ଭୁବନେଶ୍ବର: ନିକଟରେ ଅନେକ ଅସହାୟଙ୍କୁ ସହାୟତାର ହାତ ବଢାଇ ଦୀନଦରିଦ୍ରଙ୍କ ମସିହା ସାଜିଛନ୍ତି ସବ୍ୟସାଚୀ ମିଶ୍ର । ହଁ ଆମେ ଓଡିଉଡ ଜଗତର ଚକଲେଟ ହିରୋ ସବ୍ୟସାଚୀଙ୍କ କଥା କହୁଛୁ । ଯିଏ ରିଲ ନୁହେଁ ରିୟଲ ଲାଇଭରେ ମଧ୍ୟ ଏବେ ସମସ୍ତଙ୍କ ପ୍ରିୟ ହିରୋ ହୋଇପାରିଛନ୍ତି । ନିକଟରେ କୋରୋନା ଛାତ୍ରଛାତ୍ରଙ୍କ ଠାରୁ ଆରମ୍ଭ କରି ଅନେଖ ଅସହାୟଙ୍କୁ ସାହାଯ୍ୟ କରି ବେଶ ଚର୍ଚ୍ଚାରେ ଥିବା ସବ୍ୟସାଚୀ ଏବେ ଜଣେ ଅସହାୟଙ୍କୁ କିଡନୀ ବିକ୍ରି କରିବାରୁ ରକ୍ଷା କରିଛନ୍ତି ।
ସୋମନାଥ ଗହଣ ନାମକ ଜଣେ ବ୍ୟକ୍ତି ବିଭିନ୍ନ ପ୍ରକାର ଅସୁବିଧାରେ ଥିବା କଥା ସାମାଜିକ ଗଣମାଧ୍ୟମରେ ପୋଷ୍ଟ କରି ସାହାଯ୍ୟ ମାଗିଥିଲେ । ଏପରିକି ସେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବଲିଉଡ ହିରୋ ଅକ୍ଷୟ କୁମାର ଓ ଓଲିଉଡ ହିରୋ ସବ୍ୟସାଚୀଙ୍କୁ ନିଜର ଦୁଃଖ ଜଣାଇବା ସହ ସାହାଯ୍ୟ କରିବାକୁ ନିବେଦନ କରିଥିଲେ ।
ତେବେ ତାଙ୍କ ଦୁଃଖ ମୁଖ୍ୟମନ୍ତ୍ରୀଙ୍କ ନିକଟରେ ପହଞ୍ଚି ପାରି ନଥିବାବେଳେ ଏହି କୋରୋନା କାଳରେ ଅସହାୟଙ୍କ ଦେବଦୂତ ସାଜିଥିବା ଅଭିନେତା ସବ୍ୟସାଚୀଙ୍କ ନଜରେ ଆସିଥିଲା । ସେ ତାଙ୍କ ସହିତ ଯୋଗାଯୋଗ କରି ଜାଣିବାକୁ ପାଇଥିଲେ ଯେ, ନିଜର ପରିବାରର ଅର୍ଥିକ ପରିସ୍ଥିତି ଶୋଚନୀୟ ଥିବାବେଳେ ଦୁଃଖ ଦୂର କରିବା ପାଇଁ ସୋମନାଥ ନିଜ କିଡନୀ କୌଣସି ଏକ ଦିଲ୍ଲୀରେ ଥିବା ସଂସ୍ଥାକୁ ବିକ୍ରି କରିବାକୁ ସ୍ଥିର କରିଛନ୍ତି ।
ତେଣୁ ସେ ତୁରନ୍ତ ସୋମନାଥଙ୍କ ସହ ଯୋଗାଯୋଗ କରିବା ସହ ଦିଲ୍ଲୀରେ ଥିବା ସେହି ସଂସ୍ଥା ଏକ କିଡନୀ ରାକେଟ ହୋଇଥିବା ସନ୍ଦେହ କରି ତାଙ୍କୁ ସେଥିରୁ ବିରତ ରଖିବା ସହ ତାଙ୍କୁ ଆର୍ଥିକ ଭାବେ ସାହାଯ୍ୟ ସହଯୋଗ କରିବାକୁ ପ୍ରତିଶ୍ରୃତି ଦେଇଛନ୍ତି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ,ଇଟିଭି ଭାରତ