ପୁରୀ: କୋଭିଡ ଗାଇଡ଼ ଲାଇନ ନିୟମ ଉଲଘଂନକୁ ନେଇ ସତ୍ୟବାଦୀ ବିଧାୟକ ଉମାକାନ୍ତ ସାମନ୍ତରାୟଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି । ସିଆରପିସି-୪୧(ଏ) ଅନୁଯାୟୀ କାରଣ ଦର୍ଶାଅ ନୋଟିସ ହୋଇଛି । ଉମାଙ୍କ ସରକାରୀ ବାସଭବନରେ ସମୁଦ୍ର କୂଳ ଥାନାର ଟିମ୍ ପହଞ୍ଚି ଏ ନେଇ ନୋଟିସ ଦେବା ସହ ଉକ୍ତ ମାମଲା ସଂପର୍କରେ ତଦନ୍ତ କରିଛନ୍ତି । ତେବେ ମାମଲା କୁ ନେଇ ତଦନ୍ତ ରେ ପୋଲିସ କୁ ସହଯୋଗ କରିବା ପାଇଁ ଉମା ସାମନ୍ତରାୟଙ୍କୁ ନୋଟିସ୍ କରାଯାଇଛି ।
କୋଭିଡ୍ ପଜିଟିଭ ଥାଇ ମଧ୍ୟ ସ୍ୱର୍ଗତ ବିଜେଡି ବିଧାୟକ ତଥା ପୂର୍ବତନ ମନ୍ତ୍ରୀ ପ୍ରଦୀପ ମହାରଥୀଙ୍କ ଅନ୍ତିମ ସଂସ୍କାରରେ ସାମିଲ ହୋଇଥିଲେ ଉମାକାନ୍ତ ସାମନ୍ତରାୟ । କୋରୋନା ଆକ୍ରାନ୍ତ ଥାଇ ବି ସେ ସଙ୍ଗରୋଧରେ ନରହି ଅନ୍ତିମ ସଂସ୍କାରରେ ସାମିଲ ହୋଇଥିବା ନେଇ ବିଧାୟକଙ୍କ ବିରୋଧରେ ଅଭିଯୋଗ ଆଣିଥିଲେ ଉଭୟ ବିଜେପି ଯୁବ ମୋର୍ଚ୍ଚା ଏବଂ ଜଗନ୍ନାଥ ସେନା । ସେପଟେ ଅନ୍ତିମ ସଂସ୍କାରରେ ସାମିଲ ହୋଇଥିବା ନେଇ ନିଜ ଭୁଲକୁ ସ୍ୱୀକାର କରିଛନ୍ତି ଏବଂ କ୍ଷମା ମାଗିଛନ୍ତି ।
ବିଧାୟକଙ୍କ କହିବାନୁସାରେ, ସଂକ୍ରମିତ ଥାଇ ସ୍ୱର୍ଗଦ୍ୱାର ଯିବା ଏବଂ ଅନ୍ତିମ ସଂସ୍କାରରେ ଯୋଗ ଦେବା ମୋର ପାଇଁ ସଂପୂର୍ଣ୍ଣ ଭୁଲ୍ ଥିଲା । ସରକାରଙ୍କ ଆଇନ ଉଦ୍ଧ୍ୱର୍ରେ କେହି ନୁହନ୍ତି । ତେବେ ଆଇନ ଅନୁଯାୟୀ ମୋ ପ୍ରତି ଯେଉଁ ପଦକ୍ଷପେ ନିଆଯିବ ତାକୁ ସେ ମାନିବାକୁ ପ୍ରସ୍ତୁତ ବୋଲି କହିଛନ୍ତି ।
ପୁରୀ ରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
