେ ପ୍ରତିନିଧି ଭାବେ ମନ୍ତ୍ରୀ ସୁଶାନ୍ତ ସିଂ ଓ ରେଢାଖୋଲ ବିଧାୟକ ରୋହିତ ପୂଜାହାରୀ ଗୁରୁବାର ଚାଷୀଙ୍କ ସହ ଆଲୋଚନା କରି ଚାଷୀଙ୍କୁ ଧାନ ବିକ୍ରିରେ କୌଣସି ସମସ୍ୟା ହେବ ନାହିଁ ବୋଲି ପ୍ରତିଶୃତି ଦେଇଥିଲେ । ବରଗଡଠାରେ ଆନ୍ଦୋଳନରତ ଚାଷୀଙ୍କ ପାଖକୁ ପ୍ରଥମେ ବରଗଡ ବିଧାୟକ ଦେବେଷ ଆଚାର୍ଯ୍ୟ ଜିଲ୍ଲାପାଳ ଜ୍ୟୋତିରଞ୍ଜନ ପ୍ରଧାନ ଯାଇ ବିନା ଟୋକନରେ ମଧ୍ୟ ଚାଷୀ ଧାନ ବିକ୍ରି କରିପାରିବେ ବୋଲି କହିବା ସହ ଚାଷୀଙ୍କୁ ବୁଝାସୁଝା କରିଥିଲେ । ଏହାସହ ଟୋକନ ପାଇଁ କେହି କୌଣସି ଅସୁବିଧାର ସମ୍ମୁଖିନ ହେବେ ନାହିଁ ବୋଲି ଜିଲ୍ଲାପାଳ ଘୋଷଣା କରିଥିଲେ ।
ପରେ ଆନ୍ଦୋଳନସ୍ଥଳରେ ମନ୍ତ୍ରୀ ସୁଶାନ୍ତ ସିଂ ପହଞ୍ଚି ଚାଷୀଙ୍କ ସମସ୍ୟା ଶୁଣିଥିଲେ । ଚଳିତଥର ବରଗଡରେ କୌଣସି ଟୋକନ ବ୍ୟବସ୍ଥା ହେବ ନାହିଁ ବୋଲି ଘୋଷଣା ହେବା ପରେ ଚାଷୀ ଆନ୍ଦୋଳନରୁ ହଟିଥିଲେ ।
ବରଗଡରୁ ରାଜେସ ସରାପ, ଇଟିଭି ଭାରତ
