ନୂଆଦିଲ୍ଲୀ: ହକି କିମ୍ବଦନ୍ତୀ ମେଜର ଧ୍ୟାନଚାନ୍ଦଙ୍କ ନାମରେ 'ଖେଳରତ୍ନ' ପୁରସ୍କାର ନାମିତ ହେବାପରେ ଖୁସିବ୍ୟକ୍ତ କରିଛନ୍ତି ଭାରତୀୟ ପୁରୁଷ ହକି ଟିମର ଗୋଲ୍କିପର ପିଆର ଶ୍ରୀଜେଶ । ଜଣେ ଖେଳାଳି ଭାବେ ଏହା ଗର୍ବର ମୂହୂର୍ତ୍ତ ବୋଲି କହିଛନ୍ତି ଶ୍ରୀଜେଶ । ଶ୍ରୀଜେଶ କହିଛନ୍ତି, 'ଦାଦା ଧ୍ୟାନଚାନ୍ଦ ଭାରତ ରତ୍ନ ପାଇବାକୁ ଉପଯୁକ୍ତ ବ୍ୟକ୍ତି । ଜଣେ ହକି ଖେଳାଳି ଭାବେ ଏହା ଗୌରବ ମୂହୂର୍ତ୍ତ ଯେ, ବର୍ତ୍ତମାନ ତାଙ୍କ ନାମରେ ଖେଳରତ୍ନ ନାମିତ ହୋଇଛି ।"
୩ ଥରର ଅଲମ୍ପିଆନ ଶ୍ରୀଜେଶ ଆହୁରି କହିଛନ୍ତି, " ଆମେ ଅନେକ ବର୍ଷ ଧରି ଏଥିପାଇଁ ଅପେକ୍ଷା କରିଥିଲୁ । ଯେତେବେଳେ ଖେଳାଳିଟିଏ ହକି ଖେଳିବା ଆରମ୍ଭ କରେ, କେବଳ ଗୋଟିଏ କଥା ମନରେ ଥାଏ ଯେ ଯେବେବି ଅଲମ୍ପିକ ଖେଳିବାକୁ ଯିବୁ ପଦକ ବିଜୟୀ ହୋଇ ଫେରିବୁ । ଏବେ ଟିମ ବ୍ରୋଞ୍ଜ ପଦକ ଜିତି ଫେରିଛି । ଏହା ସମସ୍ତଙ୍କ ପ୍ରଶ୍ନର ଉତ୍ତର ଥିଲା । ଭବିଷ୍ୟତରେ ଯେଉଁମାନେ ମଧ୍ୟ ହକି ଖେଳିବେ ଅଲମ୍ପିକ୍ରେ ପଦକ ଜିତିବାକୁ ସ୍ବପ୍ନ ଦେଖିବେ ।"
ଜର୍ମାନୀ ବିପକ୍ଷ ବ୍ରୋଞ୍ଜ ପଦକ ମ୍ୟାଚ୍ରେ ୧୩ଟି ପେନାଲିଟି କର୍ଣ୍ଣରକୁ ରୋକିଥିଲେ ଶ୍ରୀଜେଶ । ବ୍ରୋଞ୍ଜ ପଦକ ମ୍ୟାଚର ଶେଷ ସେକେଣ୍ଡରେ ୧୩ତମ ପେନାଲିଟି କର୍ଣ୍ଣରକୁ ଅଟକାଇ ଭାରତର ବ୍ରୋଞ୍ଜ ବିଜୟରେ ମୋହର ମାରିଥିଲେ । ଫଳରେ ୫-୪ରେ ମେନ ଇନ ବ୍ଲୁ ଜର୍ମାନ ଟିମକୁ ହରାଇବାରେ ସଫଳ ହୋଇଥିଲା ।
୧୯୮୦ ମସ୍କୋ ଅଲମ୍ପିକ ପରେ ଏହା ଭାରତର ପ୍ରଥମ ପଦକ । ଶେଷ ମିନିଟର ପେନାଲିଟି କର୍ଣ୍ଣରକୁ ନେଇ ଶ୍ରୀଜେଶ କହିଛନ୍ତି, "ସଂପୂର୍ଣ୍ଣ ମ୍ୟାଚ୍ ମୋ ଜୀବନର ସବୁଠୁ ଗୁରୁତ୍ବପୂର୍ଣ୍ଣ ସେକେଣ୍ଡ ଥିଲା, ଏହା ଗୁରୁତ୍ବ ରଖେନି ଶେଷ ମିନିଟ ଗୋଲ୍ କିମ୍ବା ପ୍ରଥମ ମିନିଟ ଗୋଲ୍, ଯଦି ପରାଜୟ ମିଳେ ତୁମେ ପରାଜିତ । ମ୍ୟାଚ୍ର ସଂପୂର୍ଣ୍ଣ ୬୦ ମିନିଟ ଫୋକସ ରଖିବାକୁ ପଡେ, ଯେତେବେଳେ ପ୍ରତିପକ୍ଷ ଟିମ ଶେଷ ମିନିଟରେ ପେନାଲିଟ କର୍ଣ୍ଣର ହାସଲ କରେ ଏହା ଅଧିକ ଅତିରିକ୍ତ ଚାପ ସୃଷ୍ଟି କରିଥାଏ ।"
ବ୍ୟୁରୋ ରିପୋର୍ଟ, ଇଟିଭି ଭାରତ
