ଲଣ୍ଡନ: ନିଜ କ୍ୟାରିଅରରେ ଭାରତ ବିପକ୍ଷରେ ସର୍ବାଧିକ ୱିକେଟ ନେଇଛନ୍ତି ଜେମ୍ସ ଆଣ୍ଡରସନ । ସର୍ବାଧିକ ୱିକେଟ ନେବା ସହ ଆଣ୍ଡରସନଙ୍କ ସହ ଭାରତକୁ ନେଇ ଆଉ ଏକ ରେକର୍ଡ ମଧ୍ୟ ରହିଛି । ବର୍ତ୍ତମାନ ସୁଦ୍ଧା ଭାରତ ବିପକ୍ଷରେ ଟେଷ୍ଟ ସିରିଜ ଇତିହାସରେ ଭାରତୀୟ ଖେଳାଳିଙ୍କ ସହ ଅଧିକ ବିବାଦରେ ରହିଛନ୍ତି ଜେମ୍ସ ଆଣ୍ଡରସନ ।
୨୦୧୧ରେ ଭାରତ ଇଂଲଣ୍ଡଠାରୁ ୪-୧ରେ ଟେଷ୍ଟ ସିରିଜ ପରାଜିତ ହୋଇଥିଲା । ଏହାପରେ ପୁନଃ ୨୦୧୨ରେ ଭାରତ ଓ ଇଲଂଣ୍ଡ ମଧ୍ୟରେ ଖେଳାଯାଇଥିବା ଟେଷ୍ଟ ସିରିଜରେ ଇଂଲଣ୍ଡ ୨-୧ରେ ବିଜୟୀ ହୋଇଥିଲା । ଉଭୟ ସିରିଜରେ ଇଂଲଣ୍ଡର ଫାଷ୍ଟ ବୋଲର ଜେମ୍ସ ଆଣ୍ଡରସନ ପ୍ରମୁଖ ଭୁମିକା ଗ୍ରହଣ କରିଥିଲେ । ୨୦୧୨ ଟେଷ୍ଟ ମ୍ୟାଚ ସିରିଜରେ ପ୍ଲେୟାର ଅଫ ଦି ସିରିଜ ବିବେଚିତ ହୋଇଥିଲେ ଜେମ୍ସ ଆଣ୍ଡରସନ । ତେବେ ଏହାପରେ ୨୦୧୪ ମସିହାରେ ଖେଳାଯାଇଥିବା ଟେଷ୍ଟ ସିରିଜ ବିବାଦ ଘେରକୁ ଆସିଥିଲେ ଆଣ୍ଡରସନ ।
୨୦୧୪ ଜାଡେଜା ଟନେଲ କ୍ରସ୍ ବିବାଦ
୨୦୧୪ରେ ଟେଣ୍ଟ ବ୍ରିଜରେ ଖେଳଯାଉଥିବା ଟେଷ୍ଟ ମ୍ୟାଚ ଦ୍ବିତୀୟ ଦିନରେ ରନ୍ ନେବା ବେଳେ ରବିନ୍ଦ୍ର ଜାଡେଜାଙ୍କ ଆଗକୁ ଚାଲି ଆସିଥିଲେ ଆଣ୍ଡରସନ । ଏହାକୁ ନେଇ ପଡ଼ିଆରେ ଦୁହିଁଙ୍କ ମଧ୍ୟରେ କିଛି କଥା କଟାକଟି ଦେଖିବାକୁ ମିଳିଥିଲା । ତେବେ ମାମଲା କେବଳ ପଡ଼ିଆରେ ସୀମିତ ହୋଇ ରହିଲା ନାହିଁ । ଡ୍ରେସିଂରୁମକୁ ଯିବା ବେଳେ ଆଣ୍ଡରସନ ଜାଡୋଜା ହାତାହାତି ହୋଇଥିବା ଖବର ପଦାକୁ ଆସିଥିଲା । ଦୁହିଁଙ୍କ ମଧ୍ୟରେ ଆଇସିସି