ଭୁବନେଶ୍ବର: ଆଜି (ଶୁକ୍ରବାର) ବିଧାନସଭା ଶୀତକାଳୀନ ଅଧିବେଶନର 9ମ ଦିନ। ସବୁଦିନ ଭଳି ଆଜି ବି ଗୃହକାର୍ଯ୍ୟ ଆରମ୍ଭ କରାଯାଇଥିଲା । ହେଲେ ପ୍ରଶ୍ନକାଳରେ ପ୍ରଶ୍ନ କରିବାକୁ ସତ୍ୟବାଦୀ ବିଧାୟକ ଉମାକାନ୍ତ ସାମନ୍ତରାୟ ଓ ଜୟପୁର ବିଧାୟକ ତାରାପ୍ରସାଦ ବାହିନୀପତିଙ୍କ ନାମକୁ ବାଚସ୍ପତି ଡାକି ନଥିଲେ। ଫଳରେ ଉଭୟ ଗୃହରେ ତୁମ୍ବିତୋଫାନ କରିଥିଲେ।
ଅନ୍ୟପଟେ ଗୃହକୁ ଅନ୍ୟଦିନ ଭଳି ମୁଲତବୀ କରାନଯାଇ ଶାନ୍ତି ଶୃଙ୍ଖଳାର ସହ ପରିଚାଳନା କରାଯାଇଥିଲା। ଆଜି ପ୍ରଶ୍ନକାଳରେ ବାତ୍ୟା ଓ ବନ୍ୟା ଆଶ୍ରୟସ୍ଥଳୀ ନିର୍ମାଣ ଉପରେ ଆଲୋଚନା ଚାଲିଥିଲା। ଅତିରିକ୍ତ ପ୍ରଶ୍ନ ପଚାରିବାକୁ ଆଗ୍ରହ ପ୍ରକାଶ କରିଥିଲେ ମଧ୍ୟ ବାଚସ୍ପତି ସେମାନଙ୍କୁ ସୁଯୋଗ ଦେଇ ନଥିଲେ। ଯେଉଁଥି ପାଇଁ ଏହି ଦୁଇ ବିଧାୟକ ଅସନ୍ତୋଷ ପ୍ରକାଶ କରିଥିଲେ ।
ଚଳିତ ବିଧାନସଭାର ଶୀତକାଳୀନ ଅଧିବେଶନ 13 ତାରିଖ ଠାରୁ ଆରମ୍ଭ ହୋଇଥିବା ବେଳେ ଏହା ଡିସେମ୍ବର 19 ପର୍ଯ୍ୟନ୍ତ ଚାଲିବ । ଅଧିବେଶନରେ ମୋଟ 30ଟି କାର୍ଯ୍ୟଦିବସ(25ସରକାରୀ ଏବଂ 5ଟି ବେସରକାରୀ) ରହିଥିବା ବେଳେ ପ୍ରଥମ ଦିନରେ ଅତିରିକ୍ତ ବଜେଟ ଉପସ୍ଥାପନ କରିଥିଲେ ଅର୍ଥମନ୍ତ୍ରୀ । ଗତକାଲି ଥିଲା ବିଧାନସଭାର 8ମ ଦିନ। ଗୃହ ଆରମ୍ଭରୁ ଉଭୟ ବିରୋଧୀ ବିଜେପି ଓ କଂଗ୍ରେସ ବିଧାୟକ ହୋହାଲ୍ଲା କରିଥିଲେ। ଫଳରେ ଗୃହକୁ ଚଲାଇବା ସମ୍ଭବ ହୋଇନଥିଲା। ସେଥିପାଇଁ ବାଚସ୍ପତି ବାରମ୍ବାର ଗୃହକୁ ମୁଲତବୀ କରିଥିଲେ।
ଭୁବନେଶ୍ବରରୁ ଅଜିତ ଦାସ, ଇଟିଭି ଭାରତ
