ଭୁବନେଶ୍ବର: କୁକୁଡ଼ା ଅଣ୍ଡାର ସର୍ବନିମ୍ନ ମୂଲ୍ୟ ବୃଦ୍ଧି ଦାବି ପ୍ରସଙ୍ଗ । ଜାତୀୟ ଅଣ୍ଡା ସମନ୍ୱୟ କମିଟି (ଏନଇସିସି) ସହ ଆଲୋଚନା । ତେବେ କୁକୁଡ଼ା ଅଣ୍ଡାର ସର୍ବନିମ୍ନ ମୂଲ୍ୟ ବୃଦ୍ଧି ଦାବି ପ୍ରସଙ୍ଗରେ କୃଷି, ମତ୍ସ୍ୟ ଓ ପଶୁପାଳନ ବିଭାଗ ମନ୍ତ୍ରୀ ଅରୁଣ ସାହୁ ଜାତୀୟ ଅଣ୍ଡା ସମନ୍ୱୟ କମିଟି (ଏନଇସିସି) ସହ ଆଲୋଚନା କରିଛନ୍ତି ।
ସେହିପରି ଅଣ୍ଡା ଚାଷୀ ମାନଙ୍କ ସହ ଆଲୋଚନା ପରେ ଆଗାମୀ ୨୪ ଘଣ୍ଟା ମଧ୍ୟରେ ଓଡ଼ିଶାରେ ଅଣ୍ଡା ଦର ବୃଦ୍ଧି ହେବ ବୋଲି ପ୍ରତିଶୃତି ଦେଇଛି ଏନଇସିସି (NECC) । ତେବେ ଚାଷୀଙ୍କ କ୍ଷତି ଓ ୩ ଦଫା ଦାବି ସମ୍ପର୍କରେ ଏନଇସିସି (NECC) ଓଡ଼ିଶା ପକ୍ଷରୁ ଉପରୋକ୍ତ ଅଧିକାରୀଙ୍କ ଦୃଷ୍ଟି ଆକର୍ଷଣ କରାଯାଇଛି ।ସୂଚନା ଅନୁସାରେ ଏନଇସିସି(NECC)ର ମନମାନି ବିରୋଧରେ ଓ ୬ଦଫା ଦାବି ନେଇ ରାଜରାସ୍ତାରେ ଆଜି ଅଲ ଓଡ଼ିଶା ଲେୟର ଫାର୍ମର୍ସ ଆସୋସିଏସନ ପକ୍ଷରୁ ଧାରଣା ଦିଆଯାଇଥିଲା ।
ସେହିଭଳି ରାଜ୍ୟରେ ଦିନକୁ ପ୍ରାୟ ୯୨ଲକ୍ଷ ଅଣ୍ଡା ଉତ୍ପାଦନ ହେଉଛି । ୨୦୦ ଚାଷୀ ନିଜ ଫାର୍ମରେ ୫୦ ହଜାର ପ୍ରତ୍ୟକ୍ଷ ଓ ୨ ଲକ୍ଷ ପରୋକ୍ଷ ନିଯୁକ୍ତି ଦେଇଛନ୍ତି ।ହେଲେ ଦେଶରେ ଅଣ୍ଡାର ଦର ସ୍ଥିର କରୁଥିବା ଏନଇସିସି (NECC)ର ମନମାନି ଓ ପକ୍ଷପାତିତା ଯୋଗୁଁ ରାଜ୍ୟର ଲେୟର ଚାଷୀ ସଙ୍କଟରେ ପଡ଼ିଛନ୍ତି । ଅଣ୍ଡା ଉତ୍ପାଦନ ଖର୍ଚ୍ଚଠାରୁ କମ ଦରରେ ଅଣ୍ଡା ବିକ୍ରି ହେଉଛି ।
ଏଥିସହ ଗୋଟିଏ ଅଣ୍ଡାର ଉତ୍ପାଦନ ଖର୍ଚ୍ଚ ପ୍ରାୟ ୪ ଟଙ୍କା ୭୦ ପଇସା ପଡୁଥିବା ବେଳେ ଚାଷୀଙ୍କ ଠାରୁ ବ୍ୟବସାୟୀ ଅଣ୍ଡା କିଣିବାର ଦର ହେଉଛି ମାତ୍ର ୩ ଟଙ୍କା ୭୦ ପଇସା । ଖାଉଟିଙ୍କୁ ବ୍ୟବସାୟୀ ସାଢ଼େ ୬ ଟଙ୍କାରୁ ୭ ଟଙ୍କାରେ ବିକ୍ରି କରୁଛନ୍ତି । ଉତ୍ପାଦନ ଖର୍ଚ୍ଚଠାରୁ କମ୍ ଦରରେ ଅଣ୍ଡା ବିକ୍ରି କରୁଥିବାରୁ ଚାଷୀ ଅଭାବୀ ବିକ୍ରିର ସାମ୍ନା କରୁଥିବା କହିଛନ୍ତି ମନ୍ତ୍ରୀ ।
ଏଣୁ ଉଚ୍ଚିତ ପଦକ୍ଷେପ ନେବାକୁ ଏନଇସିସି (NECC) ସହ ଆଲୋଚନା ହୋଇଥିବା କହିଛନ୍ତି କୃଷି ମନ୍ତ୍ରୀ । ଅନ୍ୟପକ୍ଷରେ ପ୍ରତିଶ୍ରୁତି ପୂରଣ ନହୁଏ ଆନ୍ଦୋଳନକୁ ଆହୁରି ବ୍ୟାପକ କରିବାକୁ ଚାଷୀ ମାନେ ଚେତାବନୀ ଦେଇଛନ୍ତି ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
