କଟକ: ମାଞ୍ଜା ସୂତାରେ ଜୟନ୍ତ ସାମଲଙ୍କ ମୃତ୍ୟୁ ପରେ ଆକ୍ସନ ମୋଡ଼ରେ କମିଶନରେଟ ପୋଲିସ । ସହରର ବିଭିନ୍ନ ସ୍ଥାନରେ ଚଢାଉ କରି ଅନେକ ମାଞ୍ଜା ସୂତା ଓ ନଟେଇ ଜବତ କରିବା ସହିତ କୌଣସି ଦୋକାନରେ ବିକ୍ରି ହେଉଥିଲେ ପୋଲିସକୁ ଖବର ଦେବା ପାଇଁ ଲୋକଙ୍କୁ ଅପିଲ କରିଛନ୍ତି କଟକ ଡିସିପି ପ୍ରତୀକ ସିଂ ।
ଏହା ବି ପଢନ୍ତୁ: Death By Manja Thread: ଗୁଡି ବ୍ୟବସାୟୀ ସେକ ଅନଔର ଗିରଫ, ଅତର୍କିତ ରେଡ କଲା ପୋଲିସ
ଏହି ଘଟଣାରେ କଟକର ବିଭିନ୍ନ ଥାନାରେ ୪ଟି ମାମଲା ରୁଜୁ କରିବା ସହ ୧୫ ଜଣଙ୍କୁ ନୋଟିସ ଦେଇ ଛାଡିଛି ପୋଲିସ । ଏଥିସହ ସହରରେ ଯେପରି ମାଞ୍ଜା ସୂତା ବିକ୍ରି କିମ୍ବା ବ୍ୟବହାର ନହୁଏ ସେଥିପାଇଁ ପୋଲିସ ପକ୍ଷରୁ ବିଭିନ୍ନ ସ୍ଥାନରେ ଚଢ଼ାଉ କରାଯାଉଛି । ଏହି ପ୍ରକ୍ରିୟା ଜାରି ରହିବ ବୋଲି କଟକ ଡିସିପି କହିଛନ୍ତି । ତେବେ ଏଥିପାଇଁ ସହରବାସୀଙ୍କ ସାହାଯ୍ୟ ଲୋଡିଛନ୍ତି ଡିସିପି । ବିଶେଷକରି ଯେଉଁମାନେ ମାଞ୍ଜା ସୂତା ଲୁଚାଇ ବିକୁଥିବେ, ପୋଲିସକୁ ଜଣାଇବାକୁ ଡିସିପି ଅନୁରୋଧ କରିଛନ୍ତି ।
ଏହା ବି ପଢନ୍ତୁ: ମାଞ୍ଜା ସୂତାରେ ଯୁବକଙ୍କ ମୃତ୍ୟୁ ଘଟଣା, ୩ ଅଟକ
ତେବେ ସୂଚନା ଥାଉ କି କଟକ ଭୟରପୁରର ଯୁବକ ଜୟନ୍ତ ସାମଲଙ୍କ ମାଞ୍ଜା ସୂତାରେ ଗଳା କଟିଯିବାରୁ ତାଙ୍କ ମୃତ୍ୟୁ ଘଟିଛି । ରବିବାର ଅପରାହ୍ନ ୪ଟା ସମୟରେ ଜୟନ୍ତ ବାଇକ ଯୋଗେ ସ୍ତ୍ରୀଙ୍କ ସହ ଶ୍ବଶୁର ଘର ଯିବାବେଳେ ପୀରବଜ଼ାର ଠାରେ ଗୁଡି ଉଡାଇବା ପାଇଁ ବ୍ୟବହାର କରାଯାଉଥିବା ବେଆଇନ ମାଞ୍ଜାସୂତା ତାଙ୍କ ଗଳାରେ ଗୁଡେଇ ହୋଇଯାଇଥିଲା । ସୂତା ଏତେ ଶକ୍ତ ଥିଲା ଯେ, ଏଥିରେ ଯୁବକଙ୍କ ଗଳା କଟିଯାଇଥିଲା । ଗୁରୁତର ଅବସ୍ଥାରେ ତାଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଥିଲା । ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
କଟକରୁ ନାରାୟଣ ସାହୁ, ଇଟିଭି ଭାରତ
