ଅନୁଗୋଳ: ଚିଲିକା ବିଧାୟକ ପ୍ରଶାନ୍ତ ଜଗଦ୍ଦେବ ଲୋକଙ୍କ ଉପରେ ଗାଡ଼ି ଚଢ଼ାଇବା ଘଟଣାକୁ ନେଇ ଚାରିଆଡ଼େ ଜୋର ଧରୁଛି ପ୍ରତିବାଦ। ତାଙ୍କୁ ବିଧାୟକ ପଦ ରଦ୍ଦ କରିବା ସହ ତାଙ୍କ ବିରୁଦ୍ଧରେ କଡ଼ା କାର୍ଯ୍ୟାନୁଷ୍ଠାନ ନେବାକୁ ବିଭିନ୍ନ ସଂଗଠନ ପକ୍ଷରୁ ଦାବି ହେଉଛି । ତାଙ୍କ ବିରୁଦ୍ଧରେ ଦୃଷ୍ଟାନ୍ତମୂଳକ ଦଣ୍ଡବିଧାନ ପାଇଁ ଏସୟୁସିଆଇ(କମ୍ୟୁନିଷ୍ଟ) ପକ୍ଷରୁ ପ୍ରତିବାଦ ପ୍ରଦର୍ଶନ ହୋଇଥିବା ଦେଖିବାକୁ ମିଳିଛି ।
ଖୋର୍ଦ୍ଧା ଜିଲ୍ଲା ବାଣପୁର ବ୍ଲକ ଅଫିସ ସମ୍ମୁଖରେ ସମୂହ ଜନତାଙ୍କ ଉପରେ ଗାଡି ଚଢ଼ାଇ ବିଧାୟକଙ୍କ ଏଭଳି ବର୍ବରକାଣ୍ଡ ନେଇ ତାଙ୍କୁ ତୁରନ୍ତ ଗିରଫ କରିବା ପାଇଁ ଏସୟୁସିଆଇ କମ୍ୟୁନିଷ୍ଟ ପକ୍ଷରୁ ଦାବି କରାଯାଇଛି । ଏହି ଦୁର୍ଘଟଣାରେ ଆହତ ବ୍ୟକ୍ତିମାନଙ୍କର ଉପଯୁକ୍ତ ଚିକିତ୍ସାର ସମସ୍ତ ଖର୍ଚ୍ଚ ସରକାରଙ୍କ ଦ୍ବାରା ଯୋଗାଇଦେବା ଦାବିରେ ଆଜି ଅନୁଗୋଳ ଜିଲ୍ଲା ବସଷ୍ଟାଣ୍ଡ ଠାରେ ଏହି ପ୍ରତିବାଦ ସଭା କରାଯାଇଛି । ବିଜେଡି-ବିଜେପି-କଂଗ୍ରେସ ଭଳି ଦଳମାନଙ୍କର ପ୍ରତ୍ୟକ୍ଷ ପରିଚାଳନାରେ ହେଉଥିବା ରାଜନୀତିର ଅପରାଧୀକରଣ ବନ୍ଦ କରିବା ପାଇଁ ଦଳ ଚେତାବନୀ ଦେଇଛି । ଦଳର ଆଞ୍ଚଳିକ କମିଟି ସମ୍ପାଦକ ବ୍ରଜବନ୍ଧୁ ସାହୁଙ୍କ ସଭାପତିତ୍ବରେ ଏହି ପ୍ରତିବାଦ ଅନୁଷ୍ଠିତ ହୋଇଛି ।
ପ୍ରତିବାଦ ସଭାରେ ଜିଲ୍ଲା କମିଟି ସଭ୍ୟ ସଞ୍ଜୟ ସାହୁ, ଆଇନଜୀବୀ ପ୍ରମୋଦ କୁମାର ପ୍ରଧାନ, ବିଷ୍ଣୁ ସାହୁ, ଜ୍ୟୋତ୍ସ୍ନା ସାମଲ, ନିରଞ୍ଜନ ନାୟକ, ଶାଶ୍ଵତ ସାହୁ, ପ୍ରତିମା ବେହେରା ପ୍ରମୁଖ ସାମିଲ ହୋଇଥିଲେ । ଏହି ଘଟଣାଟି ଲଖିମପୁର ଖେରୀ ହିଂସାକାଣ୍ଡର ପୂନରାବୃତ୍ତି ବୋଲି ସଂଗଠନ ପକ୍ଷରୁ କୁହାଯାଇଛି। ତେଣୁ ଏହି ଅପରାଧ ରାଜନୀତିକୁ ତୁରନ୍ତ ବନ୍ଦ କରିବାକୁ ପ୍ରତିବାଦ ବେଳେ ଦୃଢ଼ ଦାବି ଉପସ୍ଥାପନ କରାଯାଇଥିଲା।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
