ଭୁବନେଶ୍ବର: ଋଣ ଶୁଝି ନପାରିବାରୁ ଜଗତସିଂହପୁର ଜିଲ୍ଲା ତିର୍ତ୍ତୋଲ ସ୍ଥିତ ଶାରଳା ସୂତାକଳକୁ ଏସବିଆଇ ବ୍ୟାଙ୍କ ସିଲ କରିଛି । ସୂତାକଳକୁ ଋଣମୁକ୍ତ କରିବା ସହ ପୁନଃରୁଦ୍ଧାର କରିବା ପାଇଁ ବିଭିନ୍ନ ମହଲରେ ଦାବି ହୋଇଛି । ଏହି ପରିପ୍ରେକ୍ଷୀରେ ତିର୍ତ୍ତୋଲବାସୀ ପଦଯାତ୍ରା କରି ଭୁବନେଶ୍ବରର ମାଷ୍ଟରକ୍ୟାଣ୍ଟିନରେ ପହଞ୍ଚିଛନ୍ତି । ସୂତାକଳକୁ ପୁନଃ କାର୍ଯ୍ୟକ୍ଷମ ଦାବିରେ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରିଛନ୍ତି ।
୧୯୮୨ ମସିହାରୁ ଏହି ସୂତାକଳ ସ୍ଥାପନା ହୋଇଥିବା ବେଳେ ୧୯୮୪ରେ କାର୍ଯ୍ୟକ୍ଷମ ହୋଇଥିଲା । ରକ୍ଷଣାବେକ୍ଷଣ ଓ ଯନ୍ତ୍ରାଂଶର ଅଭାବରୁ ମହାବାତ୍ୟା ୧୯୯୯ ଠାରୁ ବନ୍ଦ ହୋଇପଡିଛି । ଏପରିକି ସରକାର ଏହାକୁ ଆନୁମାନିକ ମୂଲ୍ୟଠାରୁ ବି କମରେ ବିକ୍ରି କରିବାର ଯୋଜନା କରୁଥିବା ତିର୍ତ୍ତୋଲବାସୀ ଅଭିଯୋଗ କରିଛନ୍ତି । ଆନ୍ଦୋଳନକାରୀ କହିଛନ୍ତି," ସରକାର ଶାରଳା ସୂତାକଳକୁ ଋଣମୁକ୍ତ କରି କାର୍ଯ୍ୟକ୍ଷମ କରନ୍ତୁ । ନଚେତ ଏହା ପରିବର୍ତ୍ତେ ଅନ୍ୟ କୌଣସି କମ୍ପାନୀ ତିଆରି କରନ୍ତୁ ।" ସୂତାକଳ ପୁନଃରୁଦ୍ଧାର ହୋଇପାରିଲେ ୧୦ ହଜାରରୁ ଉର୍ଦ୍ଧ୍ବ ସ୍ଥାନୀୟ ଲୋକେ ରୋଜଗାରକ୍ଷମ ହୋଇପାରିବେ । ଏଥିପାଇଁ ସ୍ଥାନୀୟ ୧୦ ହଜାର ଲୋକଙ୍କ ଦସ୍ତଖତ ମଧ୍ୟ ନିଆଯାଇଛି । ତେଣୁ ଲୋକଙ୍କ ସ୍ବାର୍ଥ ଓ ପେଟପାଟଣାକୁ ନଜରରେ ରଖି ସରକାର ଏହି ଦିଗରେ ନିଷ୍ପତ୍ତି ନିଅନ୍ତୁ ବୋଲି ତିର୍ତ୍ତୋଲ ବାସିନ୍ଦା ଦାବି କରିଛନ୍ତି ।
ଇଟିଭି ଭାରତ, ଭୁବନେଶ୍ବର