ଆଚାର ସହିଂତାର ଲେବଲ-୩ ଯାଞ୍ଚ କରାଯାଇଥିଲା । ତେବେ ଏହାର କୌଣସି ଭିଡିଓ ଆଇସିସିକୁ ମିଳି ପାରିନଥିଲା । ଏହାପରେ ଆଇସିସି ତଦନ୍ତ ଆଧାରରେ ଜାଡେଜାଙ୍କୁ ଲେବଲ ୧ରେ ଦୋଷୀ ସାବ୍ୟସ୍ତ ହେବାକୁ ପଡ଼ିଥିଲା । ଯାହାଫଳରେ ଜାଡେଜାଙ୍କ ୫୦ ପ୍ରତିଶତ ମ୍ୟାଚ ଫିସ୍ କାଟି ଦିଆଯାଇଥିଲା । ତେବେ ଏହି ମାମଲାରେ ଆଣ୍ଡରସନଙ୍କ ବିପକ୍ଷରେ କୌଣସି କାର୍ଯ୍ୟାନୁ୍ଷ୍ଠାନ ନିଆଯାଇନଥିଲା ।
କ୍ୟାପଟେନ ବିରୋଧୀ ମନ୍ତବ୍ୟ ସହିବୁ ନାହିଁ
ଏହି ଘଟଣାକୁ ନେଇ ତତ୍କାଳୀନ ଭାରତୀୟ ଅଧିନାୟକ ମହେନ୍ଦ୍ର ସିଂହ ଧୋନି ଅସନ୍ତୋଷ ମଧ୍ୟ ଜାହିର କରିଥିଲେ । ଏହାପରେ ପୁନଃ ୨୦୧୬ ଟେଷ୍ଟ ସିରିଜରେ ଆଣ୍ଡରସନଙ୍କ ବିରାଟ କୋହଲିଙ୍କୁ କଟାକ୍ଷ କରି ଟିପ୍ପଣୀ ଦେବା ଆରମ୍ଭ କରି ଦେଇଥିଲେ । ୨୦୧୪ ଟେଷ୍ଟ ସିରିଜରେ ବିରାଟ କୋହଲିଙ୍କ ପ୍ରଦର୍ଶନ ଏତେଟା ଖାସ୍ ନଥିଲା । ସେ ବାରମ୍ବାର ଆଣ୍ଡରସନଙ୍କ ବଲରେ ଆଉଟ ହୋଇଥିଲେ । ତେବେ ୨୦୧୬ରେ ଅଧିନାୟକ ଭାବରେ ସେ ଦମଦାର୍ ପ୍ରଦର୍ଶନ କରି ଶତକ ଓ ଅର୍ଦ୍ଧ ଶତକ ହାସଲ କରିଥିଲେ । ଏହାସହ ଆଣ୍ଡରସନ ମଧ୍ୟ କୋହଲିଙ୍କୁ ଆଉଟ କରିବାରେ ଅସମର୍ଥ ରହିଥିଲେ ।
ମୁମ୍ବାଇରେ ଖେଳାଯାଉଥିବା ଏହି ମ୍ୟାଚରେ ଭାରତ ବିଜୟୀ ହୋଇଥିଲା । ମ୍ୟାଚ ଶେଷ ହେବାପରେ ଆଣ୍ଡରସନଙ୍କୁ କଡ଼ା ଶବ୍ଦ ଶୁଣାଇଥିଲେ ଭାରତୀୟ ଅଫସ୍ପିନର ରବିଚନ୍ଦ୍ରନ ଅଶ୍ବିନ । ଯାହାଫରେ ମ୍ୟାଚ ଶେଷ ହେବାପରେ ମଧ୍ୟ ଉଭୟଙ୍କ ମଧ୍ୟରେ କଥା କଟାକଟି ହୋଇଥିଲା । ଏହାକୁ ନେଇ ଅଶ୍ବିନଙ୍କୁ ସମାଲୋଚନା କରିଥିଲେ ଇଂଲଣ୍ଡର ତତ୍କାଳୀନ ଅଧିନାୟକ ଆଲିଷ୍ଟାର କୁକ୍ ।
