ଅନୁଗୋଳ: ଜିଲ୍ଲାରେ ଥମିବାର ନାଁ ନେଉନାହିଁ ହାତୀ ମଣିଷ ଲଢେଇ । ଅନେକ ସମୟରେ ହାତୀ ଆକ୍ରମଣରେ ଜୀବନ ଯାଇଥିବା ଖବର ସାମ୍ନାକୁ ଆସୁଛି । ପ୍ରତି ସପ୍ତାହରେ ଜଣେ ଦୁଇ ଜଣଙ୍କ ଜୀବନ ନେଉଛନ୍ତି ହାତୀ । ଗାଁ ଭିତରକୁ ଆସି ଅନେକ କ୍ଷୟକ୍ଷତି କରିବା ସହ ଧନଜୀବନ ନଷ୍ଟ କରୁଛନ୍ତି ହାତୀ ପଲ । ଏହାରି ଭିତରେ ଆଜି ପୁଣି ହାତୀ ଆକ୍ରମଣରେ ଦୁଇଜଣଙ୍କ ଜୀବନ ଯାଇଥିବା ସୂଚନା ମିଳିଛି । ଆମ୍ବ ଗୋଟାଇବା ପାଇଁ ଗାଁ ପାଖ ତୋଟାକୁ ଯାଇଥିବା ବେଳେ କଚାଡି ମାରିଲା ହାତୀ । ଆକ୍ରମଣରେ ଦୁଇ ଜଣ ମହିଳାଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ଘଟଣାସ୍ଥଳରେ ଜଣକର ମୃତ୍ୟୁ ହୋଇଥିବା ବେଳେ ଚିକିତ୍ସିତ ଅବସ୍ଥାରେ ଜଣକର ମୃତ୍ୟୁ ହୋଇଛି ।
ସୂଚନା ଅନୁସାରେ, ବନ୍ତଳା ବନାଞ୍ଚଳ ବଡ଼ କନ୍ତକୁଳ ଗାଁର ଦୁଇଜଣ ମହିଳା ଆମ୍ବ ଗୋଟାଇବା ପାଇଁ ପାଖ ଆମ୍ବ ତୋଟାକୁ ଯାଇଥିଲେ । ତେବେ ହଠାତ୍ ହାତୀ ଆସି ଆକ୍ରମଣ କରିଥିଲା । ହାତୀ ମଣିଷର ଲଢେଇ ଭିତରେ ପ୍ରାଣ ହରାଇଛନ୍ତି ଦୁଇ ମହିଳା । ମୃତ ଦୁଇ ମହିଳାମାନେ ହେଲେ ମୂଳି ପ୍ରଧାନ ଓ ଗୌରୀ ରାଉଳ । ହାତୀ ଆକ୍ରମଣରେ ଘଟଣାସ୍ଥକରେ ହିଁ ମୂଳି ପ୍ରଧାନର ମୃତ୍ୟୁ ହୋଇଥିଲା । ଖବର ପାଇ ଗାଁ ଲୋକେ ଗୌରୀକୁ ଗୁରୁତର ଅବସ୍ଥାରେ ଅନୁଗୋଳ ଡାକ୍ତରଖାନାରେ ଭର୍ତ୍ତି କରାଇଥିଲେ । ସେଠାରେ ଗୌରୀଙ୍କ ମଧ୍ୟ ମୃତ୍ୟୁ ହୋଇଥିଲା । ବନ ବିଭାଗ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି । ତେବେ ଏହି ଘଟଣାକୁ ନେଇ ସେ ଅଞ୍ଚଳରେ ଉତ୍ତେଜନା ଲାଗି ରହିଛି । ବାରମ୍ବାର ଏଭଳି ହାତୀ ଆକ୍ରମଣରେ ଅନୁଗୋଳ ଜିଲ୍ଲାରେ ଲୋକଙ୍କ ଜୀବନ ଯାଉଥିବା ବେଳେ ଏନେଇ ବିଭାଗ କୌଣସି କାର୍ଯ୍ୟାନୁଷ୍ଠାନ ନିଆଯାଉ ନଥିବା ଅଭିଯୋଗ ହେଉଛି । ବନ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ସ୍ଥିତି ଯାଞ୍ଚ କରିବା ସହ ସ୍ଥାନୀୟ ଲୋକଙ୍କୁ ବୁଝାସୁଝା କରୁଛନ୍ତି ।
ଏନେଇ ସହକାରୀ ବନ ସଂରକ୍ଷକ କହିଛନ୍ତି," ଆମେ ଲୋକମାନଙ୍କୁ ରାତି ଅଧରେ ଆମ୍ବ ଗୋଟାଇ ପାଇଁ ନଯିବା ପାଇଁ ତାଗିଦ କରିବା ସତ୍ତ୍ବେ ମଧ୍ୟ ସେମାନେ କଥା ଶୁଣୁ ନାହାନ୍ତି । ସେଠାରେ ରାତିରେ ୩ଟି ହାତୀ ରହୁଥିବାରୁ ରାତିରେ ଲୋକଙ୍କୁ ଦେଖିଲେ ଆକ୍ରମଣ କରୁଛନ୍ତି । ଗ୍ରାମର ଦୁଇ ମହିଳା ସକାଳ ୫ଟାରେ ଆମ୍ବ ଗୋଟାଇବା ପାଇଁ ଯାଇଥିବା ବେଳେ ହାତୀ ଆକ୍ରମଣ କରିଥିଲା । ଫଳରେ ଦୁଇଜଣ ମହିଳା ପ୍ରାଣ ହରାଇଛନ୍ତି । ଆମର ନିୟମ ଅନୁସାରେ ପ୍ରତି ମୃତ ମହିଳାଙ୍କ ପରିବାରକୁ ୪ ଲକ୍ଷ ଟଙ୍କାର ସହାୟତା ଅନୁକମ୍ପା ରାଶି ପ୍ରଦାନ କରିବୁ ।"
ଇଟିଭି ଭାରତ, ଅନୁଗୋଳ
