ନ୍ୟୁୟର୍କ: ଜାରି ରହିଥିବା ୟୁଏସ ଓପନର ଫାଇନାଲରେ ପ୍ରବେଶ କରିଛନ୍ତି । ଡାନିଲ ମେଡଭେଡେଭଙ୍କୁ ସେମିରେ ପରାସ୍ତ କରି ଏହି ଯୋଗ୍ୟତା ହାସଲ କରିଛନ୍ତି ଥିମ । ସେକେଣ୍ଡ ସିଡେଡ ଡୋମିନିକ ରବିବାର ନମ୍ବର 5 ସିଡ ଆଲେକଜାଣ୍ଡାର ଭେରେଭଙ୍କ ସହ ଗ୍ରାଣ୍ଡ ସ୍ଲାମ ଟାଇଟଲ ପାଇଁ ମୁକାବିଲା କରିବେ ।
ନିଜର ପାରମ୍ପରିକ ଷ୍ଟାଇଲରେ ଖେଳି ସେମି ଫାଇନାଲରେ ମେଡଭେଡେଭଙ୍କୁ 6-2, 7-6(7), 7-6(5) ସେଟରେ ପରାସ୍ତ କରିଥିଲେ ଥିମ ।
ମ୍ୟାଚ ପରେ ଡୋମିନିକ କହିଛନ୍ତି ଯେ, ‘‘ପ୍ରଥମ ସେଟ ପରେ ଏହା ସହଜରେ ଟୁ ସେଟ୍ସ ୱାନ ଡାଉନ ହୋଇପାରିଥାନ୍ତା । ସେଟ ଗୁଡ଼ିକର ଶେଷ ଆଡ଼କୁ ମୁଁ ମୋର ଶ୍ରେଷ୍ଠ ଟେନିସ ପ୍ରଦର୍ଶନ କରିଛି ଆଉ ଉଭୟ ଟାଇବ୍ରେକର ଖୁବ ଭଲ ଥିଲା । କିନ୍ତୁ ମାନସିକ ସ୍ତରରେ ଟାଇବ୍ରେକର ଏକ କଷ୍ଟସାଧ୍ୟ କାର୍ଯ୍ୟ । ସତ କହିବାକୁ ଗଲେ ମତେ ତାହା ବିଲକୁଲ ଭଲ ଲାଗେ ନାହିଁ ।’’
ପୂର୍ବରୁ ଥିମଙ୍କ ପାଖରେ ଗ୍ରାଣ୍ଡ ସ୍ଲାମ ଟାଇଟଲ ଜିତିବା ପାଇଁ ତିନୋଟି ସୁଯୋଗ ଥିଲା । କିନ୍ତୁ କ୍ରମାଗତ ଭାବେ 2018 ଓ 2019ରେ ଦୁଇଥର ରାଫେଲ ନାଡାଲଙ୍କ ଠାରୁ ଫ୍ରେଞ୍ଚ ଓପନ ହାରିବା ପରେ ଚଳିତ ବର୍ଷ ବିଶ୍ବର ଏକ ନମ୍ବର ଟେନିସ ଖେଳାଳି ନୋଭାକ ଜୋକୋଭିକଙ୍କ ଠାରୁ ଅଷ୍ଟ୍ରେଲିଆ ଓପନ ମଧ୍ୟ ହାରି ଯାଇ ଡୋମିନିକ ଟାଇଟଲ ହାତେଇବାରୁ ବଞ୍ଚିତ ହୋଇଥିଲେ ।
ସୂଚନାଯୋଗ୍ୟ ଯେ ଡୋମିନିକଙ୍କ ବାମ ଗୋଡର ଗଣ୍ଠିରେ ଆଘାତ ଲାଗିବା ପରେ ସେ ସୁସ୍ଥ ହୋଇଥିଲେ ଓ ବର୍ତ୍ତମାନ ନିଜର ପ୍ରଥମ ୟୁଏସ ଓପନ ଫାଇନାଲ ଖେଳିବେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