୨୦୨୧ରେ ବି ଆଣ୍ଡରସନଙ୍କ ସହ ବିବାଦ
ଆଣ୍ଡରସନଙ୍କ ଭାରତୀୟ ଖେଳାଳି ଓ ଭାରତୀୟ ଖେଳାଳିଙ୍କ କଥା କଟାକଟି ବର୍ତ୍ତମାନ ଚାଲିଥିବା ଟେଷ୍ଟ ସିରିଜ ମଧ୍ୟ ଜାରି ରହିଛି । ଦ୍ବିତୀୟ ଟେଷ୍ଟ ମ୍ୟାଚର ପଞ୍ଚମ ଦିନରେ ସାମି ଓ ବୁମରା ଭଲ ବ୍ୟାଟିଂ କରିଥିଲେ । ସେହି ସମୟରେ ୱକେଟକିପର ଜୋଶ ବଟଲର ତାଙ୍କୁ ସ୍ଲେଜିଂ କରିବା ନାଁରେ କଟାକ୍ଷ କରିଥିଲେ । ଯାହାକୁ ନେଇ ବୁମରା ଓ ଜୋଶ ବଟଲରଙ୍କ ମଧ୍ୟରେ ବିବାଦ ଦେଖା ଦେଇଥିଲା । ଏହାର ରାଗ ରଖି ଯେତେବେଳେ ଶେଷ ୱିକେଟ ପାଇଁ ପିଚରେ ଆଣ୍ଡରସନ ଓ ବଟଲର ବ୍ୟାଟିଂ କରୁଥିଲେ । ସେତେବେଳେ ବୁମରା ଆଣ୍ଡରସନ ଓ ବଟଲରଙ୍କୁ ସଟ୍ ବଲ ପକାଇଥିଲେ । ଏହାକୁ ନେଇ ଆଣ୍ଡରସନ ବୁମରାଙ୍କୁ କିଛି କହିଥିବା ରିପୋର୍ଟ ରହିଛି ।
ମ୍ୟାଚରେ ଭାରତ ବିଜୟୀ ହେବାପରେ ଅଧିନାୟକ ବିରାଟ କୋହଲି ମଧ୍ୟ ଏହି ଘଟଣାକୁ ନେଇ ପ୍ରତିକ୍ରିୟା ରଖିଥିଲେ । ମ୍ୟାଚ ଶେଷ ହେବାପରେ ବିରାଟ କୋହଲି କହିଥିଲେ ଯେ, "ପଞ୍ଚମ ଦିନ ସକାଳେ ଭାରତୀୟ ଖେଳାଳିଙ୍କ ସହ ଯାହା ବି ହେଲା ତାହା ଆମକୁ ଭଲ ଖେଳ ଦେଖାଇବାକୁ ଅଧିକ ପ୍ରେରଣା ଦେଇଥିଲା । ଯାହା ଦ୍ବାରା ଆମେ ମ୍ୟାଚରେ ବିଜୟୀ ହୋଇ ପାରିଛୁ ।"
ଭାରତ ଓ ଇଂଲଣ୍ଡ ମଧ୍ୟରେ ଆହୁରି ୩ଟି ମ୍ୟାଚ ଖେଳାଯିବ । ତୃତୀୟ ମ୍ୟାଚ ଲିଡ୍ସରେ ଆସନ୍ତା ୨୫ ତାରିଖରୁ ଆରମ୍ଭ ହେବ । ତେବେ ଏଥିରେ ଉଭୟ ଦଳର ଖେଳ ଉପରେ ଫ୍ୟାନଙ୍କ ନଜର ।
ବ୍ୟୁରୋ ରିପୋର୍ଟ, ଇଟିଭି ଭାରତ
