ହାଇଦ୍ରାବାଦ: ଆଇପିଏଲର 14ତମ ସଂସ୍କରଣରେ କୋରୋନାର କଳାବାଦଲ ଆଶଙ୍କା ବଢାଇଲାଣି । କେକେଆରର ଦୁଇ ଖେଳାଳି କୋଭିଡ-19 ପଜିଟିଭ ଚିହ୍ନଟ ପରେ ଏବେ ଚେନ୍ନାଇ ସୁପର କିଙ୍ଗ୍ସ କ୍ୟାମ୍ପରୁ ମଧ୍ୟ ଖରାପ ଖବର ସାମ୍ନାକୁ ଆସିଛି । ସିଏସକେ ଟିମର 3 ସଦସ୍ୟ କୋରୋନା ସଂକ୍ରମିତ ହୋଇଥିବା ଜଣାପଡିଛି ।
ଏକ ସ୍ପୋର୍ଟ୍ସ ୱେବସାଇଟରେ ପ୍ରକାଶିତ ସୂଚନା ଅନୁଯାୟୀ, ଚେନ୍ନାଇ ସୁପର କିଙ୍ଗ୍ସର ସିଇଓ କାଶୀ ବିଶ୍ବନାଥନ, ବୋଲିଂ କୋଚ୍ ଲକ୍ଷ୍ମୀପତି ବାଲାଜି ଓ ବସ କ୍ଳିନର କୋରୋନା ପଜିଟିଭ ଚିହ୍ନଟ ହୋଇଛନ୍ତି । ତେବେ ଫ୍ୟାନ୍ସଙ୍କ ପାଇଁ ଆଶ୍ବସ୍ଥିକର ଖବର ଏହା ଯେ, ଟିମର କୌଣସି ଖେଳାଳି ଏଥିରେ ସାମିଲ ନାହାନ୍ତି ।
ସିଏସକେର ସମସ୍ତ ଖେଳାଳିଙ୍କ ରିପୋର୍ଟ ନେଗେଟିଭ ଆସିଛି । କୋରୋନାର ଦ୍ବିତୀୟ ଲହର ସାରା ଭାରତରେ ଆତଙ୍କ ଖେଳାଇଛି । ଏପରି ସମୟରେ ଗୋଟିଏ ଦିନରେ ଗୋଟିଏ ପରେ ଗୋଟିଏ ଦୁଇଟି ଏପରି ଖବର ଆସିବା ପରେ, ସୋସିଆଲ ମିଡିଆରେ ଆଇପିଏଲକୁ ଅଧାରେ ରୋକିଦେବାକୁ ଦାବି ହେବାରେ ଲାଗିଲାଣି ।
କେକେଆର ଟିମର ସ୍ପିନର ବରୁଣ ଚକ୍ରବର୍ତ୍ତୀ ଓ ଦ୍ରୁତ ବୋଲାର ସନ୍ଦୀପ ୱାରିୟର କୋରୋନା ପଜିଟିଭ ଚିହ୍ନଟ ହୋଇଛନ୍ତି । ଏହାପରେ ଆଇପିଏଲର 14ତମ ସଂସ୍କରଣରେ ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ସହ କୋଲକାତା ମଧ୍ୟରେ ଖେଳାଯିବାକୁ ଥିବା ମ୍ୟାଚ ସ୍ଥଗିତ ରଖାଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
